Jobu 31:1-40
31 “Ndipangide cizuminano ameso aangu.+
Aboobo ino mbuti mbondinga ndacenka nakalindu?+
2 Ino ncaabilo nzi ncejisi kuzwa kuli Leza wakujulu,Ino ndukono nzi ndwejisi kuzwa kuli Singuzuzyoonse uuli kujulu?
3 Sena sizibi tasubulwiAlimwi sena basimucita zibi tabacitikilwi mapenzi?+
4 Sena walo taziboni nzila zyangu+Akubala ntaamu zyangu zyoonse?
5 Sena kuli nindakeendede mububeji?*
Sena maulu aangu kuli naakafwambaanina kukucenga?+
6 Leza andipime aacikkelo ciluzi;+Eelyo ulazyiba kuti nsijisi kampenda.+
7 Ikuti maulu aangu aleya munzila+Naa kuti moyo wangu watobela meso aangu+Naa maanza aangu asofwaala,
8 Nkokuti mbuto nzyonditiisyange azikaligwe amuntu uumbi,+Alimwi nzyondisimpa azikazyulwe.*
9 Ikuti naa moyo wangu wanyomenena mukaintu umwi,+Alimwi ndali kumuyubilila+ kumulyango wamweenzuma,
10 Nkokuti mukaintu wangu aziile mwaalumi uumbi maila,Alimwi baalumi bambi boone anguwe.*+
11 Nkaambo oobu inga bwaba bukkale busesemya,Alimwi inga waba mulandu ibabetesi ngobeelede kundipeda cisubulo.+
12 Eeco inga caba mulilo uukonzya kuumpa cakumaninina akunyonyoona,*+Uukonzya kuumpa niiba miyanda* yazintu zyangu zyoonse.
13 Ikuti naa tiindakabacitila cabululami babelesi bangu basimbi naa basankwaCiindi nobakali kunditongooka,*
14 Ino inga ndacita buti ikuti Leza wandiboolela?*
Ino inga ndamuvwiila buti ikuti wandibeteka?+
15 Sena Ooyo wakandipanga mebo mwida tali nguwe wakabapanga abalo?+
Sena tali buyo omwe Ooyo wakatulenga katutanazyalwa?*+
16 Ikuti naa bacete ndakali kubaima zintu nzyobakali kulombozya+Alimwi ikuti naa ndakali kumupa kulila mukamufwu;*+
17 Ikuti naa ndakali kulidomenena kulya cakulya canguKakunyina kubapako bamucaala;+
18 (Nkaambo kuzwa kubukubusi bwangu mucaala wakali kukomena andime mbuli kuti ndili bausyi,Alimwi kuzwa kubwana bwangu* ndalikusololela mukamufwu.)
19 Ikuti naa ndakali kumulanga buyo muntu kaandwa mpeyo akaambo kakubula cisaniNaa kumulanga buyo mucete kanyina cakulivwumba;+
20 Ikuti naa tanaakandileleka+Ciindi naakali kulikasaazya aboya bwambelele zyangu;
21 Ikuti naa mucaala+ ndakali kumuvwukawida janza lyangu kandivwungide mfwaindiCiindi walo naakali kuyanda kuti ndimugwasye kumulyango wamunzi;*+
22 Nkokuti kuboko* kwangu akulebuke kugwezyo,Alimwi kuboko kwangu akutyoke aakakokola.
23 Nkaambo ndakali kuyoowa mapenzi aazwa kuli Leza,Alimwi tiindakali kukonzya kwiima kumbele lyabulemu bwakwe.
24 Ikuti naa ndakali kusyoma ngolidaNaa ikuti ndakaambila ngolida mbotu kuti, ‘Nduwe ngondisyoma!’+
25 Ikuti ndakali kulidunda akaambo kakuti lubono lwangu lwakali lunji+Akaambo kabuvwubi bunji mbondakajisi;+
26 Ikuti nindakali kubona zuba* kalimwekaNaa mwezi uutaliboteli kaweenda;+
27 Mpoonya kunsi aamoyo wangu ndakoongelezyegwa,Alimwi ndakamyonta janza lyangu kuti ndizikombe;+
28 Nkokuti ooyo nouli mulandu ibabetesi ngobeelede kundipeda cisubulo,Nkaambo nicaamba kuti ndamukaka Leza mwini-mwini wakujulu.
29 Sena kuli nindakakondwa akaambo kakuti sinkondoma wanyonyoonwa+Naa kusekelela akaambo kakuti wasikilwa mapenzi?
30 Tiindakalekela mulomo wangu kuti ubisyeKwiinda mukulomba kuti afwe akaambo kakusinganizyigwa.+
31 Sena bantu bamutente lyangu tiibakaamba kuti,‘Ino nguni uukonzya kujana muntu watakakkuta cakulya* cakwe?’+
32 Kunyina mweenzu* wakali koona anze masiku;+Simweendanzila ndakamujalwida milyango yangu.
33 Sena kuli nindakasisa milandu yangu mbuli mbobacita bantu bamwi,+Kwiinda mukubikka cinyonyoono cangu munkomwe yacisani cangu?
34 Sena ndalikuyoowa mbobakonzya kucita bantu banji,Naa kuyoowa kusekwa amikwasyi iimbi,Cakuti ndalikwiile kuumwine akuyoowa kuzwa anze?
35 Eelo kaka nikwali muntu uundiswiilila!+
Nindasaina zina lyangu kumakani ngondaamba.
Aandivwiile Singuzuzyoonse!+
Nicainda kubota kuti sitwaamboma naalemba milandu yangu aapepa!
36 Nindalinyamuna agwezyo lyangu,Alimwi nindalisama mbuli musini.
37 Nindamwaambila zintu zyoonse nzindakacita;Nindamusikila cabusicamba, mbubonya mbuli silutwe.
38 Ikuti nyika yangu yanditongookaAmifwolo yanjiyo yalila;
39 Ikuti naa ndalya micelo yanjiyo kakunyina kubbadela,+Naa ikuti ndapa kuti balaayo batyompwe;+
40 Nkokuti muciindi cawiiti akumene mamvwaAlimwi muciindi cabbaale akumene nsaku zinunka nsu.”
Aawa mpaamanina majwi aa Jobu.
Bupanduluzi buyungizyidwe
^ Naa ambweni, “abantu babeja?”
^ Naa “bana bangu abakazyulwe.”
^ Mu Chihebrayo, “baalumi bambi bafwugame atala lyakwe.”
^ Mu Chihebrayo, “kulya akunyonyoona.”
^ Naa “Uukonzya kuzyula miyanda.”
^ Naa “nobakajisi kaambo andime kunkuta.”
^ Mu Chihebrayo, “wanyamuka?”
^ Mu Chihebrayo, “mwida.”
^ Mu Chihebrayo, “kupa kuti meso aamukamufwu asalale.”
^ Mu Chihebrayo, “kuzwa mwida lyabaama.”
^ Naa ambweni, “Ciindi nindakabwene kuti ndijisi lugwasyo kumulyango wamunzi.”
^ Naa “kkuko.”
^ Mu Chihebrayo, “mumuni.”
^ Mu Chihebrayo, “nyama.”
^ Naa “muzwakule.”
