Dotoronome 6:1-25

  • Uyanjengi Yehova ndi mtima waku wosi (1-9)

    • “Vwisiyani yimwi Ayisirayeli” (4)

    • Apapi asambizengi ŵana ŵawu (6, 7)

  • Mungamuluwanga cha Yehova (10-15)

  • Mungamuyesanga cha Yehova (16-19)

  • Kambiyani mugonezi wakunthazi (20-25)

6  “Sonu yanga ndi marangu, fundu ndipuso vyeruzgu vo Yehova Chiuta winu wandipaska kuti ndikusambizeni, ndi chilatu chakuti muzivisungengi asani mwaziyambukiya mucharu cho mwamuto kuti chije chinu,  kuti muwopengi Yehova Chiuta winu ndi kusunga marangu ngaki ngosi kweniso ulongozgi waki wo nditikupaskani, yimwi, ŵana ŵinu ndi azuku ŵinu,+ mu mazuŵa ngosi nga umoyu winu, kuti muje ndi umoyu utali.+  Yimwi Ayisirayeli, muvwiyengi ndipuso musungengi fundu ndi marangu ngenanga mwakuphwere, kuti vinthu vizikuyendiyeni umampha kweniso kuti muziyandani ukongwa mucharu chakwenda mkaka ndi uchi, nge mo Yehova, Chiuta wa apapi ŵinu akali wakukulayizgiyani.  “Vwisiyani yimwi Ayisirayeli: Yehova Chiuta widu ndi Yehova yumoza.+  Uyanjengi Yehova Chiuta waku ndi mtima waku wosi, umoyu waku wosi+ kweniso nthazi zaku zosi.+  Mazu yanga ngo nditikulamula msanawale ngajengi pa mtima waku,  ndipu ungasambizengi ku ŵana ŵaku mwakuwerezawereza.*+ Ungakambengi asani waja pasi munyumba yaku, asani utenda munthowa, asani ugona ndipuso asani uyuka.+  Ungamangengi pajanja laku nge chikumbusu, ndipuso ngajengi nge kamubambi* pachisku chaku.*+  Ungalembengi pamafulemu nga nyumba yaku ndipuso pamageti nga tawuni yaku. 10  “Asani Yehova Chiuta waku wachikusereza mucharu cho wakulapizga kwa apapi ŵaku, Abrahamu, Isaki ndi Yakobe kuti wakupaskengi,+ charu cho che ndi matawuni ngakulu kweniso ngamampha ngo ukuzengaku cha,+ 11  nyumba zakuzaza vinthu vamampha vakupambanapambana vo ukuvigwiriya ntchitu cha, visimi vo ukukumbaku cha, minda ya mphereska kweniso vimiti va maolivi vo ukupandaku cha, ndipu asani wazirya ndi kuguta,+ 12  uziphwere ukongwa kuti uzileki kuluwa Yehova,+ yo wakukutuzga mucharu cha Ijipiti, munyumba ya ukapolu. 13  Uwopengi Yehova Chiuta waku,+ iyu ndiyu utenere kumuteŵete+ ndipu ulapizgiyengi pa zina laki.+ 14  Ungalondonga achiuta anyaki cha, achiuta a ŵanthu wo akuzunguliya,+ 15  pakuti Yehova Chiuta waku yo we pakati paku, ndi Chiuta yo wakhumba kuti ŵanthu ajiperekengi kwaku iyu pe.+ Asani ulondongi achiuta anyaki, ukali waku Yehova Chiuta waku ukoliyengi paku yiwi,+ ndipu wakubayengi kuti utuzgikepu pacharu chapasi.+ 16  “Mungamuyesanga cha Yehova Chiuta winu,+ nge mo mungumuyese pa Masa.+ 17  Musungengi ndi mtima wosi marangu ngaku Yehova Chiuta winu, vikumbusu vaki ndipuso fundu zaki zo wakulamulani kuti musungengi. 18  Muchitengi vinthu vakwenere ndipuso vamampha pa masu paku Yehova, kuti vinthu vizikuyendiyeni umampha kweniso kuti muzisere ndi kuto charu chamampha cho Yehova wakulapizga kwa apapi ŵinu akali,+ 19  mwakudikisa arwani ŵinu wosi panthazi pinu, nge mo Yehova wakulayizgiya.+ 20  “Kunthazi asani ŵana ŵaku azikufumba kuti, ‘Kumbi vikumbusu, fundu kweniso vyeruzgu vo Yehova Chiuta widu wakukupaskani ving’anamuwanji?’ 21  uziŵamukengi kuti, ‘Tenga akapolu aku Farawo ku Ijipiti, kweni Yehova wakutituzga mucharu cha Ijipiti ndi janja lanthazi. 22  Isi tichiwona, Yehova watumizanga visimikizu ndipuso vakuziziswa vikulu kweniso vakusakaza mucharu cha Ijipiti,+ paku Farawo ndipuso pa nyumba yaki yosi.+ 23  Ndipu wangutituzga mucharu cho ndi kuza nasi kunu kuti watipaski charu cho wangulapizga kwa apapi ŵidu akali.+ 24  Pavuli paki, Yehova wangutilamula kuti tivwiyengi fundu zosi zenizi kweniso kuti tiwopengi Yehova Chiuta widu, alinga kuti vinthu vitiyendiyengi umampha nyengu zosi,+ kuti tije ndi umoyu+ nge mo tiliri msanawale. 25  Ndipu tijengi arunji asani tivwiyengi Yehova Chiuta widu mwakusunga marangu ngosi ngenanga mwakuphwere, nge mo iyu wakutilamuliya.’+

Mazu Ngam'mphata

Pamwenga kuti, “ndipu ungadidimizgengi mu ŵana ŵaku.” Mazu ngaki chayingu, “ndipu ungasindiyengi mu ŵana ŵaku.”
Kasalu kakumanga mumutu.
Mazu ngaki chayingu, “pakati pa masu nginu.”