1 Corintios 5:1-13
5 Ja keʼn alubʼalkabʼ ke ja bʼa weʼnlexi ay maʼ wan koʼel mulal sok ixuk winik,* sok jelxani malo ja jastal wan koʼel mulali* sok mini bʼa ekʼel soka matik mi kʼuʼumanukeʼi:* ay jun winik bʼa jani yiʼoj ja xcheʼum ja stati.
2 Jaxa weʼnlexi, ¿jel maʼ agustoʼex? ¿Mi maʼ sbʼejuk oja naʼex malaya bʼa jachuk oj axuk eluk ja bʼa weʼnlex ja winik maʼ skʼulunej ja jaw?
3 Ama mi teyona mokexa, pe tini aya mokex ja jpensari.* Sok ja keʼn jkʼulanta jusgar ja winik maʼ skʼulunej ja jawi, bʼa lajansok tini ayon tiw ja keʼni.
4 Yajni xa tsomo abʼajex bʼa sbʼiʼil ja Kajwaltik Jesús, sok snajel teya mokex ja jpensari* sok ja yip ja Kajwaltik Jesús,
5 kʼulanikyi entregar ja Satanás ja winik jaw bʼa oj chʼaysnajel ja sjejel mi lekuk ya ochjan ja bʼa kongregasyoni, bʼa jachuk ja jastal toj wa spensaraʼan* ja kongregasyoni oj staʼ skoltajel ja bʼa skʼakʼujil ja Kajwaltiki.
6 Mini lekuk ja oja toyabʼajexi. ¿Mi maʼ xa naʼawex ke tʼusan levadura wa xya pojxuk* yibʼanal ja wotsʼubʼal arina?
7 Awik eluk ja poko levadura bʼa jachuk oj bʼobʼ kʼotanik jun yajkʼachil wotsʼubʼal arina, pe mey slevaduraʼil, jastalni kʼotelex. Pes yujni miljita ja Kristo, ja jchejtik bʼa Pascua.*
8 Ja yuj tak, mok la jkʼuluktik ja kʼin soka poko levadura cha mini soka slevaduraʼil ja bʼa jas mi lekuk sok ja bʼa jel malo, jani soka panik mey slevaduraʼil sbʼaja jas toji sok sbʼaja smeranili.
9 Jtsʼijbʼanawilex bʼa jun karta bʼa oja waʼexkan yamigoʼajel* ja matik wa xkoye mulal sok ixuk winik.*
10 Soka jaw mi kʼan kal bʼa oja pilabʼajex juntiro soka kristyano bʼa luʼumkʼinal it bʼa wa xkoye mulal sok ixuk winik,* bʼa jel x-okʼ skʼujole jastik junuk, bʼa wa sloʼlaye ja kristyano bʼa yijelkan ja jastik sbʼaji ma bʼa matik wa stoyowe kʼulubʼal dyosik.* Lekbʼi jachukxta, ja weʼnlexi tʼilani oj elanik ja bʼa luʼumkʼinali.
11 Pe ja wego wa stsʼijbʼanawilex bʼa oja waʼexkan smojtajel* chikan machunkiluk wa x-alxi kʼotel hermano, pe ja yeʼn wa xkoʼ mulal sok ixuk winik,* jel x-okʼ skʼujol jastik junuk, wa stoyo kʼulubʼal dyosik,* wa xyala jastik bʼa wa xyajbʼesni, wa xyakbʼi ma wa sloʼlay ja kristyano bʼa yijelkan ja jastik sbʼaji. Mokni waʼanik soka kristyano jawi.
12 Pes ¿jas yuj keʼn tʼilan oj jkʼul jusgar ja matik teye bʼa juera? ¿Mi maʼ weʼn waxa kʼulanex jusgar ja matik teye bʼa yojoli,
13 jaxa Dyosi yeʼn wa skʼulan jusgar ja matik tey bʼa juera? «Awik eluk ja mal kristyano teya mokexi».
Notaʼik
^ Ja bʼa griego, pornéia. Kʼela ja bʼa Yaljelik cholubʼal.
^ Ja bʼa griego, pornéia. Kʼela ja bʼa Yaljelik cholubʼal, Koʼel mulal sok ixuk winik.
^ Ma «mi kreyenteʼukeʼi», «matik bʼa tuk chonabʼe».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «sitsʼuk».
^ Kʼela ja bʼa Yaljelik cholubʼal.
^ Ma «smojtajel».
^ Kʼela ja bʼa Yaljelik cholubʼal, Koʼel mulal sok ixuk winik.
^ Kʼela ja bʼa Yaljelik cholubʼal, Koʼel mulal sok ixuk winik.
^ Ma «jastik junuk».
^ Ma «yamigoʼajel».
^ Kʼela ja bʼa Yaljelik cholubʼal, Koʼel mulal sok ixuk winik.
^ Ma «jastik junuk».
