Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Mbampin Mba Mbaôron Takerada Ne Ve Pin La

Mbampin Mba Mbaôron Takerada Ne Ve Pin La

Kwagh u Mateu a nger sha kwagh u mhii u uma u Yesu shin tar ne la kaha a kwagh u Luka a nger la sha ci u nyi?

Kwagh u Mateu a nger sha kwagh u mmar u Yesu man mhii u uma na shin tar ne la kaha a kwagh u Luka a nger la sha ci u Mateu hemba veren ishima sha akaa a yange er Yosev la, kpa Luka di, hemba veren ishima sha akaa a yange er Maria la.

Kwagh u Mateu a nger la pase kwagh u Yosev yange soo u eren shighe u va kav ér Maria wa iyav la, kua gbenda u ortyom va pase un kwagh ne ken mnyam la, man er lumun kwagh u ortyom la ôr a na la kpaa. (Mat. 1:19-25) Shi Mateu za hemen u pasen kwagh u ortyom va ôr a Yosev ken mnya ér a yevese a yem ken Igipiti la, man er yevese vea tsombor na yem la, man er ortyom shi va kaa a na ér a cin a hide ken Iserael, nahan un kpa cin hide kua er tsua u za lun vea tsombor na ken Nasareti la kpaa. (Mat. 2:13, 14, 19-23) Ken Ivangeli i Mateu la ityough 1 zan zan ityough 2, i ter iti i Yosev ker kwa taankaruhar, kpa Maria yô, i ter iti na kwa taan tseegh.

Kwagh u Luka a nger la pase er ortyom Gaberiel yange va Maria inya man er Maria za anngô na Elisabetu inya la, kua er Maria wuese Yehova la kpaa. (Luka 1:26-56) Shi Luka ter mkaanem ma Shimion ôr a Maria sha kwagh u atsan a lu u Yesu una va tagher a mi ken hemen la. Ken kwagh u Luka a er sha zende u tsombor u Maria za ken tempel shighe u Yesu lu anyom 12 la je kpa, ka mkaanem ma Maria a ter ye, ka ma Yosev ga. Shi Luka kaa ér akaa ne cii yange bende a Maria tsung je. (Luka 2:19, 34, 35, 48, 51) Ken Ivangeli i Luka la ityough 1 zan zan ityough 2, i ter iti i Maria ker kwa puekaruhar, kpa Yosev yô, i ter iti na kwa tar tseegh. Sha nahan yô, Mateu hemba pasen kwagh u mbamgbe man ityom i Yosev la, Luka di hemba pasen kwagh u tom u Maria man akaa a yange er un la.

Shi gbenda u mbangeren Ivangeli mba uhar mban ve pase kwagh u tsombor u Yesu due ker la kpa kaha. Mateu pase tsombor u Yosev due ker la vighe vighe, shi tese ér Yesu, u Yosev lumun un hingir wan na la, una va tema tor sha ikyônough ki Davidi, ki ki lu kwagh na la. Sha ci u nyi? Sha ci u Yosev yange due ken tsombor u Solomon u lu wan u Tor Davidi la. (Mat. 1:6, 16) Nahan kpa, Luka pase tsombor u Maria due ker la vighe vighe shi tese ér “sha mlu u or” yô, Yesu kuma u teman sha ikyônough ki Davidi, sha marami je. (Rom. 1:3) Sha ci u nyi? Sha ci u Maria yange due ken tsombor u Natan u lu wan u Tor Davidi la. (Luka 3:31) Kpa Luka nger iti i Maria ér ngu wan u Heli ga sha ci u nyi? Sha ci u yange lu nomso i pasen tsombor u ve dugh her la ye. Nahan shighe u Luka ter iti i Yosev shi pase ér ngu wan u Heli la, ior kav ér Yosev lu wankem u Heli.—Luka 3:23.

Gbenda u Mateu man Luka ve pase tsombor u Yesu due ker vighe vighe la, tese wang ér Yesu lu Mesiya u i tôndo zwa ér ngu van la. Yange ior fa wuee er Yesu due ken tsombor u Tor Davidi la je yô, Mbafarishi man Mbasadushi je kpa, fatyô u tunan ga. Nyian ne, kwagh u Mateu man Luka ve nger sha kwagh u tsombor u Yesu due ker la, ka kwagh u môm ken akaa a vesen a jighjigh wase u nan a har sha mi shi a tese ér uityendezwa mba Aôndo vea kure keng yô.