Sena Muciyeeyede?

Sena cakamukkomanisya kubala mamagazini aa Ngazi Yamulindizi aalino-lino? Amubone naa inga mwayiingula mibuzyo eeyi iitobela:

• Ino nkaambo nzi Mesiya ncaakafwida?

Ilufwu lwa Jesu lwakatondezya kuti muntu uulondekede ulakonzya kuzumanana kubelekela Leza nokuba kuti wasunkwa buti. Alimwi wakafwutula bantu kucibi ncobakakona kuli Adamu alimwi cakapa kuti bakonzye kuba abuumi butamani.—12/15, mapeeji 22-23.

• Ino ncinzi cikonzya kumugwasya muntu kuti atanikunywi kapati bukoko?

Kupaila akwiiya Bbaibbele kulakonzya kugwasya. Ikulilesya, kucita ncimwasala alimwi akuba abeenzinyoko bali kabotu cilakonzya kumugwasya. Muntu wasala kunywa bukoko weelede kubona kuti mbukoko bunji buti mbwayelede kunywa alimwi weelede kwaamba kuti ndakkwana.—4/1, mapeeji 7-9.

• Ino kubandika kabotu abana kubikkilizya nzi?

Ikubandika kabotu tacaambi buyo kwaambaula ambabo, pele kubikkilizya kubuzya mibuzyo akuswiilila nobaingula. Ibanji bajana kuti ciindi cakulya nceciindi cibotu cakubandika.—1/15, mapeeji 18-19.

• Ino mbuti Jehova mbwakonzya kweempwa kaali ulilondokede?

Zimwi ziindi Leza ulacinca kweelana abantu mbobalilemeka. Mucikozyanyo iziindi zili mbozibede, bana Israyeli bansiku bakamuzangila Jehova akutobela baleza bambi. Amane Jehova wakaleka kubakwabilila. Nokuba boobo, bantu aaba nibakalilekelela kuli Leza, wakacinca mbwaakali kubayeeyela, naa ‘kweempwa.’ (Bab. 2:18)—2/1, peeji 21.

• Ino ncinzi cikonzya kupa kuti muntu abbapatizyigwe alimwi?

Imuntu ulakonzya kucita oobo ikuti naa ciindi naakali kubbapatizyigwa wakali kucita cintu cimwi ncaakali kusisikizya calo cakali kukonzya kupa kuti agusyigwe mumbungano ikuti naakali bbapatizyidwe kale.—2/15, peeji 22.

• Ino ntwaambo nzi totatwe bantu ntobaamba kuti ncicibapa kubba?

Bamwi baamba kuti balabba akaambo kabucete. Ibamwi baamba kuti, “Boonse Balacicita.” Alimwi bamwi babweza zyintu zitali zyabo baamba kuti, “wacijana nkuciyobola.” Ibbaibbele talizumizyi kucita oobu.—4/1, mapeeji 12-14.

• Mucikozyanyo ca Jesu camaila ansaku, ino kusyanga mbuto mbotu kwiiminina nzi?

Jesu imwanaamuntu, wakabamba muunda naakacili anyika. Kuzwa mu Pentekoste 33 C.E., imbuto mbotu yakasyangwa ciindi Banakristo nobakananikwa kuba bana ba Leza, ibana ba Bwami.—3/15, peeji 20.

• Ino mbuti maila aacikozyanyo ngaakaamba Jesu mbwaaletwa muŋanda mwaayoboda maila Jehova? (Mt. 13:30)

Ikuzuzikizigwa kwazumanana kucitwa kwaciindi cili mbocibede kumamanino aaciindi cino. Ibananike bana ba Bwami naa maila aacikozyanyo, balaletwa muŋanda mwayoboda maila Jehova ciindi nobaboola mumbungano ya Banakristo naa nobapegwa bulumbu bwakujulu.—3/15, peeji 22.