1 Corintios 12:1-31
12 Kermano jumasaʼ, sbʼaja donik jakel bʼa Dyosi, wani xkʼana oja naʼex jas sbʼej.
2 Ja weʼnlexi waxa naʼawex bʼajtanto oj kʼotanik kʼuʼumanil,* wala monjiyex sok wala kichjiyex bʼa stoyjel kʼulubʼal dyosik mi xkʼumani, jaxa weʼnlexi waxa nochowex ja bʼa wa stojowex ja yeʼnleʼi.
3 Pes wani xkʼana oja naʼex ke mini june ja maʼ wa xkʼumani yuja yip ja Dyosi* wa xyala «¡Ja Jesús jun winik jel malo!» sok mini maʼ wa xbʼobʼ yal «¡Ja Jesús kʼotel Ajwalal!» ta mi jaʼuk wa xnikjiyuj ja yip ja Dyosi.
4 Ayni tuktukil don, pe yibʼanal naka ti jakel bʼa yip ja Dyosi;*
5 ay tuktukil tikʼe aʼtel, pe yibʼanal naka jani bʼa Kajwaltiki,
6 sok ayni tuktukil modo ja jastal wa x-aʼtiji ja Dyos sbʼaja kristyano bʼa oj skʼuluke tuktukil jasunuk, pe ama jachuk kechani ay jun Dyos.
7 Pe ja xchijkajel ja yip ja Dyosi* wa x-ajiyi kada jujune bʼa slekilale ja tuki.
8 Yuja yip ja Dyosi,* ja juni wa x-ajiyi ja don bʼa jel bibo oj kʼumanuk; sok yuja junxta ipal jaw, ja juni jelni oj snaʼ oj kʼumanuk;
9 jaxa juni, wa x-ajiyi ja skʼuʼajel yuja junxta ipali;* jaxa juni, wa x-ajiyi ja don bʼa yajel tojbʼuk ja kristyano yuja único ipal jaw;
10 jaxa juni, bʼa skʼulajel milagroʼik;* jaxa juni, bʼa kʼotel alumanil; jaxa juni, wa xbʼobʼ snaʼ ta ti jakel bʼa Dyos* ja jas wan jexeli ma miyuk; jaxa juni, wa xkʼumani tuktukil kʼumal, sok jaxa juni, wa sutu kʼumalik.
11 Pe yibʼanal ja jastik wa xkʼulaxi jani wa skʼulan ja junxta ipali,* bʼa wa skʼepayi kada jujune jastalni wa skʼana ja yeʼni.
12 Pes jastalni ja kuerpoʼal juneʼita kʼotel pe ayni yiʼoj jitsan parteʼik, sok yibʼanal ja parteʼik ja bʼa kuerpoʼal jaw, ama jel jitsan, juneʼitani kuerpoʼal kʼotel, jachni kʼotel ja Kristo.
13 Yujni kibʼanal ja keʼntiki, tanto judíoʼik ma griegoʼik, matik libre ay ma mosoʼik, kiʼajtikni jaʼ yuj kechanta jun ipal* bʼa oj kʼotkotik jun ita kuerpoʼal, sok kibʼanaltik ajikitik ja ipal jaw.
14 Ja smeranili, ja kuerpoʼali tojbʼelsok jitsan parte, sok mi kechansok juneʼuk.
15 Lekbʼi ja okal xyala «Yuja mi kʼabʼalukoni, mini sparteʼukon ja kuerpoʼali», pe ja jaw mi wa stojolan mi sparteʼuk ja kuerpoʼali.
16 Sok lekbʼi ja chikinal xyala «Yuja mi satalukoni, mini sparteʼukon ja kuerpoʼali», pe ja jaw mi wa stojolan mi sparteʼuk ja kuerpoʼali.
17 Lekbʼi yibʼanal ja kuerpoʼal kʼotel satal, ¿jastalxa oj yabʼ kʼinal? Lekbʼi yibʼanal kʼotel chikinal, ¿jastalxa oj yabʼ yikʼil?
18 Pe ja Dyosi yaʼakan bʼa slugar kada jujune ja parteʼik bʼa kuerpoʼali jastalni skʼana.
19 Lekbʼi junxta kʼotele yibʼanal ja parteʼiki, ¿bʼaxa ay ja kuerpoʼali?
20 Ayni jitsan parteʼik, pe kechantani jun kuerpoʼal.
21 Ja satali mini xbʼobʼ yalyabʼ ja kʼabʼali «Mi la makunikuj», jaxa olomali mi xbʼobʼ yalyabʼ ja okali «Mi la makunikuj».
22 Iday, ja parteʼik bʼa kuerpoʼal bʼa lajansok mey lek yipe wani xmakuniye,
23 sok jaxa parteʼik bʼa kuerpoʼal bʼa wa xpensarantik mi jel tsamaluki, wani xmusutik lek. Sok ja yuj ja parteʼik bʼa jkuerpotik bʼa wa xyakitik kʼixweli, wani xchapatik lek,
24 pe jaxa parteʼik bʼa mas tsamali mini yajnaluk xchapjel. Pe ja Dyosi stojbʼes ja kuerpoʼali bʼa yiljel mas chaʼanyabʼalil ja bʼa parteʼik mi tsamaluki,
25 bʼa jachuk mi jas pilan oj ajyuk ja bʼa kuerpoʼali sok jaxa sparteʼiki ojni chamskʼujol sbʼaje.
26 Ta jun parte wa xyiʼaj wokol, yibʼanal ja tuk parteʼiki wa xyiʼaje wokolsok. Ta jun parte wa xyiʼaj stoyjel, yibʼanal ja tuk parteʼiki wa xgustoʼaxiyesok.
27 Iday, weʼnlexni kʼotelex ja skuerpo ja Kristo, sok kada jujune bʼa weʼnlex kʼotelex jun parte.
28 Jaxa Dyosi yayi xchol jachuk ja kristyanoʼik ja bʼa kongregasyoni: bʼajtan, ja jekabʼanumiki; xchabʼil, ja alumaniki; yoxil, ja maestroʼiki; cha tixa ja matik wa skʼulane milagroʼiki;* cha tixa ja matik ayiʼoje ja don bʼa stojbʼesel ja kristyano; ja matik wa xkoltaniye aʼteli; ja matik wa snaʼawe tojwaneli; sok ja matik wa xkʼumaniye tuktukil kʼumali.
29 ¿Anke mini yibʼanaluke jekabʼanumuke, alumanuke, maestroʼe sok mini yibʼanaluke wa skʼulane milagroʼik?*
30 ¿Anke mini yibʼanaluke ayiʼoje ja don bʼa yajel tojbʼuk ja kristyano, bʼa kʼumanel bʼa tuk kʼumalik sok mini yibʼanaluke sutumane kʼumal?
31 Moka waʼexkan skʼujolajel bʼa oj ajukawilex ja donik mas niwaki. Ama jachuk, oj jeʼawilex jun bʼej bʼa masto chaʼanyabʼalil.
Notaʼik
^ Ma «kreyenteʼil».
^ Ma «espíritu santo». Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «jastik jel chaʼanyabʼalil».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «jastik jel chaʼanyabʼalil».
^ Ma «jastik jel chaʼanyabʼalil».
