1 Corintios 1:1-31
1 Bʼa sparte ja Pablo, ja maʼ payjiyuj ja Kristo Jesús bʼa kʼotel jekabʼanum yuja jach skʼana ja Dyosi, sok bʼa sparte ja kermanotik Sóstenes;
2 wa stsʼijbʼantikonyi ja karta it ja skongregasyon ja Dyos tey bʼa Corinto, cha jachuk yibʼanale ja bʼa tuktukil lugar bʼa wa spataweyi skʼujol ja sbʼiʼil ja Kajwaltik Jesukristo; yeʼnani kʼotel ja Yajwale sok cha Kajwaltikni ja keʼntiki. Ja Dyosi spilawexta ja weʼnlexi bʼa lajan oj ajyanik soka Kristo Jesús sok cha spayawexta bʼa tsaʼubʼalxa oj ajyanik:
3 Ja jTatik Dyos sok ja Kajwaltik Jesukristo ayawilex ja lekil skʼujole mi xbʼajintik sok ja slamanile.
4 Tolabida wa xkayi tsʼakatal ja jDyos yuj weʼnlex yuja lekil kʼujolal mi xbʼajixi sjeʼawilex ja Dyosi stsʼakatal ja Kristo Jesús.
5 Pes yuja lajan ayex soka Kristo, ja weʼnlexi akʼubʼalawilex yibʼanal ja jastik junuki, cha ti chʼikan ja jastal jel xa naʼawex kʼumanel sok ja jastal waxa naʼawex sbʼaj lek ja Yabʼal ja Dyosi,
6 jastalni yaʼunejkan kulan lek ja xcholjel sbʼaja Kristo bʼa weʼnlex,
7 ja yuj mini jun don skʼulanawujilex palta malan gustoxta wanex smajlajel oj chijkajuk ja Kajwaltik Jesukristo.
8 Ja yeʼn ojni cha ya ajyanik tsats man xchʼakulabʼil bʼa jachuk mini juna mulex oj bʼobʼ lejukawilex ja bʼa skʼakʼu ja Kajwaltik Jesukristo.
9 Ja Dyosi tojniʼa. Ja yeʼn spayawex bʼa jachuk lajan oj ajyanik* soka Yunini, ja Kajwaltik Jesukristo.
10 Kermano jumasaʼ, ja wego wa xpata akʼujolex bʼa sbʼiʼil ja Kajwaltik Jesukristo bʼa akuerdo oj ajyanika wibʼanalex sbʼaja jas waxa walawexi sok moka pilabʼajex, mas lek june ita aʼajyuk jawa pensarexi sok junxta yabʼalil akʼotuk.
11 Pes kala kermano jumasaʼ, jujuntik ja bʼa snaj ja Cloe yalawekabʼ wanex kʼeʼel kʼumal.
12 Wa xkala ja it yujni ja weʼnlexi tuktukilxta ja jas wanex yaljeli: «Ja keʼn jaʼ teyon soka Pablo», «Ja keʼn jaʼ teyon soka Apolos», «Pe ja keʼn jaʼ teyon soka Cefas»,* «Sok jaxa keʼn jaʼ teyon soka Kristo».
13 ¿Yuj maʼ spilunej sbʼaj ja Kristo? ¿Yuj maʼ yeʼn aji kʼe lokan bʼa poste ja Pablo yuj weʼnlex? ¿Sok yuj maʼ awiʼajex jaʼ bʼa sbʼiʼil ja Pablo?
14 Wa xkayi tsʼakatal ja Dyos yuja mini june bʼa weʼnlex ka wiʼex jaʼ, kechani ja Crispo sok ja Gayo,
15 pes jachuk mini maʼ xbʼobʼ yal ke ja weʼnlexi awiʼajex jaʼ bʼa jbʼiʼil.
16 Meraniʼa, cha ka yiʼ jaʼ ja matik tey bʼa snaj ja Estéfanas. Sok kechani yeʼnle wa xjul jkʼujol ka yiʼe jaʼ.
17 Ja Kristo mini sjekawon bʼa oj ka yiʼ jaʼ ja kristyano, jani bʼa oj jchol ja lekil rasoniki. Pe mini sjekawon bʼa oj jeʼ jbʼaj jel xnaʼa kʼumanel* ja yajni wa xcholo, bʼa jachuk ja poste bʼa yiʼaj wokol* ja Kristo mok kʼot jun jasunuk bʼa mi xmakuni.
18 Pes ja rason sbʼaja poste bʼa yijel wokoli* mini ay sbʼej wa xyilawe ja matik tojxta wajume bʼa chʼakelali,* pe bʼa keʼntik, ja janekʼ wantik stajel jkoltajeltiki, jani kʼotel ja yip ja Dyosi.
19 Yujni tsʼijbʼunubʼal: «Oj chʼaysnajel ja sbiboʼile ja matik jel bibo sok mi oj kis* ja jastal wa xyabʼye stojolil ja matik jel chapaneʼi».
20 ¿Bʼay ja maʼ jel bibo, ja jeʼuman bʼa leyi* sok ja maʼ jel snaʼa kʼumanel ja bʼa jastal wa xtax ja tyempo* it? ¿Yuj maʼ mi yeʼnuk ja Dyos ya paxuk sonsoʼil ja biboʼil ja bʼa luʼumkʼinali?
21 Pes sbʼaja swinkil ja luʼumkʼinal it, yuja wa sjipa skʼujole ja bʼa sbiboʼileʼi, mini kʼot snaʼe sbʼaj ja Dyosi. Pe ja Dyosi sjeʼa ja sbiboʼil yajni skoltay ja matik wa xkʼot skʼuʼuke ja rason wa xcholotiki bʼa lajansok mey sbʼej wa xyilawe ja kristyanoʼik ja bʼa luʼumkʼinal it.
22 Pes ja judíoʼiki wa skʼanawe milagroʼik,* jaxa griegoʼiki wa sleʼawe biboʼil.
23 Pe ja keʼntiki wani xcholotik sbʼaja jastal aji kʼe lokan ja bʼa poste ja Kristo, jun jasunuk wa x-aji slok yoke ja judíoʼiki sok mini ay sbʼej xyabʼye ja chonabʼiki.
24 Pe ja matik payubʼale, sea judíoʼik ma griegoʼik, ja Kristo jani wa xchiktes ja yip ja Dyosi sok ja sbiboʼili.
25 Yujni jun jasunuk bʼa Dyos bʼa lajansok mey sbʼej mastoni bibo ke yuja winikeʼi, sok jun jasunuk bʼa Dyos bʼa lajansok mey yip mastoni ay yip ke yuja winikeʼi.
26 Kermano jumasaʼ, kʼelabʼajik ja weʼnlex ja matik payubʼalexi: bʼa stiʼ sat ja kristyano, mini ay jitsan matik biboʼex, matik aya wipex sok matik jel sniwakilex.
27 Pes ja Dyosi jani stsaʼa ja jastik mi xmakuni ja bʼa luʼumkʼinali bʼa yajel kʼixwuk ja matik bibo. Ja Dyosi stsaʼa ja jastik mey yip ja bʼa luʼumkʼinali bʼa yajel kʼixwuk ja jastik jel yipi.
28 Sok ja Dyosi stsaʼa ja jastik jel skoʼelal ja bʼa luʼumkʼinali sok ja jastik wa x-ijnaji, ja jastik mini tʼun xmakuni, bʼa xchʼayjel snajel ja jastik chaʼanyabʼali,
29 ja yuj mini maʼ* wa xbʼobʼ stoy sbʼaj ja bʼa stiʼ sat ja Dyosi.
30 Jani stsʼakatal ja Dyos yuja lajan ayex soka Kristo Jesús. Ja yeʼn wa xchiktes ja sbiboʼil ja Dyos sok ja stojili. Yuja Jesús, ja winikeʼi wa xbʼobʼ kʼotuke sak, sok stsʼakatal yuja stsʼakol* yaʼa wani xbʼobʼ eluke libre.
31 Sok jachuk oj ekʼuk jastalni tsijbʼunubʼalkani: «Ja maʼ wa stoyo sbʼaji, a-stoy sbʼaj bʼa Jyoba».*
Notaʼik
^ Ma «oj kʼota mojtabʼajex».
^ Cha wa sbʼiʼilan Pedro.
^ Ma «yajel ekʼ loʼil».
^ Kʼela ja bʼa Yaljelik cholubʼal, Poste bʼa yijel wokol.
^ Kʼela ja bʼa Yaljelik cholubʼal.
^ Ma «ja matik wane chameli».
^ Ma «oj kakan jun lado».
^ Kʼela ja bʼa Yaljelik cholubʼal, Jeʼuman bʼa ley.
^ Kʼela ja bʼa Yaljelik cholubʼal, Ja jastal wa xtax ja tyempo.
^ Jach kanel ja bʼa griego: «senyaʼik».
^ Jach kanel ja bʼa griego: «mini jun bʼakʼtelal».
^ Ma «slokʼol». Kʼela ja bʼa Yaljelik cholubʼal, Slokʼol.
^ Kʼela ja bʼa Yaljelik cholubʼal.
