Kumbi Ubatizu Ntchinthu Wuli?

JULANI

Vo Bayibolu limuka

Ubatizu ung’anamuwa kubiza munthu mumaji ndi kumuzuwuwa. a Ichi ndichu chifukwa cho Yesu wangubatizikiya mumusinji mo mwenga maji nganandi. (Mateyu 3:13, 16) Mwakuyanana ŵaka, munthu munyaki waku Ifiyopiya wangupempha kuti wabatiziki wati wafika “po penga maji.”—Machitidu 8:36-40.

Vo ubatizu ung’anamuwa

Bayibolu liyeruzgiya ubatizu ndi kuŵika munthu ku masanu. (Aroma 6:4; Akolose 2:12) Asani munthu wabatizika waja nge kuti wafwa ku umoyu waki wakali ndipu watamba umoyu wasonu nge Mkhristu yo wajipereka kwaku Chiuta. Chiuta ndiyu wakunozga kuti munthu yo wajipereka kwaku iyu wabatizikengi. Venivi vitovya kuti munthu yo wabatizika waje ndi njuŵi yamampha chifukwa chakugomezga sembi yaku Yesu Khristu. (1 Peturo 3:21) Ndichu chifukwa chaki Yesu wangukambiya akusambira ŵaki kuti akhumbika kubatizika.—Mateyu 28:19, 20.

Kumbi ubatizu wa mumaji umalisa maubudi ngosi nga munthu?

Awa. Bayibolu lisambiza kuti maubudi nga munthu ngatoweseka chifukwa cha ndopa zaku Yesu. (Aroma 5:8, 9; 1 Yohane 1:7) Kuti munthu wapinduwi ndi sembi yaku Yesu, wakhumbika kuvwana mwaku iyu, kusintha umoyu waki, kuchita vinthu mwakukoliyana ndi vo Yesu wachitanga ndipuso kubatizika.—Machitidu 2:38; 3:19.

Kumbi Bayibolu lisambiza kuti tibatizengi abonda?

Awa. Bayibolu likambapu cha kuti abonda abatizikengi. Matchalitchi nganyaki ngakujaliska mudawuku ‘wakubatiza’ abonda mwakuŵanthonyeze pamwenga kuŵadiliya maji pamutu. Ndipu pavuli paki atimupaska zina. Kweni mwakupambana ndi venivi, ubatizu wa Chikhristu ngwa ŵanthu wo avwisa umampha kweniso kugomezga “uthenga wamampha wa Ufumu waku Chiuta.” (Machitidu 8:12) Ndipu ivi vikoliyana ndi kuvwisiya mazu ngaku Chiuta, kuchita vo ngakamba ndi kulapa. Ndipu vinthu venivi abonda angavichita cha.—Machitidu 2:22, 38, 41.

Kusazgiyapu pa fundu iyi, Bayibolu lilongo kuti Chiuta wawona kuti ŵana ŵa Akhristu mbatuŵa pamwenga kuti mbachanda pa masu paki, chifukwa cha chivwanu cha apapi ŵawu. (1 Akorinto 7:14) Asani ubatizu wa abonda wenga wakuzomerezeka, ndikuti ŵana atingi akhumbikengi munthu munyaki cha kuti Chiuta waŵawonengi kuti mbatuŵa. b

Fundu zaboza zakukwaskana ndi ubatizu wa Chikhristu

Fundu yaboza: Kunthonyeza pamwenga kumudiliya maji munthu, kuyanana ŵaka ndi kumubizga mumaji liŵavu losi.

Fundu yauneneska: Ubatizu wo uzumbulika mu Bayibolu ukamba za kubizga munthu liŵavu laki losi. Mwakuyeruzgiyapu, pa nyengu yo wakusambira Filipu wabatizanga nduna yaku Ifiyopiya, “anguluta mumaji” ndipu wangumubatiza. Ndipu pavuli paki, ‘angutuwa mumaji.’—Machitidu 8:36-39. c

Fundu yaboza: Bayibolu lilongo kuti mu nyengu yakali asani arara abatizika, ŵana nawu abatizikanga. Mwakuyeruzgiyapu, Bayibolu likamba za mulonda wa jeri wa ku Filipi kuti: “Iyu ndi a munyumba yaki angubatizika.”—Machitidu 16:31-34.

Fundu yauneneska: Nkhani ya mulonda wa jeri, yilongo kuti ŵanthu wosi wo angubatizika anguvwisa “mazu ngaku Yehova” ndipu yiwu ‘angukondwa ukongwa.’ (Machitidu 16:32, 34) Fundu zenizi zititiwovya kuziŵa kuti abonda wosi amunyumba ya mulonda wa jeri abatizikanga cha chifukwa angavwisanga cha mazu ngaku Yehova.

Fundu yaboza: Yesu wangukamba kuti abonda nawu abatizikengi chifukwa Ufumu ngwa anamana.—Mateyu 19:13-15; Mariko 10:13-16.

Fundu yauneneska: Yesu wakambanga za ubatizu cha po wakambanga za mazu yanga. M’malu mwaki, iyu walongonga kuti wo azamusere mu Ufumu waku Chiuta akhumbika kuja nge ŵana, kung’anamuwa kuti akhumbika kuja akufwasa kweniso kuti alondiyengi ulongozgi nge mo ŵana achitiya.—Mateyu 18:4; Luka 18:16, 17.

a Mazu ngachigiriki ngo akungafwatuliya kuti “kubatiza” ngakutuliya ku mazu ngakuti musisi ngo ngang’anamuwa kuti “kubiza.” Wonani buku lakuti Theological Dictionary of the New Testament, Volume I, peji 529.

b Buku linyaki likamba kuti: “Mu Bayibolu la C[hipanganu] C[hasonu], palivi po pakulembeka kuti abonda abatizikengi.” Buku ili likamba so kuti ŵanthu angwamba mudawuku wakubatiza ŵana chifukwa “chakuleka kuvwisa vo mazu ngakuti ubatizu ngang’anamuwa ndipuso chifukwa chakugomezga kuti ubatizu” ndiwu utowesa maubudi.—International Standard Bible Encyclopedia, Volume 1, peji 416-417.

c Pa kamutu kakuti “Kubatiza (mu Bayibolu),” buku linyaki lingukamba kuti: “Vilongo kuti mumatchalitchi ngakwambiriya, munthu amubatizanga mwa kumubiza mumaji liŵavu laki losi.”—New Catholic Encyclopedia, Volume 2, peji 59.