Julani

Kumbi Akaboni aku Yehova Achichizga Ŵana Ŵawu Kuti Nawu Aje Akaboni aku Yehova?

Kumbi Akaboni aku Yehova Achichizga Ŵana Ŵawu Kuti Nawu Aje Akaboni aku Yehova?

Awa, chifukwa weyosi watenere kusankha yija kusopa Chiuta. (Aroma 14:12) Akaboni aku Yehova asambiza ŵana ŵawu fundu za m’Bayibolu. Kweni asani ŵana wo akuwa, asankha ŵija kuti aje Akaboni aku Yehova pamwenga cha.​—Aroma 12:2; Agalatiya 6:5.

Mwakuyanana ndi apapi anandi, Akaboni aku Yehova nawu akhumba kuti ŵana ŵawu vinthu viŵayendiyengi umampha. Yiwu asambiza ŵana ŵawu vinthu vo vingaŵawovya nge: ntchitu, nkharu yamampha kweniso fundu za m‘Bayibolu. Akaboni aku Yehova agomezga kuti Bayibolu le ndi fundu zo zingawovya munthu kuti wajengi umoyu wamampha. Mwaviyo, asambira Bayibolu ndi ŵana ŵawu ndipuso aluta nawu ku mawunganu ngachikhristu kuti aŵasambizi fundu zenizi. (Marangu 6:6, 7) Pavuli paki, asani mwana wakuwa wasankha yija kuti waje Kaboni waku Yehova pamwenga cha.

 Kumbi Akaboni aku Yehova abatiza ŵana anamana ukongwa?

Awa. Bayibolu lizomereza cha kuti ŵana anamana ukongwa abatizikengi. Mwakuyeruzgiyapu, Bayibolu lilongo kuti Akhristu akwamba ŵechendabatiziki avwanga dankha uthenga, ndipu asani ‘awulonde’ ndi kulapa, abatizikanga. (Machitidu 2:14, 22, 38, 41) Mwaviyo, kuti munthu wabatiziki, wakhumbika kuja wakuti wangavwisa vo Bayibolu lisambiza, wangavigomeza ndipuso wangasankha kuti wavwigwiriskiyengi ntchitu pa umoyu waki. Mwana munamana ukongwa wangachita cha venivi.

Asani ŵana akuwa, angasankha kuti abatiziki. Kweni kuti abatiziki, akhumbika kuviziŵa umampha vo asankha.

 Kumbi Akaboni aku Yehova atiŵakana ŵana ŵawu asani akana kubatizika?

Awa. Chinanga kuti Akaboni aku Yehova akondwa cha asani mwana wawu wakhumba cha kugomezga vo yiwu agomezga, kweni atimuyanja mbwenu mwana wawu ndipu alutirizga mbwenu kuja apapi ŵaki.

Munthu weyosi, kwali wangaŵa mwana pamwenga mura wakhumbika kusankha yija kuti wabatiziki pamwenga cha

 Ntchifukwa wuli Akaboni aku Yehova aluta ndi ŵana ŵawu kuchipharazga?

Pe vifukwa vinandi vo tilutiya limoza ndi ŵana ŵidu kuchipharazga. *

  • Bayibolu likambiya apapi kuti asambizengi ŵana ŵawu vakukwaskana ndi Chiuta kweniso kuti amusopengi. (Aefeso 6:4) Kusopa Chiuta kusazgapu kupharazga pakweru chivwanu cho munthu wenachu. Mwaviyo, ŵana atenere kusambizika kupharazga.​—Aroma 10:9, 10; Aheberi 13:15.

  • Bayibolu lichiska ŵana kuti “arumbi zina la Ambuya.” (Sumu 148:12, 13, Mazu Ghaku Chiuta) Nthowa yakukhumbika ukongwa yo tingarumbiya Chiuta, nkhukambiyaku anyaki vakukwaskana ndi iyu. *

  • Ŵana asambira vinandi asani apharazgiya limoza ndi apapi ŵawu. Mwakuyeruzgiyapu, asambira mo angakambiskiyana ndi ŵanthu akupambanapambana, ndipuso asambira mijalidu yamampha nge lisungu, ulemu kweniso chanju. Kupharazga kutovya so ŵana kuti avivwisisengi vo agomezga.

 Kumbi Akaboni aku Yehova achitaku maholidi pamwenga vikondwereru vinyaki?

Akaboni aku Yehova achitaku cha maholidi nga visopa kweniso vikondwereru vo vileka kukondwesa Chiuta. * (2 Akorinto 6:14-17; Aefeso 5:10) Mwakuyeruzgiyapu, tikondweriyaku cha zuŵa lakuwiya pamwenga Khrisimasi, chifukwa vikutuliya ku chisopa chaboza.

Chinanga kuti ve viyo, isi titanja kucheza ndi mabanja ngidu kweniso kupaska mphasu ŵana ŵidu. Mumalu mwakucheza ndi mabanja ngidu kweniso kupereka mphasu pa mazuŵa nga pade pe, isi tichita venivi nyengu yeyosi pa chaka.

Apapi wo mbakhristu akondwa kupaska ŵana ŵawu mphasu

^ ndimi 6 Ŵana ŵa Akaboni aku Yehova aluta cha ŵija kuchipharazga kwambula mpapi wawu pamwenga munthu munyaki mura.

^ ndimi 8 Bayibolu lizumbuwa ŵana anyaki wo angukondwesa Chiuta mwakukambiyaku anyawu vo agomezga.—2 Ŵakaronga 5:1-3; Mateyu 21:15, 16; Luka 2:42, 46, 47.

^ ndimi 12 Mazina ngasinthika.