Esita wakali musimbi mu Juda iwakali kukkala mu Persia mumunzi wa Susani. Myaka minji yainda, Nebukadinezara wakabweza mukwasyi wakwe akuutola ku Jerusalemu. Pele walo wakakomezyegwa amweeninyina Moodekai, imubelesi wa Mwami Ahasuera waku Persia.

Mwami Ahasuera wakali kuyanda namalelo mupya. Babelesi bakwe bakamuletela bamakaintu bainda kubota mucisi, kubikkilizya a Esita. Akati kabamakaintu boonse aabo, mwami wakasala Esita kuba namalelo. Moodekai wakaambila Esita kuti ataliyubununi kuti mu Juda.

Mwaalumi uulisumpula wazina lya Hamani ngowakali mupati wabasilutwe boonse. Wakali kuyanda kuti boonse kabamufwugamina. Moodekai wakakaka kucita oobo, aboobo Hamani wakanyema kapati cakuti wakali kuyanda kumujaya. Ciindi Hamani naakazyiba kuti Moodekai mu Juda, wakaba amuzeezo wakujaya ba Juda boonse ibakali kukkala mucisi eeci. Wakaambila mwami kuti: ‘Ba Juda mbabi kapati; weelede kubajaya.’ Ahasuera wakati: ‘Kocita kufwumbwa ncoyanda,’ alimwi wakamupa anguzu zyakubikka mulawo. Hamani wakabikka mulawo iwakali kwaamba kuti bantu beelede kubajaya ba Juda boonse mubuzuba bwa 13 mumwezi wa Ada. Jehova wakali kulangilila izyakali kucitika.

Esita tanaakauzyi mulawo ooyu pe. Aboobo Moodekai wakamutumina lugwalo lwamulawo ooyu akumwaambila kuti: ‘Koya ukaambaule amwami.’ Esita wakaamba kuti: ‘Kufwumbwa muntu uunka kumwami katatambidwe weelede kujaigwa. Lino kwainda mazuba aali 30 mwami katanditambi. Pele ndilaunka. Ikuti akanditondeke nkoli yakwe yabwami, nkokuti tandikajaigwi. Pele kuti atakaciti oobo, nkokuti ndiyoojaigwa.’

Esita wakaunka kulubuwa lwamwami. Ciindi mwami naakamubona, wakamutondeka ankoli yakwe yabwami. Wakaunka kulinguwe mpoonya mwami wakamubuzya kuti: ‘Ncinzi ncoyanda kuti ndikucitile Esita?’ Wakaingula kuti:  ‘Ndaboola kutamba nduwe a Hamani kupobwe.’ Kabacili kupobwe eeli, Esita wakabatamba alimwi kupobwe lyabili. Nolyakali kucitika pobwe lyabili, mwami wakabuzya Esita alimwi kuti: ‘Ncinzi ncoyanda kuti ndikucitile?’ Wakaingula kuti: ‘Kuli muntu uuyanda kundijaya abantu bangu. Twalomba kaka, kotuvwuna!’ Mwami wakabuzya kuti: ‘Ino nguni uuyanda kumujaya?’ Wakati: ‘Ngweenya ooyu mwaalumi mubi Hamani.’ Ahasuera wakanyema kapati cakuti mpoonya-mpoonya wakalailila kuti Hamani ajaigwe.

Pele kunyina iwakali kukonzya kuucinca mulawo ngwaakabikka Hamani, naba mwami buya. Aboobo mwami wakabikka Moodekai kuba mupati wabasilutwe alimwi wakamupa nguzu zyakubikka mulawo mupya. Moodekai wakabikka mulawo iwakali kugwasya ba Juda ikulikwabilila kuli basinkondonyina. Mubuzuba bwa 13 mumwezi wa Ada, ba Juda bakabazunda basinkondonyina. Kuzwa ciindi eeco, mwaka amwaka bakali kusekelela akaambo kakuzunda ooko.