1 Corintios 2:1-16
2 Ja yuj kermano jumasaʼ, yajni wajyon ja bʼayexi, mini waj kalawabʼyex ja jas jel chaʼanyabʼal wa xjak bʼa Dyos* yajel makunuk yaljelik jel chaʼanyabʼalil ma sjejel jel biboʼon.
2 Pes ja yajni ti ajyiyona mokexi, kechan kala jbʼaj jaʼita oj waj jkʼujol sbʼaja Jesukristo, sok ja jastal aji kʼe lokan ja bʼa poste.
3 Ja keʼn wajyon ja bʼayexi ama mey kip xkabʼi, wanon xiwel sok jel wanon kʼitkʼunel.
4 Sok yajni kalawabʼyex sok jcholowabʼyex ja rasoni, mini ka makunuk yaljelik bʼa wa xmonwani jastal wa xyawe makunuk ja matik jel biboʼeʼi, pes ja jastik kala jani xchiktes ja yip ja Dyosi,
5 bʼa jachuk mi jaʼ oja kʼuʼukex ja sbiboʼil ja winikeʼi, jani sbʼaja yip ja Dyosi.*
6 Ja matik tsatsxa ja skʼuʼajel kiʼojtiki* wa xtaʼatik tiʼal jastik bʼa biboʼil, pe mi jaʼuk sbʼaja sbiboʼil ja bʼa jastal wa xtax ja tyempo* it sok mini ja bʼa sbiboʼile ja mandaranumik ja bʼa jastal wa xtax ja tyempo it, bʼa ojni chʼaysnajele.
7 Jani wa xtaʼatik tiʼal ja jas jel chaʼanyabʼal wa xjak bʼa Dyosi,* wa xkʼan alxuk, ja sbiboʼil ja Dyos bʼa nakʼan ayi. Ja yeʼn xchapaxa ja it bʼajtantoyuj oj ajyuk ja luʼumkʼinal* it jel malo, bʼa jachuk oj bʼobʼ ajukitik jun chaʼan cholal.
8 Jani ja biboʼil it bʼa mini jun mandaranum ja bʼa jastal wa xtax ja tyempo* it kʼot snaʼe sbʼaj; pes lekbʼi snaʼuketo sbʼaji, mini oj smil-e ajyi* ja Kajwaltiki, ja maʼ jel niwani.
9 Pe jachni jastal tsʼijbʼunubʼal: «Mini yilunejuk ja satali, mini yabʼunejuk ja chikinali sok mini tʼun ekʼel ja bʼa skʼujol ja winik ja jastik xchapunej ja Dyos sbʼaja matik wa syajtayi».
10 Pes keʼntikni ja matik xchiktesnejkitik ja Dyos yuja yipi,* yujni ja yip ja Dyosi wa spaklay yibʼanal ja jastik junuki, asta ja jastik nakʼan ay sbʼa Dyosi.
11 Pes ¿maʼ winikil wa xbʼobʼ snaʼ ja spensar jun winik? Kechani yeʼn mismo wa snaʼa ja jas wa xyala ja skʼujoli.* Junxtani soka it, mini maʼ wa snaʼa ja spensar ja Dyosi, kechani ja yipi.
12 Pe ja keʼntiki mini jaʼ akʼubʼalkitik ja yip* ja luʼumkʼinali, jani ja ipal ti wa xjak bʼa Dyosi bʼa jachuk oj jnatik ja jastik yaʼunejkitik sok spetsanil skʼujol ja Dyosi.
13 Ja keʼntiki cha wani xkalatik sbʼaja jastik it, pe mi xkatik makunuk yaljelik bʼa yeʼn sjeʼuneje ja matik jel biboʼe, jani wa xkatik makunuk ja jastik sjeʼunejkitik ja yip ja Dyosi.* Ja yuj tak, wani xcholotik jastik sbʼa Dyos yajel makunuk yaljelik sbʼa Dyos.*
14 Ja winiki mini skisa* ja jastik bʼa yip ja Dyosi* yujni mey sbʼej xyila ja yeʼni, cha mini xbʼobʼ snaʼ sbʼaj yujni tʼilan oj ajyukyuj ja yip ja Dyos bʼa oj bʼobʼ spaklay.
15 Pe ja winik bʼa jani tojubʼal yuja yip ja Dyosi wani spaklay yibʼanal ja jastik junuki, pe ja yeʼni mini xbʼobʼ paklajukyuj jun winik.
16 Pes «¿machunkiluk kʼotel snaʼ sbʼaj ja spensar ja Jyoba* bʼa oj bʼobʼ sjeyi?». Pe ja keʼntiki ayni kiʼojtik ja spensar ja Kristo.
Notaʼik
^ Kʼela ja bʼa Yaljelik cholubʼal.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «takʼanotikxa».
^ Kʼela ja bʼa Yaljelik cholubʼal, Ja jastal wa xtax ja tyempo.
^ Kʼela ja bʼa Yaljelik cholubʼal.
^ Ja bʼa griego, aiṓn. Kʼela ja bʼa Yaljelik cholubʼal, Ja jastal wa xtax ja tyempo.
^ Ma «mini oj yawe kʼe lokan ajyi ja bʼa poste».
^ Kʼela ja bʼa Yaljelik cholubʼal, Ja jastal wa xtax ja tyempo.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «yaljelik bʼa akuerdo ay soka yip ja Dyosi».
^ Ma «mini skʼulan resibir».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Kʼela ja bʼa Yaljelik cholubʼal.
