1 Corintios 14:1-40
14 Moka waʼexkan sjejel yajalkʼujolal, pe cha kʼujolanik bʼa oj ajukawilex ja donik jakel bʼa Dyosi, pe mastoni sbʼaja don bʼa alumanili.
2 Yujni ja maʼ wa xkʼumani tuk kʼumali mini jaʼ wa skʼuman ja winikeʼi, jani ja Dyosi, pes mini maʼ wa xyabʼ stojol ama yuja yipi* wa xyala ja jastik jel chaʼanyabʼal wa xjak bʼa Dyosi.*
3 Pe ja maʼ kʼotel alumanili wa stsatsankʼujolani, wa xtulwani sok wa xyayi kulan skʼujol ja kristyano soka jas wa xyala.
4 Ja maʼ wa xkʼumani tuk kʼumal yeʼnta wa stsatsankʼujolan sbʼaj, pe ja maʼ kʼotel alumanili wani stsatsankʼujolan ja kongregasyoni.
5 Wanike xkʼana awibʼanalex oj kʼumananik tuk kʼumalik, pe mastoni wa xkʼana oj kʼotanik alumanil. Iday, ja maʼ wa xkʼot alumanili mastoni niwan yuja maʼ wa xkʼumani tuk kʼumaliki, pe ojni kʼot niwan ta sutu ja jas wa xyala bʼa stsatsankʼujolajel ja kongregasyon.
6 Pe kermano jumasaʼ, lekbʼi ja bʼa jutsʼin it la kʼotyon sok la kʼumaniyon tuk kʼumalik, ¿jas yaʼtelawujilex ta mi xkalawabʼyex ja jas yaʼunej eki ja Dyosi, ja snajeli, ja jas wa xyala ja Dyos ma sjejelawilex jun jasunuk?
7 Junxtani wa x-ekʼ soka jastik mi sakʼanuk bʼa wa x-okʼi, jastal ja ajmay sok ja arpa. Pes ta mi x-axiyi pilan yokʼel, ¿jastalxa oj naxuk ta jaʼ wan okʼel ja ajmayi ma jaʼa arpa?
8 Sok ta mi klaroʼuk ja yokʼel ja trompeta, ¿maʼ oj xchap sbʼaj ja bʼa tiroʼaneli?
9 Junxtani soka it, mikʼa x-el ja bʼa wa tiʼex yaljelik bʼa pasil yabʼjel stojol, ¿ayma maʼ oj yabʼ stojol ja jas wanex yaljeli? Lajansok jani wanex skʼumajel ja ikʼi.
10 Ja bʼa luʼumkʼinali ay jitsan kʼumalik, sok yibʼanal naka ayni stojolil.
11 Pe ta ja keʼn mi xkabʼ stojol ja jas wan alxeli, ojni kʼotkon sbʼaja maʼ wan kʼumali jastal june maʼ ti sbʼaj bʼa pilan país. Jaxa maʼ wan kʼumali ojni kʼot bʼa keʼn jastal june maʼ ti sbʼaj bʼa pilan país.
12 Junxtani wa x-ekʼ soka weʼnlexi. Ja yujil, yuja jel xa kʼanawex ja donik bʼa yip ja Dyosi,* kʼujolanik bʼa oj jitsanbʼuk lek ja donik bʼa oj stsatsankʼujoluk ja kongregasyon.
13 Ja yujil, ja maʼ wa xkʼumani tuk kʼumali a-skʼan bʼa orasyon bʼa oj bʼobʼ sute.*
14 Pes ta wa xkayi orasyon bʼa tuk kʼumal, jani wa xyayi orasyon ja jdon bʼa yip ja Dyosi,* pe mi xkabʼ stojol ja jas wa xkala.
15 Anto, ¿jasa oj kʼulaxuki? Ojni kayi orasyon soka don bʼa yip ja Dyosi,* pe cha ojni kayi orasyon soka jpensari. Ojni tsʼebʼanukon soka don bʼa yip ja Dyosi, pe cha ojni tsʼebʼanukon soka jpensari.
16 Pe ta waxa toyo ja Dyos yajel makunuk jun don ja bʼa yipi,* ¿jastalxa oj yal «Amén» ja kristyano maʼ teya mokex bʼa mey yiʼoj xchapjelali ta mi snaʼa ja jas wana yaljel ja bʼa wa worasyon bʼa yajel tsʼakatali?
17 Meraniʼa, ja jastal waxa waʼa tsʼakatali jelni leka, pe ja jun kristyano mini wanuk tsatsankʼujolajel.
18 Wani xkayi tsʼakatal ja Dyos yujni wala kʼumaniyon mas kʼumalik ke yuja weʼnlexi.
19 Ama jachuk, ja bʼa kongregasyoni masni lek wa xkʼana oj kal joʼe yaljelik bʼa wa xbʼobʼ abʼxuk stojolil bʼa jachuk oj cha bʼobʼ jeyi ja tuki ke yaljel diez mil yaljelik bʼa tuk kʼumal.
20 Kermano jumasaʼ, mok kʼotanik jastal yal untik ja bʼa jastal waxa wabʼyex stojoli. Mas lek, kʼotanik jastal yal untik sbʼaja jastik ti chʼikan soka bʼa jas malo sok kʼotanik jastal matik niwakexa ja bʼa jastal waxa wabʼyex stojoli.
21 Tsʼijbʼunubʼal ja bʼa Leyi: «‹Oj jkʼumuk ja chonabʼ it bʼa skʼumale ja matik ti sbʼaje bʼa pilan país sok oj ka makunuk ja stiʼe ja matik mixa naʼawex sbʼaji, sok ama jachuk mini oja kisonex›, jach wa xyala ja Jyoba».*
22 Ja yuj ja kʼumaliki mi kʼoteluk jun senya sbʼaja kʼuʼumaniki,* jani sbʼaja matik mi kʼuʼumanukeʼi,* jaxa jas wa xyalawe ja alumaniki mini jaʼuk sbʼaja matik mi kʼuʼumanukeʼi, jani sbʼaja kʼuʼumaniki.
23 Ja yujil, ta yibʼanal ja kongregasyon wa stsomo sbʼaj bʼa jun lugar sok yibʼanale wa xkʼumaniye tuk kʼumal pe wa x-ochye kristyanoʼik bʼa mey yiʼoje xchapjele ma mi kʼuʼumanuke,* ¿mi maʼ oj yal-e ke loko ayex?
24 Ta awibʼanalex wanex kʼumanel jastal alumanil pe wa x-ochkʼot june mi kʼuʼumanuk* ma jun kristyano bʼa mey yiʼoj xchapjel, ja yeʼn oj yabʼ wani tojel sok wan paklajel lek yuja jastik wan yabʼjeli.
25 Yuja jastik nakʼan ay ja bʼa skʼujoli oj chijkajuk, ja yeʼn oj koʼ tinan man luʼum sok oj yayi stoyjel jachuk ja Dyosi: «Meran lek, tini aya mokex ja Dyosi».
26 Kermano jumasaʼ, anto, ¿jasa oj kʼulaxuki? Yajni waxa tsomobʼajexi, ja juni wa stsʼebʼani, jaxa juni ay jas wa sjeʼa, jaxa juni wa xyala ja jas akʼubʼal ekʼyi yuja Dyosi, jaxa juni ayiʼoj ja don bʼa kʼumanel tuk kʼumalik sok jaxa juni wa sutu kʼumal. Kʼulanik yibʼanal bʼa stsatsankʼujolajel abʼajex.
27 Sok ta jujuntik wa xkʼumaniye bʼa tuk kʼumal, malanta akʼumanuke chawane ma oxwane sok a-skʼul sbʼaje turnar, sok tʼilani ay maʼ oj sut ja jas wa xyalaweʼi.
28 Pe ta mey sutuman, akanuke chʼabʼan ja bʼa kongregasyon sok a-skʼumuke ja Dyos bʼa skʼujole.
29 Akʼumanuke chawane ma oxwane alumanik sok jaxa tuki a-spaklaye ja jas wa stojolani.
30 Pe ta ay june maʼ kulan ekʼe sok ay jas x-aji ekʼyi yuja Dyosi, ja maʼ wan kʼumal bʼajtani akan chʼabʼan.
31 Yujni awibʼanalex wani xbʼobʼa kʼulabʼajex turnar bʼa oj kʼumananik jastal alumanik, bʼa jachuk awibʼanalex oja nebʼex sok oj stsatsankʼujolukex.
32 Yajni ja alumanik wa xyawe makunuk ja donik bʼa yip ja Dyosi,* tʼilani mok jelxukesok.
33 Ja Dyosi juni Dyos bʼa lamanil sok chapani lek* wa skʼulan ja jastiki.
Jastalni wa x-ekʼ bʼa yibʼanal ja skongregasyone ja matik tsaʼubʼalexa sbʼaja Dyosi,
34 ja ixukeʼi akanuke chʼabʼan ja bʼa kongregasyoniki, yujni mi xbʼobʼ kʼumanuke. Mas lek, aʼajyuke ibʼ kʼabʼal, jastalni wa xyala ja Leyi.
35 Ta ay jas wa skʼana oj snebʼe, a-sjobʼeyi ja statame bʼa snaje, yujni kʼixwela sbʼaj ja oj kʼumanuk jun ixuk ja bʼa kongregasyoni.
36 ¿Yuj ma’ ti el b’a weʼnlex ja yabʼal ja Dyosi? ¿Yuj maʼ kechan weʼn kʼotabʼajex?
37 Ta ay maʼ wa spensaran kʼotel aluman ma ayiʼoj jun don bʼa yip ja Dyosi, tʼilani ayil ke ja jastik wa stsʼijbʼanawilexi jani ja smandarik ja Kajwaltiki.
38 Pe ta ay maʼ mi skisa ja mandar it, ja yeʼn mini oj cha kisjuk.*
39 Ja yuj kala kermano jumasaʼ, moka waʼexkan skʼujolajel bʼa kʼumanel jastal alumanil sok mok timwananik bʼa kʼumanel tuk kʼumalik.
40 Pe kʼulanik yibʼanal bʼa jun modo toj sok chapan lek.*
Notaʼik
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Kʼela ja bʼa Yaljelik cholubʼal, Ja jas jel chaʼanyabʼal wa xjak bʼa Dyosi.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «skʼul traducir».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Kʼela ja bʼa Yaljelik cholubʼal.
^ Ma «kreyenteʼiki».
^ Ma «mi kreyenteʼukeʼi».
^ Ma «mi kreyenteʼuke».
^ Ma «mi kreyenteʼuk».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «mi jokan tasanuk».
^ Ma bʼobʼta «ta ay maʼ mi snaʼa sbʼej, jachni oj ajyuk».
^ Ma «mi jokan tasanuk».
