Zyakusanga zilabeleka mukugwasyilizya milimo yabukombi akupa lugwasyo lwakumubili mumbunga yesu. Tulaicita milimo yoonse eeyi nkaambo igwasyilizya kuzuzikizya mbaakani yesu yakugwasya bantu kuba basikwiiya ba Kristo Jesu.​—Matayo 28:19, 20.

 Kunyina notubelesya zyakusanga kuvwubya muntu uuli woonse. Tatubbadeli baalu naa bakambausi bali boonse alimwi Bakamboni ba Jehova tababbadelwi kuti kabaunka kuŋanda aŋanda. Aabo ibabelekela mumitabi alimwi akumaofesi eesu mapati kubikkilizya abaabo ibapanga Kabunga Keendelezya, mbantu ibazulilwa mumbunga yabukombi ibatavwoli mali.

•   Zimwaigwa: Tulasandulula, kupulinta, kunyamuna, alimwi akumwaya mamiliyoni aama Bbaibbele kubikkilizya amabbuku aa Bunakristo mwaka amwaka, kakunyina kubbadelesya. Aalo awebbusaiti ya jw.org alimwi aa JW Library app kulajanika mabbuku aatabbadelelwi alimwi takwaambilizyigwi makwebo aali woonse.

•   Kuyaka Akubambulula Mayake: Tulayaka alimwi akulanganya masena aataduli kapati aakukombela nyika yoonse kutegwa mbungano zisiyene-siyene kazyiba amasena aali kabotu aakuswaanganina akutembaula Leza. Tulacita mbubwenya akumaofesi aamitabi alimwi amaofesi aabasanduluzi. Bunji bwamilimo eeyi icitwa abasikulisungula, calo icigwasya kucesya mali aabelesyegwa..

•   Milimo Iicitwa Ambunga: Milimo iicitwa kumaofesi eesu mapati, mumaofesi aamitabi alimwi amumaofesi aabasanduluzi kubikkilizya amilimo iicitwa ababelesi beendeenda, ilagwasyilizyigwa amali aasangilwa mulimo wanyika yoonse.

•   Kukambauka: Bakamboni tababbadelwi kuti bakambaukile bantu makani mabotu naa kuyiisya bamwi ‘jwi lya Leza.’ (2 Bakorinto 2:17) Nokuba boobo, mbubonya mbocakabede aku Banakristo bamumwaanda wamyaka wakusaanguna, bakambausi ibasalidwe akuyiisyigwa ibaaba bunji bwaciindi cabo mumulimo wabukambausi balagwasyilizyigwa kujana zintu ziyandika mubuumi alimwi akwakukkala.​—Bafilipi 4:16, 17; 1 Timoteyo 5:17-18

•   Kuyiisya: Mali aabelesyegwa mumiswaangano yesu yabbazu alimwi ayacooko ajanwa kwiinda mukusanga. Kuyungizya waawo, tulapanga mavidiyo azyakuswiilila zyakalekkoodwa ziyeeme a Bbaibbele. Alimwi tulaba azikolo zigwasya baalu abakambausi baciindi coonse kuzwidilila mumilimo yabo.

•   Kugwasya Ciindi Nokwacitika Ntenda: Tulapa zyakulya, maanzi alimwi akubayakila maanda aabo ibajatikizyigwa antenda zilicitikila azyeezyo ziletwa abantu. Lugwasyo oolu lulapegwa kutali buyo kuli “baciinga cesu calusyomo” pele abaabo ibatali Bakamboni.​—Bagalatiya 6:10.