1 Corintios 6:1-20
6 Ta june ja b’a weʼnlex ay maʼ kʼeʼelsok kʼumal, ¿jastal lek wa xyawilex gana oj wajanik bʼa stiʼ sat ja juesik bʼa mi kʼuʼumanuke* sok mi jaʼ wala wajyex soka matik tsaʼubʼalexa sbʼaja Dyosi?
2 ¿Yuj ma’ mixa naʼawex ke ja matik tsaʼubʼalexa sbʼaja Dyosi yeʼn oj skʼuluke jusgar ja luʼumkʼinali? Sok ta oja kʼulukex jusgar ja luʼumkʼinali, ¿jas yuj mi xlajxiwujilex skʼulajel jusgar ja jastik mi chaʼanyabʼaliluki?
3 ¿Mi ma’ xa naʼawex ke ojni jkʼultik jusgar anjelik? Anto, ¿jas yuj mi xbʼobʼ jkʼultik jusgar ja jastik bʼa jsakʼaniltik it?
4 Ja yujil, ta tʼilan oja kʼulukex jusgar ja jastik bʼa jsakʼaniltik it, ¿jas yuj waxa tsaʼawex jastal juesik ja winike bʼa mi lek x-iljiye yuja kongregasyoni?
5 Wa xkalawabʼyex ja it bʼa oj kʼixwanik. ¿Yuj maʼ mey jun winik bibo ja bʼa weʼnlexi bʼa oj bʼobʼ skʼul jusgar ja kʼumalik wa xkʼeye jawa wermanoʼexi?
6 Pe ja jas wan ekʼeli, ja hermanoʼiki wa xyiʼaj och sbʼaje bʼa stiʼ sat juesik, ¡bʼa stiʼ sat ja matik mi kʼuʼumanukeʼi!*
7 Jelni lom wanex chʼayel ja waxa wiʼabʼajex och bʼa matik ay xcholi. ¿Mi maʼ mas lek oja waʼexkan oj kʼulajukawilex jastik bʼa mi tojuk? ¿Mi maʼ mas lek oja waʼexkan gana oj loʼlajananik?
8 Pe ja jas wan ekʼeli, weʼnlexni ja ma’ wanex skʼulajel jastik bʼa mi tojuk sok gana wala loʼlaniyex, ¡sok jani waxa kʼulanexyi ja it jawa wermanoʼexi!
9 Ma ¿yuj mixa naʼawex ke ja matik mi tojuki mi oj sbʼajuke ja sGobyerno ja Dyosi? Moka loʼlabʼajex.* Ja kristyanoʼik bʼa wa xkoye mulal sok ixuk winik,* ja matik wa stoyowe kʼulubʼal dyosik,* ja matik wa xchʼaykʼujolane ja nupaneli, ja winike wa xyaʼa sbʼaje bʼa oj staʼ sbʼaje soka smoj winikileʼi,* ja winike wa xway soka smoj winikileʼi,*
10 ja elkʼanumik, ja matik jel x-okʼ skʼujol ja jastik junuki, ja matik wa xyakbʼi, ja matik wa xyala jastik bʼa wa xyajbʼesni sok ja matik wa sloʼlay ja kristyano bʼa yijelkan ja jastik sbʼaji mini oj sbʼajuke ja sGobyerno ja Dyosi.
11 Iday, jujuntik ja weʼnlexi jachukexni ajyi. Pe ajita asyadoʼaxanik, ajita sakbʼanik, aljita kʼotelex toj bʼa sbʼiʼil ja Kajwaltik Jesukristo sok bʼa yip* ja jDyostiki.
12 Ayni kiʼoj permiso bʼa skʼulajel chikan jasunuk, pe mi yibʼanaluk wa x-ilxi slekilal. Ayni kiʼoj permiso bʼa skʼulajel chikan jasunuk, pe mini oj kaʼ jbʼaj bʼa ay jas oj yaʼon mandar.
13 Ja jwaʼeltiki jani sbʼaj ja jlukumtiki jaxa jlukumtiki jani sbʼaj ja jwaʼeltiki, pe ja Dyosi ojni xchʼaysnajel xchabʼil. Jaxa jkuerpotiki mini jaʼuk sbʼaj ja koʼel mulal sok ixuk winik,* jani sbʼaj ja Kajwaltiki, jaxa Kajwaltiki jani sbʼaj ja jkuerpotiki.
14 Pe ja Dyosi ya sakʼwuk* ja Kajwaltiki sok ojni cha ya kʼekotikjan ja bʼa chamwinik soka yipi.
15 ¿Mi maʼ xa naʼawex ke jawa kuerpoʼexi kʼotel parteʼik ja bʼa skuerpo ja Kristo? Anto, ¿tʼilan maʼ oj ka elyi ja parteʼik jaw yiʼoj ja Kristo sok yajel staʼ sbʼaj bʼa jun ixuk wa xchono sbʼaj? ¡Miniʼa!
16 ¿Mi maʼ xa naʼawex ke chikan maʼ wa staʼa sbʼajsok jun ixuk wa xchono sbʼaj jun ita kuerpo wa xkʼot soka yeʼn? Pes ja Dyosi wa xyala: «June ita oj kʼotuke xchawanile».
17 Pe chikan maʼ wa xkʼot ajyuksok lajan ja Kajwaltiki junxta wa spensaraʼan* jastal ja yeʼn.
18 ¡Pakawik ajnel* ja bʼa koʼel mulal sok ixuk winiki!* Chikan maʼ wa xkoʼ bʼa pilan mulal mini jaʼuk mero wan sjomjel ja skuerpo, pe ja maʼ wa xkoʼ mulal sok ixuk winik jani mero wan sjomjel ja skuerpo.
19 ¿Mi maʼ xa naʼawex ke jawa kuerpoʼexi jani ja stemplo ja yip ja Dyosi,* ja it tey bʼa weʼnlexi sok wa xyawilex ja Dyosi? Ja weʼnlexi sbʼajexni ja Dyosi,
20 yujni jel karo tupjiyex ja yajni manjiyexi. Ja yujil, awik makunuk jawa kuerpoʼex bʼa yajelyi stoyjel ja Dyosi.
Notaʼik
^ Ma «mi kreyenteʼuke».
^ Ma «mi kreyenteʼukeʼi».
^ Ma «Moka waʼabʼajex loʼlajel».
^ Kʼela ja bʼa Yaljelik cholubʼal, Koʼel mulal sok ixuk winik.
^ Ma «jastik junuk».
^ Ja it wani stojolan jun winik yeʼn wa x-och ixukil ja yajni wa staʼa sbʼaj soka smoj winikili.
^ Ma «winike wa staʼa sbʼaj soka smoj winikileʼi».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ja bʼa griego, pornéia. Kʼela ja bʼa Yaljelik cholubʼal.
^ Jach kanel ja bʼa griego: «ya kʼeʼuk».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «Talnabʼajik».
^ Ja bʼa griego, pornéia. Kʼela ja bʼa Yaljelik cholubʼal.
^ Ma «espíritu santo». Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
