ZICITIKA MUNYIKA
Zicitika mu Africa
Tubunga tunji alimwi abantu bazumanana kucita nzyobakonzya kutegwa basumpule buumi mu Africa. Nokuba boobo, cooko ca Africa cicijisi mapenzi manji aakatazya.
Kujaya Bacipembele
Mu 2013 mucisi ca South Africa, bacipembele ibasika ku 1,004 bakajaigwa munzila iitali yamumulawo, kakuli mu 2007 kwakajaigwa buyo ibali 13. Nokuba kuti meja aabacipembele alajanika kapati, ibaayanda abalo mbanji cakuti kkilogilamu yomwe yalwija lwacipembele iladula kwiinda kkilogilamu yangolida. Lwija lomwe lulakonzya kusambalwa mali aabalilwa kumadola aasika ku 500,000.
NCOMWEELEDE KUYEEYA: Sena mfwulumende kuli noziyakubumana bubi?—Jeremiya 10:23.
Makani Aajatikizya Kupegwa Cisinkamulomo Aatakalipootwa
Kabunga kategwa Transparency International kaamba kuti izisi zyaku East Africa zijisi myeelwe yaatala kapati yamakani aajatikizya cisinkamulomo munyika. Nokuba boobo, bantu ibabalilwa ku 90 pesenti ibapenga amakani aacisinkamulomo tabapi malipooti. Mwaambilizi wakabunga ikali ku Kenya waamba kuti: “Balelwa bacisi baboneka kuti tabazisyomi mfwulumende zyabo kuti zilakonzya kubikkila maano kumalipooti aajatikizya cisinkamulomo.”
NCOLYAAMBA BBAIBBELE: “Cisinkamulomo cilakonzya kupa babetesi kutabeteka kabotu.”—Kulonga 23:8.
Bana Africa Ibabelesya Intaneti
Kweelana akabunga kategwa International Telecommunication Union, bana Africa ibabalilwa ku 20 pesenti, bakali kulangilwa kuti banoobelesya Intaneti kusika kumamanino aamwaka wa 2014. Mweelwe wabantu mu Africa ibabelesya Intaneti uyaabukomena kusika kuziindi zyobilo kwiinda mweelwe wanyika yoonse.
