Sena Mulicizi Kubandika Kabotu?

“LUGWALO Lwakalembwa Amuntu Wamyaka Yakuzyalwa Iili 60 Kulembela Muntu Ngwayanda.” Ooyo wakali mutwe wamuzundano wakabambwa abbanga lyaku Japan myaka misyoonto yainda. Wakali kukulwaizya bana Japan ibakajisi myaka yakuzyalwa iili kuma 50 a 60 kwaamba “mbobalimvwa kuzwa aansi amoyo” kujatikizya mbobakwetene limwi. Umwi iwakatola lubazu mumuzundano wakalembela mukaintu wakwe kuti: “Ambweni eeci cilakonzya kukusesya, pele ndeelede kukwaambila nkaambo ndatacita boobo tacikandikkomanisyi pe: Lino andikwaambile kuti ndili acoolwe ikuba amukaintu mbuli ndiwe.”

Muziinga zimwi kubikkilizya azyeezyo zili kumasi aakujwe, ikwaamba cili kumoyo takukulwaizyigwi pe. Nokuba boobo, bantu bainda ku 15,000 bakatola lubazu mumuzundano ooyu. Muzundano ooyu wakaduma kapati cakunga kwakabambwa aumwi alimwi eeci cakapa kuti kulembwe mabbuku ayeeme amagwalo aakali kulembelwa kumuzundano ooyu. Eeci citondezya kuti ibanji balayanda kwaamba bwini mbobalimvwa kujatikizya muyandwa wabo ngobakwetene limwi. Pele ibamwi tabayandi kucita oobo. Nkaambo nzi? Kuboneka kuti cili boobo akaambo kakuti bayandika kusoleka canguzu alimwi akuba aluzibo kutegwa baambile bamwi—mbuli mbobakwetene limwi—kuti bazibe icili kumoyo.

Mulembi wabbuku lyaamba zyakuleka mulimo wazina lya Hitoshi Kato waamba kuti akati kabanabukwetene bapati-pati mu Japan, kanji-kanji bamakaintu mbabayanda kuti balekane akaambo kakucimwa nkobabikkilila kwamyaka minji. Waamba kuti: “Pele alimwi icipa kucita boobo ncakuti banabukwetene kunyina nobabandika mapenzi ngobajisi.”

Mbwalekela buyo mulimo, mulumi inga wagambwa nkwamvwa mukaintu wakwe namwaambila kuti uyanda kumuleka. Ambweni  kwamyaka minji banabukwetene tiibali kubandika mbobalimvwa kujatikizya mbobakwetene limwi. Ndiza mulumi amukaintu bali kusoleka kwaamba cili kumoyo pele balikwaalilwa kuba amubandi uuyaka. Muciindi cakuyumya cilongwe cabo, bajanika kuti lyoonse balikuzwangana.

Ino mbuti mulumi amukaintu mbobakonzya kubandika kabotu zintu zibapa kwiimpana alimwi akwaamba cili kumoyo kabotu-kabotu? Cilamukkomanisya kuziba kuti lulayo lugwasya kapati lulajanwa kutali mubbuku lyakalembwa ino-ino asikupa lulayo mulukwatano, pele mubbuku lyakaindi lyali kuyandwa—Ibbaibbele.