1-2. Ncinzi cikonzya kupa kuti bukombi bwesu butambulike kuli Leza?

 NCINZI ciboola mumizeezo yanu ciindi nomumvwa bbala lyakuti “kukomba”? Ambweni muyeeya mwaalumi uulicesya uufwugeme akupaila kuli Jehova kuzwa ansi aamoyo. Naa ambweni muyeeya mukwasyi uukkomene iwiiya Bbaibbele cakusitikila.

² Mubukkale boonse oobu, boonse balakomba. Sena Jehova ulabutambula bukombi bwabo? Ulabutambula kuti kabweendelana amakanze aakwe alimwi akuti bwacitwa caluyando abulemu. Tulamuyanda kapati Jehova. Tulizyi kuti uleelela kukombwa, alimwi tuyanda kuti katucita oobo munzila iinda kubota.

3. Ncinzi ncotutiibandike mucibalo eeci?

³ Mucibalo eeci, tulabandika kujatikizya bukombi Jehova mbwaakali kutambula kaindi, alimwi tulabona azibeela zili lusele zyabukombi mbwatambula mazuba aano. Ciindi notucita boobo, tulabona swebo kutugama mbotukonzya kusumpula bukombi bwesu. Alimwi tulabona bukombi bwakasimpe mbobukonzya kutupa kukkomana.

4. Ino bakombi ba Jehova bakaindi bakatondezya buti bulemu alimwi aluyando kuli Jehova?

⁴ Baalumi basyomeka mbuli Abelo, Nowa, Abrahamu alimwi a Jobu bakatondezya bulemu alimwi aluyando kuli Jehova. Mubuti? Kwiinda mukumumvwida, kusyomeka kulinguwe alimwi akupa zituuzyo. Bbaibbele talitwaambili cacigaminina bwini mbobakali kumukomba Leza. Pele bakabeleka canguzu  kutegwa bamulemeke alimwi bukombi bwabo bwakali kutambulika kulinguwe. Mpoonya Jehova wakapa baluzubo lwa Abrahamu Mulawo wa Musa. Mulawo ooyo, wakali kubikkilizya amalailile aagaminide kujatikizya mbobakeelede kukomba Jehova munzila njakkomanina.

5. Nkucinca kuli buti ikwakacitwa kujatikizya bukombi bwakasimpe naakamana kufwa alimwi akubusyigwa Jesu?

⁵ Naakafwa alimwi akubusyigwa Jesu, Jehova tanaakacili kuyanda kuti bantu kabatobela Mulawo wa Musa. (Rom. 10:4) Aboobo Banakristo bakeelede kutobela mulawo mupya, nkokuti “mulawo wa Kristo.” (Gal. 6:2) Bakali kukonzya kuutobela “mulawo” ooyo ikutali kwiinda mukuupeta buya naa kutobela mulongo wazintu nzyobakeelede kucita naa kutacita, pele kwiinda mukwiiya cikozyanyo ca Jesu alimwi akutobela njiisyo zyakwe. Mbubwenya buyo amazuba aano, Banakristo balasolekesya kusikila mpobagolela kutobela Kristo kutegwa bamukkomanisye Jehova alimwi ‘akukatalusyigwa.’—Mt. 11:29.

6. Ino cibalo eeci cilatugwasya buti?

⁶ Notulanga-langa cibeela cimwi acimwi cabukombi bwesu, amulibuzye kuti, ‘Nkuyaambele kuli buti nkondacita mumakani aaya?’ Alimwi mulakonzya kulibuzya kuti, ‘Mbuti mbondikonzya kuyaambele mubukombi bwangu?’ Mweelede kukkomana kujatikizya kuyaambele nkomwacita, pele mulakonzya kupaila kutegwa mubone mbazu zimbi momukonzya kuyaambele.

7. Mbuti Jehova mbwaibona mipailo yesu iizwa ansi aamoyo?

⁷ Tulamukomba Jehova ciindi notupaila kulinguwe. Magwalo akozyanisya mipailo yesu kutununkilizyo tubambidwe kabotu itwakali kupegwa kutente lyakubunganina, mpoonya kumbele, kutempele. (Int. 141:2) Tununkilizyo ooto twakali kupa bweema bubotu ibwakali kumukkomanisya Leza. Mbubwenya buyo, mipailo yesu iizwa ansi aamoyo ‘ilamubotela’ Leza, nokuba kuti twabelesya mabala mauba-uba. (Tus. 15:8; Dt. 33:10) Tulijisi kaambo kabotu ikeelede kutupa kusyoma kuti cilamukkomanisya Jehova kutumvwa katwaamba mbotumuyanda alimwi akumulumba. Uyanda kuti katumwaambila nzyotulibilika alimwi anzyotulombozya. Aboobo katutanapaila kuli Jehova, mbuti kuti twasaanguna kuyeeya nzyotuyanda kwaamba? Kwiinda mukucita boobo, tuyoopa ‘tununkilizyo’ twiinda kubota kuli Taateesu wakujulu.

8. Ncoolwe nzi cibotu ncotujisi cakutembaula Leza?

⁸ Tulamukomba Jehova ciindi notumutembaula. (Int. 34:1) Tulamutembaula Jehova kwiinda mukwaambila bamwi bube bwakwe bubotu alimwi amilimo yakwe. Moyo uulumba ulakonzya kumutembaula Jehova. Ciindi notuzinzibala kuyeeya zintu zibotu zyoonse nzyaakatucitila Jehova, tunoojisi twaambo tunji itweelede kutupa kumutembaula. Mulimo wakukambauka utupa coolwe cilibedelede cakutuulilila Leza cipaizyo cantembauzyo, nkokuti “micelo yamilomo yesu.” (Heb. 13:15) Mbubwenya mbotweelede kuyeeya nzyotuyanda kwaamba katutanapaila kuli Jehova, inga twacita kabotu kuyeeya nzyotuyanda kwaamba kuli baabo mbotukambaukila. Tuyanda kupa “cipaizyo cantembauzyo” iciinda kubota. Aboobo tulaamba kuzwa ansi aamoyo, ciindi notukambaukila bamwi kasimpe.

9. Mbubwenya mbuli bana Israyeli bansiku, amwaambe miswaangano mboimugwasya nywebo kumugama?

⁹ Tulamukomba Jehova ciindi notujanika kumiswaangano. Bana Israyeli bansiku  bakaambilwa kuti: “Ziindi zyotatwe mumwaka, baalumi boonse bali akati kanu beelede kulibonya kubusyu bwa Jehova Leza wanu mubusena oobo mbwayoosala.” (Dt. 16:16) Bakeelede kusiya minzi yabo alimwi azisyango kakunyina uuzilanganya. Pele Jehova wakabasyomezya kuti: “Kunyina uyoonyomenena nyika yanu mwanakuunka kuyoolibonya kuli Jehova Leza wanu.” (Kul. 34:24) Akaambo kakuti bakali kumusyoma cakumaninina Jehova, bana Israyeli aaba bakali kuunka kumapobwe mwaka amwaka. Kwiinda mukucita boobo, bakali kugwasyigwa munzila zinji. Mucikozyanyo, bakali kwiiya zinji kujatikizya Mulawo wa Leza, kuzinzibala kuyeeya bubotu bwakwe alimwi akukkomana kuyanzana abasyominyina. (Dt. 16:15) Mbubwenya buyo, andiswe tulagwasyigwa ciindi notulyaaba kujanika kumiswaangano ya Bunakristo. Alimwi amuyeeye buyo Jehova mbwakkomana ciindi notupa bwiinguzi bufwaafwi, ibwakalibambilwa kabotu.

10. Mbuti kwiimba mbocili cibeela ciyandika kapati cabukombi bwesu?

¹⁰ Tulamukomba Jehova ciindi notwiimba. (Int. 28:7) Bana Israyeli kwiimba bakali kukubona kuba cibeela ciyandika kapati cabukombi bwabo. Mwami Davida wakasala ba Levi ibali 288 kuti kabaimba kutempele. (1Mak. 25:1, 6-8) Mazuba aano, tulatondezya luyando lwesu kuli Leza ciindi notwiimba nyimbo zyantembauzyo. Mbotwiimba tacili ncecintu ciyandika kapati. Amubone kaambo aaka: Ciindi notwaambaula, “toonse tulalubizya ziindi zinji,” pele eeco tacitupi kuleka kwaambaula mumbungano alimwi amumulimo wakukambauka. (Jak. 3:2) Mbubwenya buyo, tulakonzya kwiimba nyimbo zyantembauzyo kuli Jehova, nokuba kuti tulimvwa kuti tatwiimbi kabotu.

11. Kweelana a Intembauzyo 48:13, nkaambo nzi ncotweelede kujana ciindi cakwiiya Bbaibbele antoomwe amukwasyi?

¹¹ Tulamukomba Jehova ciindi notwiiya Jwi lyakwe alimwi akuyiisya bana besu kujatikizya nguwe. Mubuzuba bwa Sabata, bana Israyeli tiibakali kubeleka mulimo uuli woonse kutegwa babikkile maano kucilongwe cabo a Jehova. (Kul. 31:16, 17) Aabo ibakali kusyomeka, bakali kubayiisya bana babo kujatikizya Jehova alimwi abubotu bwakwe. Andiswe mazuba aano, tweelede kujana ciindi cakubala alimwi akwiiya Jwi lya Leza. Eeci ncibeela cabukombi bwesu kuli Jehova, alimwi citugwasya kuyumya cilongwe cesu anguwe. (Int. 73:28) Alimwi ciindi notwiiya antoomwe amukwasyi, tugwasya bana besu kuyumya cilongwe cabo a Taateesu wakujulu siluyando.—Amubale Intembauzyo 48:13.

12. Ncinzi ncotwiiya kujatikizya Jehova mbwaakaubona mulimo wabaabo ibakali kupanga zibelesyo zyamutente lyakubunganina?

¹² Tulamukomba Jehova ciindi notuyaka alimwi akuyakulula masena eesu aakukombela. Bbaibbele lyaamba mulimo wakupanga tente lyakubunganina alimwi azibelesyo zyamumo kuti “mulimo uusetekene.” (Kul. 36:1, 4) Mbubwenya buyo amazuba aano, mulimo wakuyaka Maanda aa Bwami alimwi amasena aambi aakukombela, Jehova uubona kuti ulisetekene. Bakwesu abacizyi bamwi balabeleka mawoola manji mumilimo eeyi. Eelo kaka tulabalumba kapati akaambo kakulyaaba ooku mumulimo wa Bwami! Alimwi bakwesu abacizyi aaba, balatola lubazu mumulimo wakukambauka. Mane buya bamwi balayanda akucita bupainiya. Baalu bambungano balakonzya kutondezya kuti balaibikkila maano milimo yamayake eeyi, kwiinda mukutawaya-waya kusala bakwesu abacizyi aaba ibabeleka canguzu kuba bapainiya  ikuti kabeelela. Tacikwe makani tulijisi luzyibo mumulimo wakuyaka naa pe, toonse tulakonzya kutola lubazu mukwaabamba kabotu mayake eesu.

13. Mbuti mbotweelede kuzibona zyakusanga nzyotupa kugwasyilizya mulimo wa Bwami?

¹³ Tulamukomba Jehova ciindi notugwasyilizya mulimo wa Bwami kwiinda mukusanga. Bana Israyeli tiibakeelede kulibonya kubusyu bwa Jehova cinkwamaanza. (Dt. 16:16) Bakeelede kutola cipego kweelana abukkale bwabo. Kwiinda mucita boobo, bakali kutondezya kulumba kuzintu zyakumuuya zyoonse nzyaakali kubacitila Jehova. Mbuti mbotukonzya kutondezya luyando kuli Jehova alimwi akulumba kuzintu zyakumuuya nzyatupa? Nzila imwi, nkwiinda mukusanga mumbungano motuzulilwa alimwi akumulimo wanyika yoonse kweelana abukkale bwesu. Mwaapostolo Paulo wakaamba kuti: “Ikuti kusaanguna muntu kalibambilide, eeco ncapa cilatambulika ikapati kuti wacipa kweelana anzyajisi ikutali kweelana anzyatajisi.” (2Kor. 8:4, 12) Jehova ulacikkomanina cakusanga cesu cili coonse cizwa ansi aamoyo, tacikwe makani naa ncisyoonto.—Mk. 12:42-44; 2Kor. 9:7.

14. Kweelana a Tusimpi 19:17, ino Jehova ulubona buti lugwasyo ndotupa bakwesu abacizyi babulide?

¹⁴ Tulamukomba Jehova ciindi notugwasya Banakristoma ibabulide. Jehova wakasyomezya kubalumbula bana Israyeli ibakali kugwasya bacete. (Dt. 15:7, 10) Aboobo ciindi lyoonse notugwasya bakombima ibabulide, Jehova ucibona kuti ncipego kulinguwe. (Amubale Tusimpi 19:17.) Mucikozyanyo, ciindi Banakristo baku Filipi nobakatuma zipego kumwaange Paulo, wakazyaamba kuti ‘ncipaizyo cizuminwa, alimwi cimukkomanisya Leza.’ (Flp. 4:18) Amulange-lange mumbungano akulibuzya kuti, ‘Sena kuli muntu umwi ngondikonzya kugwasya?’ Jehova ulakkomana ciindi notubelesya ciindi cesu, nguzu, luzyibo alimwi zintu zyakumubili kugwasya baabo babulide. Kucita boobu ukubona kuti ncibeela cabukombi bwesu.—Jak. 1:27.

15. Nokuba kuti bukombi bwakasimpe buyandika kubeleka canguzu alimwi aciindi, nkaambo nzi ncobutaminyi?

¹⁵ Bukombi bwakasimpe buyandika ciindi alimwi akubeleka canguzu. Pele tabuminyi pe. (1Joh. 5:3) Nkaambo nzi? Kayi tulamukomba Jehova akaambo kakuti tulamuyanda. Amweezyeezye mwana musyoonto uuyanda kupa bausyi cintu cimwi. Ulakonzya kubelesya mawoola manji kubadulowiŋila cifwanikiso. Mwana kunyina nausa akaambo kaciindi eeco. Kayi ulabayanda bausyi, alimwi ulikkomene kubapa cipego eeco. Mbubwenya buyo, akaambo kakuti tulamuyanda Jehova, tulakkomana kubelesya ciindi cesu alimwi anguzu kumukomba.

16. Kweelana a Bahebrayo 6:10, ino Jehova ulimvwa buti kukusolekesya nkotucita kutegwa tumukkomanisye?

¹⁶ Bazyali basiluyando tabalangili kutambula zipego zikozyenye kumwana umwi aumwi. Balizyi kuti mwana umwi aumwi uliindene alimwi abukkale bwakwe buliindene. Mbubwenya buyo, Taateesu wakujulu, ulabumvwisya bukkale bwesu bwiindene-indene. Ambweni mulakonzya kucita zinji kwiinda bantu banji mbomuzyi alimwi mbomuyanda. Ambweni inga kakuli zintu nzyomutakonzyi kucita mbuli mbobacita bamwi, ambweni akaambo kakucembaala, kuciswa naa mikuli yamukwasyi. Mutatyompwi pe. (Gal. 6:4) Jehova takailubi milimo yanu. Kufwumbwa buyo kuti kamubeleka kusikila mpomugolela alimwi kamujisi makanze mabotu, uyookkomana.  (Amubale Bahebrayo 6:10.) Jehova ulizizyi noziba zintu nzyomulombozya buyo mumoyo. Uyanda kuti kamukkomene alimwi akukkutila abukombi mbomukonzya kumupa.

17. (a) Ncinzi ncomukonzya kucita kuti kacimukatazya kucita zibeela zimwi zyabukombi bwesu? (b) Ino mwagwasyigwa buti acibeela cimwi icaambidwe mukabbokesi kakuti “ Amuyungizye Lukkomano Lwanu”?

¹⁷ Mbuti kuti kacitukatazya kucita zibeela zimwi zyabukombi bwesu, mbuli kwiiya Bbaibbele alimwi akukambauka? Kuti katuzicita zintu eezyi ciindi aciindi, tuyootalika kuzikkomanina alimwi akugwasyigwa kapati. Bukombi bwesu tulakonzya kubukozyanisya kuzintu zimwi, mbuli kunyanyaansya mubili naa kwiiya kubelesya ciimbyo. Kuti zintu eezyi katuzicita buyo muziindi, tatukonzyi kuzwidilila pe. Mbuti kuti katuzicita abuzuba? Tulakonzya kutalika aasyoonto-nsyoonto akuyungizya ciindi. Twaakubona bubotu buzwawo akaambo kakubeleka canguzu, tuyookkomana kapati kuzicita. Oobu mbocibede akubukombi bwesu.

18. Ncintu nzi iciyandika kapati ncotukonzya kucita, alimwi ncinzi ciyoocitika kuti twacicita?

¹⁸ Kubeleka canguzu kukomba Jehova ncecintu ciyandika kapati ncotukonzya kucita. Ikuti twacita oobo, tunookkomene akukkutila mubuumi alimwi tunoojisi bulangizi bwakukomba Jehova mane kukabe kutamani. (Tus. 10:22) Tulijisi kale luumuno lwamumizeezo, nkaambo tulizyi kuti Jehova ulabagwasya bakombi bakwe ciindi nobali mumapenzi. (Is. 41:9, 10) Eelo kaka tulijisi twaambo tubotu itweelede kutupa kukkomana ciindi notukomba Taateesu siluyando, walo ‘iweelela ikutambula bulemu alulemeko’ kuzwa kuzilenge zyakwe zyoonse!—Ciy. 4:11.