Mibuzyo Yabasikubala

Jesu wakali kwaambila bakali kumuswiilila: “Mweelede kulondoka mbuli Uso[wanu] wakujulu mbwalondokede.” Ino bantu mazuba aano mbuti mbobakonzya ‘kulondoka’?—Mt. 5:48.

Kutegwa tujane bwiinguzi kumubuzyo ooyu tweelede kuzyiba bbala lya “kulondoka” mbolibelesyegwa mu Bbaibbele. Tazili zyoonse zyintu nzyaambwa mu Magwalo kuti ‘zililondokede’ cakumanina. Pele Jehova alikke ngulondokede cakumanina. Bantu tabalondokede mbuli Jehova. Ibbala lisanduludwe mu Bbaibbele lya Chihebrayo a Chigiliki lyaamba “kulondoka” kanji-kanji lipandulula “kumaninina,” “kusima,” naa “kubula kampenda” kweelena amulawo ngobakapegwa. Mukwaambaula kwabuzuba-abuzuba ibbala eeli talibelesyegwi munzila eeyi.

Ba Adamu a Eva bakali londokede. Bakali londokede kweelana azyeelelo nzyakabikide Wakabalenga. Akaambo kakuti bakalubizya bakaleka kusika aazyeelelo eezyo aboobo bakaleka kulondoka alimwi bakabatambukizya abana babo. Aboobo kwiinda muli Adamu icibi, kutalondoka alufwu zyakabasikila bantu.—Lom. 5:12.

Nokuba boobo, kweelana ambwaakaamba Jesu mu Mulumbe waa Cilundu, nobaba bantu batalondokede balakonzya kulondoka pele ikutali cakumaniina. Mumakani aaya wakatondezya luyando lwini-lwini mbolweelede kuba. Oolu ndoluyando ndwabatondezya bantu Leza. Jesu wakaamba kuti: “Amuzumanane kuyanda basinkondonyoko akubapailila aabo bamupenzya, ikutegwa musinizye kuti muli bana ba Uso uuli kujulu, nkaambo ulapasuzya zuba lyakwe kubantu babi ababotu alimwi ulapa mvwula kubantu baluleme abataluleme.” (Mt. 5:44, 45) Kwiinda mukutondezya luyando luli boobu, basikwiiya ba Jesu balakonzya kumwiiya kabotu Leza.

Mazuba aano, Bakamboni ba Jehova nyika yoonse balasoleka kulutondezya luyando luli boobu kubantu bamwi. Bayanda kugwasya bantu bamisyobo yoonse, azikombelo ziindene-indene kutegwa bajane luzyibo lwini-lwini lwakasimpe kamu Bbaibbele. Mu zisi zili 236, Bakamboni baleendelezya ziiyo zya Bbaibbele ziinda ku 7,000,000.

Jesu wakabuzya kuti: “Nkaambo ikuti kamuyanda baabo ibamuyanda, ino mbulumbu nzi mbomujana? Sena basimutelo abalo tabusyi mbobacita oobo? Alimwi ikuti kamwaanzya buyo ibanyoko, ncinzi ncomucita kwiinda bamwi? Sena bantu bamasi abalo tabusyi mbobacita oobo?” (Mt. 5:46, 47) Banakristo bakasimpe tabayandi buyo baabo bayiide naa bamisyobo imbi; naa ikuyanda buyo baabo bakonzya kubapa zyintu. Muciindi caboobo, balabagwasya bapengede, baciswa, bana abacembeede. Munzila iili boobo, Banakristo balakonzya kwiiya Jehova mbwabayanda bantu akuba mbuli nguwe munzila iimwi.

Sena kuli notuyakulondoka cakumaninina mbuli Adamu mbwaakabede? Inzya kwiinda mukusyoma mucinunuzyo cacituuzyo ca Jesu, bantu basyomeka bayakulondoka muciindi ca Bweendelezi bwa Kristo bwa Myaka iili Cuulu, ciindi ‘Mwana wa Leza aakunyonyoona milimo ya Diabolosi.’—1 Jo. 3:8.