1 Corintios 16:1-24
16 Pe jaxa ja stsomjel takʼin sbʼaja matik tsaʼubʼalexa sbʼaja Dyosi, nochowik ja tojelalik kayi ja kongregasyonik bʼa Galacia.
2 Ja sbʼajtanil kʼakʼu bʼa kada semana, tʼilani ay jas oja pilex kada jujune ja bʼa janekʼ wa xlajxiwujilexi bʼa jachuk mi oja tsomex takʼin ja yajni la kʼotyoni.
3 Sok yajni la kʼotyon ja tiw, oj jek bʼa Jerusalén ja winike waxa taʼawex tiʼal ja bʼa wa kartaʼexi bʼa waxa jipa akʼujolexi bʼa oj yiʼe och ja majtanal waxa waʼawex sok spetsanila kʼujolexi.
4 Pe yujkʼa lek oj cha wajkon ja keʼn, ja yeʼnleʼi ojni wajuke jmok.
5 Ojni waj kulatayex ja yajni ekʼyonta ja bʼa Macedonia, pes yujni oj ekon ja bʼa Macedonia,
6 sok bʼobʼta tini oj kankon jun tyempo amokex ma asta ti oj ka eka mokex ja styempo cheʼeji,* bʼa jachuk oja mojtayonex jun makʼe ja bʼa bʼej oj wajkoni.
7 Pes yujni mi xkʼana ekʼum bʼejta oj ekʼ kilex, yujni wa xkʼana oj kankona mokex jun tyempo, ta jach wa skʼana ja Jyoba.*
8 Pe ama jachuk, tini oj kankon bʼa Éfeso masan bʼa Kʼin bʼa Pentecostés*
9 yujni lajansok sjamata sbʼaj jun niwan puerta bʼa oj aʼtijukon mas, pe jelni jitsan ja kontraʼiki.
10 Pe ta kʼot ja Timoteo, ilawik lek bʼa mokni jas oj ajuk xiwyuj ja yajni teya mokexi, yujni ja yeʼn wan skʼulajel ja yaʼtel ja Jyoba,* jastal keʼna.
11 Ja yujil, mok maʼ yil menos. Kax mojtayikan jun makʼe ja bʼa bʼeji bʼa jachuk mi jas oj ekʼ sbʼaj sok oj juluk ja bʼayoni, yujni wanon smajlajel soka hermanoʼiki.
12 Jaxa soka kermanotik Apolosi, jpatayi lek skʼujol bʼa oj waj yulatayex soka kermanotiki. Ja yeʼn mitoni wa spensaraʼan oj wajuk ja wego, pe ojni wajuk ja yajni xbʼobʼyuji.
13 Ajyanik kʼelan jakan, ajyanik yij ja bʼa skʼuʼajeli, mok xiwanik,* ajyanik tsats.
14 Kʼulanik yibʼanal sok yajalkʼujol.
15 Pe ja wego ayni jas oj patakʼujolex kermano jumasaʼ. Ja weʼnlexi wani xa naʼawex ke ja bʼa snaj ja Estéfanas yeʼnleni ja bʼajtan nebʼumanik bʼa Acaya. Jaxa yeʼnleʼi jani waj skʼujole skoltajel ja matik tsaʼubʼalexa sbʼaja Dyosi.
16 Cha jachni ja weʼnlexi ibʼ kʼabʼal ajyanik soka kristyanoʼik jastal jaw sok yibʼanal ja matik wa xkoltaniye sok ja matik jel tsats wa x-aʼtijiye.
17 Jelni xyaki gusto yuja tey il ja Estéfanas, ja Fortunato sok ja Acaico, pes jelni skoltunejone yuja mi teyukex ja weʼnlexi.
18 Yujni yaʼuneje likikuk ja jkʼujoli* sok cha jachuk jawa bʼajexi. Ja yujil, jeʼawik chaʼanyabʼal waxa wilawex ja tikʼe winike jastal jawi.
19 Wa sjeka akoltanelex ja kongregasyonik bʼa Asia. Ja Áquila soka Prisca,* cha jachuk ja kongregasyon tey bʼa snajeʼi, yajxta wa sjeka akoltanelex jastal snebʼumanik ja Kajwaltiki.
20 Wa sjeka akoltanelex yibʼanal ja hermanoʼiki. Kʼulanabʼajik saludar sok jun ujtsʼanel.
21 Keʼnani ja Pablo ja maʼ wa stsijbʼanawilex ja koltanel it.
22 Ta ay maʼ mi yaj xyila ja Kajwaltiki, achʼay snajel. ¡Laʼ, kala Kajwaltikon!
23 Aʼajyuka mokex ja lekil kʼujolal mi xbʼajintik bʼa Kajwaltik Jesús.
24 Aʼajyuka mokexa wibʼanalex ja syajal jkʼujoli ja matik kʼotelex snochumanik ja Kristo Jesús.
Notaʼik
^ Ma «invierno».
^ Kʼela ja bʼa Yaljelik cholubʼal.
^ Kʼela ja bʼa Yaljelik cholubʼal.
^ Kʼela ja bʼa Yaljelik cholubʼal.
^ Ma «aʼabʼajik winikil».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Cha wa sbʼiʼilan Priscila.
