Muswaangano wacooko wamu 2020 muswaangano uutakalubwi—wakali wakusaanguna kulekkoodwa alimwi wakaliko aintaneti! Nokuba boobo, ku Malawi alimwi aku Mozambique, bunji bwabakwesu abacizyi bakacikonzya kweebelela naa kuswiilila muswaangano wacooko kakunyina kubelesya intaneti. Ino eeci cakakonzyeka buti?

 Kkomiti Yabeendelezi alimwi a Kkomiti Iilanganya Ziyiisyigwa ya Kabunga Keendelezya yakazumizya kuti kubbadelwe ma TV ama radio station kutegwa bakwesu ku Malawi alimwi aku Mozambique bakaweebelele alimwi akuuswiilila muswaangano wacooko. Ino nkaambo nzi ncocakali kweelela kubabikkila bubambe oobu? Akaambo kakuti cisi ca Malawi ncimwi cazisi zijisi intaneti iidula kapati munyika, aboobo Bakamboni basyoonto buyo mbabakonzya kuba aintaneti. Mukwesu William Chumbi, wamu Kkomiti ya Mutabi waku Malawi wakaamba kuti: “Nzila ilikke bakwesu abacizyi njobakali kukonzya kutambula cakulya cakumuuya eeci nkwiinda mukweebelela a TV naa kuswiilila awailesi.” Mukwesu Luka Sibeko awalo wamu Kkomiti ya Mutabi waku Malawi wakayungizya kuti: “Nokwakali kuti bubambe oobu tiibwakaliko, bakwesu banji nobatakacikonzya kuweebelela naa kuuswiilila muswaangano wacooko.” Amwalo mucisi ca Mozambique, mbasyoonto bakwesu bakali kukonzya kujana intaneti alimwi buya, tabajisi azibelesyo.

 Akaambo kabulwazi bwa COVID-19, ma TV ama radio station aambi akali kumwaya kale miswaangano yambungano. a Bakwesu bakaunka kuma station aaya akulomba kuti babayungizyile ciindi kutegwa kabamwaya amuswaangano wacooko.

 Kucisi ca Malawi, bakwesu bakajana buyumuyumu. Bunji bwaziindi, ma station azumina buyo kumwaya mapulogilamu kwawoola lyomwe. Balalibilika kuti baswiilizi inga baleka kubikkila maano kuti pulogilamu yaindilila awoola lyomwe.Pele bakwesu bakapandulula kuti mulimo wesu ugwasyilizya banamaleya. Nokuba kuti tulijalilidwe, tulabapa makani mabotu aawumbulizya aazwa mu Bbaibbele, alo aakonzya kubagwasya kuba balelwa babotu akuba amikwasyi iikkomene. Nobakamvwa boobo, balaayo ma station bakakuzumina kulomba kwabakwesu.

 Ku Malawi, muswaangano wakamwaigwa a TV station yomwe alimwi aa radio station yomwe, alo aamwaya makani cisi coonse. Aboobo, eeci cakapa kuti mamiliyoni aabantu acikonzye kweebelela alimwi akuswiilila. Kumane ku Mozambique, muswaangano wakamwaigwa a TV station yomwe alimwi aama radio station aali 85.

 Muzisi zyoonse zyobilo, kwakabelesyegwa mali aasika ku $28,227 b kubbadela ma TV station alimwi amali aatandila ku $20,000 kubbadela ma radio station. Myuulo yama radio station yakali kwiindana nkokuti kutalikila a $15 kuma station masyoonto, kusikila ku $2,777 kuma station aamwaya makani cisi coonse.

 Bakwesu bakabeleka canguzu kutegwa baabelesye kabotu mali aasangwa. Mucikozyanyo ku Malawi, bakakombelezya kuti babajolele myuulo aboobo bakazwidilila cakuti mane kumbi bakabagusyila 30 pesenti. Mali ngobakabagusyila akasika ku $1,711. Mpoonya ku Mozambique, kuma station aamwi bakazumina kutugusyila muulo akaambo kampuwo yesu mbotu alimwi akufwambaana kubbadela.

 Bakwesu bakakkomana kapati kweebelela naa kuswiilila muswaangano wacooko. Ba Patrick, mwaalu ku Malawi, bakaamba kuti: “Tulabalumba kapati bakwesu bamu Kabunga Keendelezya kuzintu zyoonse eezyi nzyobatucitila muciindi eeci cabulwazi.” Ba Isaac, abalo baku Malawi bakaamba kuti: “Tatujisi zibelesyo izyakubelesya, aboobo twalumba kapati kucoolwe eeci ncotwakatambula kuzwa kumbunga ya Jehova cakuswiilila muswaangano wacooko awailesi. Akaambo kaceeci, mukwasyi wangu woonse wakauswiilila muswaangano. Eeci twakacibona kuti ncitondezyo caluyando ndwajisi Jehova kubantu bakwe.”

 Muswaangano wacooko wamu 2020 ngowakali wakusaanguna ngwaakajanika sikumwaya umwi waku Mozambique. Wakaamba kuti: “Bubambe bwakweebelela muswaangano a TV bwakandiyeezya kuti Jehova ngu Leza singuzuzyoonse. Bulwazi buliko tiibwakamukasya Jehova kutupa cakulya cakumuuya alimwi buya wakatuletela muŋanda. Ndakalubona luyando luli akati kabantu ba Jehova. Alimwi ndilisinizyide kuti oobu mbobukombi bwakasimpe.”

 Mwaalu uumwi wazina lyakuti Wyson, wakaamba kuti: “Ndilamulumba kapati muzike uusyomeka kujatikizya mbwaatubikkila maano muciindi ecino cabulwazi. Bubambe oobu bwakweebelela muswaangano a TV alimwi akuuswiilila awailesi bwatugwasya swebo notujisi penzi lyamali kujanika akugwasyigwa apulogilamu eeyi yakumuuya.”

 Kujatikizya muswaangano wacooko wamu 2021, bamu Kkomiti Yabeendelezi abamu Kkomiti Iilanganya Ziyiisyigwa alimwi babikka bubambe bwakuti bantu bali mumasena aamwi bakaweebelele a TV naa kuuswiilila awailesi. Ino nkuli nkotwaajana mali aakubbadelela bubambe oobu? Nkwiinda muzyakusanga zyamulimo wanyika yoonse, zyalo zicitwa kubelesya nzila ziindene-indene zili a donate.jw.org. Tulamulumba kapati akaambo kazyakusanga zyanu zizwa ansi aamoyo.