Jobu 30:1-31
30 “Pele lino balandiseka+—Basankwa ibana kulindime,Aabo ibali abamausyi mbondatakali kukonzya kuzumizyaKuti bakkale ababwa balinda butanga bwangu.
2 Ino nguzu zyamaanza aabo zyakajisi mulimo nzi kulindime?
Nguzu zyabo zyamana doo.
3 Baligonkeledwe akaambo kakubula alimwi anzala;Bakunya cimpayumaEeco cakanyonyookede kale akuba matongo.
4 Bacela matu aali mbuli aasikabbweelele* musyokwe;Miyanda yacisamu cili mbuli ndiya ncicakulya cabo.
5 Balatandwa muciinga;+Bantu balabaweelela mbuli mbobaweelela mubbi.
6 Bakkala mumajeleele aamumakkuti,*Mumalyango aansi alimwi amumandomba.
7 Balakwiila muzitewoAkugwambatilana muzyoonde zyamamvwa.
8 Mbubonya mbuli bana babantu bafwubafwuba alimwi babuyo,Batandwa* mucisi.
9 Pele lino balandifwubaazya nimuba munyimbo zyabo;+Balandisampaula.*+
10 Balandisesemwa alimwi bakkalila kulamfwu andime;+Tabayoowi pe kundiswida mate kumeso.+
11 Mbokunga Leza wandinyanga zilwanyo* alimwi wandifwiinsya,Tabalilesyi naaceya kumbele lyangu.
12 Bandilwana kululyo mbuli nkamu yabantu banyemede;BanditandaanyaAkubikka zisinkilizyo zyakuti bandinyonyoone munzila yangu.
13 Banyonyoona nzila zyanguAkupa kuti mapenzi aangu aindile,+Kakunyina uubalesya.*
14 Bandiboolela mbuli kuti bainda mucipulo cipati cabwaanda;Bandivwuumukila mulunyonyooko.
15 Zintu ziyoosya zyandikatazya;Bulemu bwangu bwamana mbuli kuti bwapepululwa amuwo,Alimwi lufwutuko lwangu lwazibaana mbuli kkumbi.
16 Lino buumi bwangu buyaabumana;+Mazuba aamapenzi alindijisi.+
17 Masiku mafwuwa aangu alapanda,*+Tacileki pe kuzunta.+
18 Cisani cangu caleka kulibonya kabotu akaambo kanguzu zinji;*Candidina mbubonya mbuli nsingo yacisani cangu.
19 Leza wandiwisyila mumankanda;Ndamana, ndaile kuba buyo lusuko alimwi amulota.
20 Ndakukwiilila kuti undigwasye, pele tondivwiili pe;+Ndaimikila, pele yebo wiile kundilanga buyo.
21 Wacinca akuba silunya kulindime;+Wanduuma ajanza lyako lyanguzu kapati.
22 Wandinyamuna akunditola amuwo;Mpoonya wandipepulula muguwo.*
23 Nkaambo ndilizyi kuti uyoonditola kulufwu,Kuŋanda nkobayooswaanganina bantu boonse baumi.
24 Nokuba boobo kunyina uunga wauma muntu uugonkeledwe*+Ciindi muntu ooyo nakwiila kuti agwasyigwe kumapenzi aakwe.
25 Sena tiindalila akaambo kabaabo basikilwa mapenzi?*
Sena tiindausa akaambo kabacete?+
26 Nokuba kuti ndakali kulangila bubotu, bubi mbobwakaboola;Ndakali kulangila mumuni, pele kwakaboola mudima.
27 Moyo wangu tiiwakaleka kuduntaana;Mazuba aamapenzi akandisikila.
28 Ndileendeenda kanduuside;+ taakwe mumuni wazuba.
Mumbungano ndilaimikila akukwiilila lugwasyo.
29 Ndaba mwanookwabo bamwaabaAlimwi ndaba mweenzinyina wabana bampowani.+
30 Lukanda lwangu lwasiya akuyupuluka;+Mafwuwa aangu apya akaambo kakupya mubili.
31 Kantimbwa kangu kaile kuba buyo kakulizya nyimbo zyabuumba,Awalo muntolilo wangu waba jwi lyabantu balila.
Bupanduluzi buyungizyidwe
^ Bamwi baamba kuti “munyo naa sautu waŋombe; mukata; coomooma.”
^ Naa “aamilonga.”
^ Mu Chihebrayo, “Baumwa.”
^ Mu Chihebrayo, “Balandaamba mumaambilambali; Balandaamba mukasimpi.”
^ Mu Chihebrayo, “watebezya ntambo yabuta bwangu.”
^ Naa ambweni, “uubagwasya.”
^ Mu Chihebrayo, “Mafwuwa aangu aladonkaulwa masiku.”
^ Naa ambweni, “Lukanda lwangu lwaleka kulibonya kabotu akaambo kamapenzi aakatazya kapati aandijisi.”
^ Naa ambweni, “wandinyonyoona akuzuma kupati.”
^ Mu Chihebrayo, “mulwi wazintu zinyonyookede.”
^ Naa “balaabuumi bukatazyide?”
