Sena Muciyeeyede?

Sena cakamukkomanisya kubala mamagazini aa Ngazi Yamulindizi aalino-lino? Amubone naa inga mwayiingula mibuzyo eeyi iitobela:

Mbuti mbotukonzya kuuzima mulilo wakwaambaula cakutalijata?

Tweelede kulingula moyo wesu. Muciindi cakutongooka bakwesu, tweelede kulilingula kutegwa tuzyibe ncotubayeeyela boobo. Andiza tulabatongooka bamwi kutegwa tutondezye kuti tulabainda. Masimpe ngakuti, kutongooka bamwi kupa kuti penzi liindile.—8/15, peeji 21.

Mbuti Leza mbwalekelela akuluba zibi zyabantu beempwa?

Kulibaabo mbayanda Jehova waamba kuti: “Zibi zyabo nsikoozooziibalukwa limbi.” (Jer. 31:34) Ulakonzya kulekelela zibi kwiinda mucinunuzyo. Ciindi nacita oobo, Leza ulaluba mukuti takaziyeeyi zibi eezyo kutegwa atusubule alimwi.—10/1, peeji 32.

Nzyintu nzi zilangilwa kucitika buzuba bwa Jehova kabutanasika?

Kwaambilizyigwa kwa “Luumuno akuliiba.” Bamasi bayakumulwana akumunyonyoona Babuloni Mupati. Bantu ba Leza bayakulwanwa. Nkondo ya Amagedoni iyakutalika, kumane Saatani amadaimona aakwe bayakubikkwa mumulindi uutagoli.—9/15, peeji 4.

Ino kutazyiba ciindi mamanino naayakusika kutugwasya buti?

Kutazyiba ciindi mamanino naayakusika kutugwasya kuyubununa zili mumoyo wesu. Kutupa coolwe cakukkomanisya Leza. Kutukulwaizya kupona buumi bwakulyaaba alimwi kutugwasya kusyoma kapati muli Leza a Jwi lyakwe. Kuyungizya waawo, mapenzi aatusikila lino atupa kucinca bube bwesu.—9/15, mapeeji 24-25.

Ino Leza uyakuzibambulula buti zyintu ziboola akaambo kakupenga kwabantu?

Ino-ino Leza uyakuleta nyika mpya iiluleme mwalo balikke aabo balisalila kutondezya luyando kuli umwi aumwi alimwi akuli Leza mbabayakuzumizyigwa kukkala mulinjiyo. (2 Pe. 3:13) Kali mwami wakujulu, Jesu uyakuzibambulula zyintu. (Is. 33:24; Ciy. 21:4)—10/1, peeji 7.

Mbaani ibaimininwa “[a]nyenyezi zili ciloba” izili mujanza lyakululyo lya Jesu ibaambidwe mulugwalo lwa Ciyubunuzyo 1:16, 20?

“Nyenyeezi” ziiminina balangizi bananike alimwi zilaiminina abalangizi boonse mumbungano.—10/15, peeji 14.

Ino ninjiisyo nzi zyamu Bbaibbele izitugwasya kuzyiba mbwayeeya Leza kujatikizya tombwe?

Leza uyanda kuti katubulemeka buumi. (Dt. 5:17) Ulangila kuti katumuyanda alimwi katubayanda basimukoboma. (Mk. 12:28-31) Uyanda kuti katwiitantamuka micito iitali kabotu. (2 Ko. 7:1)—10/1, peeji 15.

Mbuti Jesu mbwaakatondezya kulicesya kweelana alugwalo lwa Isaya 50:4, 5?

Mutupango ootu waambwa kuti wakapegwa “lulimi lwabaiyide” alimwi ‘tanaakali kukaka nikuba kupiluka musule.’ Jesu wakatondezya muuya wakulicesya alimwi wakali kubikkila maano kuzyintu nzyaakali kwiiya kuzwa kuli Bausyi. Jesu wakali kuyandisisya alimwi akulisungula kwiiya kuzwa kuli Jehova, wakali kulangisisya cikozyanyo ca Leza cakulicesya mukutondezya luse kubantu basizibi.—11/15, peeji 11.

Mbuti mbotugwasyigwa kwiinda mukutondezya lubomba?

Kwiinda mukuba alubomba kubantuma, tulamuzyiba kabotu Leza alimwi cilatukkomanisya. (1 Jo. 4:7; Mt. 5:7, 8) Kutondezya bamwi lubomba kulayandika kumeso aa Jehova. (Tus. 19:17)—10/1, peeji 20.