Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

U Fa Kpa?

U Fa Kpa?

Ter u Yosev lu ana?

Yosev, orkapinta u ken Nasareti la, lu terkyoson u Yesu. Kpa ter u Yosev lu ana? Ivangeli i Mateu pase tsombor u Yesu zan zan za yila ter u Yosev la ér Yakob, Luka di gema kaa ér Yosev lu “wan u Heli.” Er nan i lu inja er ve gba zwa môm ga nahana?—Luka 3:23; Mateu 1:16.

Mateu nger ér: ‘Yakob mar Yosev.’ Ishember i ken zwa Grika i i gem ér “mar” la tese wang ér Yakob lu ter u Yosev kpôô kpôô. Sha nahan yô, Mateu lu pasen tsombor u Yosev yange due ker jim jim la. Lu tsombortor u Davidi, u ikyônough ki torough kira va due sha or u yange lu ki nan jim jim la yô. Or shon lu Yesu, u terkyoson na lu Yosev la.

Luka gema nger ér: “Yosev, wan u Heli.” Ishember i i gem ér “wan u” la, a fatyô u geman i kpaa ér “wankem u.” I ôr imbakwagh ne ken Luka 3:27. Shealtiel, u ter na kpôô kpôô lu Yekonia la, i nger ér lu “wan u Neri.” (1 Kroniku 3:17; Mateu 1:12) Ikyav tese ér Shealtiel yange vôso wan u Neri u kwase, u i ter iti na ga yô, nahan hingir wankem u Neri. Nahan Yosev kpa a fatyô u kaan ér lu “wan” u Heli, sha ci u yange vôso Maria, u lu wan u Heli u kwase la. Kwagh ne tese ér Luka pase tsombor u Yesu due ker sha “mlu u or” kpôô kpôô la, ken vegher u ngô na, Maria. (Mbaromanu 1:3) Sha nahan yô, Bibilo pase se tsombor u Yesu yange due ker la sha igbenda i vesen ihiar.

Sha ayange a i ngeren Bibilo la, lu nyi i tumen akondo a mi, man lu icigh ki nyi i waan sha a?

Ikyondo i sha aive a iyôngo i i we i icigh yô, i zua a i shin Zegemnger u Kuugh, cii man inyom i 135 la ye

Sha ayange a tsuaa la, ior mba hen haregh u Ashia u i yer ér Middle East la kpishi tumen akondo sha aive a iyôngo, kua ice i ivo man i urakumi. Akondo a yange hemba lun sha shighe la yô, lu a sha aive a iyôngo. Shi Bibilo ter kwagh u iyôngo, kua tom u tôndon iyôngo aive man akondo a sha aive a iyôngo ciligh ciligh. (1 Samuel 25:2; 2 Utor 3:4; Yobu 31:20) Antoho u i yer ér ada shin flax, u i tumen akondo a pupuu a mi la, yange i kahan un ken Igipiti man Iserael. (Genese 41:42; Yosua 2:⁠6) Alaghga Mbaiserael mba sha ayange la kahan mou ga, kpa Bibilo ôr kwagh u tesen ér yange i tumen akondo a mou ken tar u Pershia. (Eseter 1:⁠6) Shiliti shin silk lu ikyondo i taver ishe, man ikyav tese ér lu mbakasuav mba hen haregh u Ashia u i yer ér Far East la tseegh yamen akondo ne vaan a mi ye.​—⁠Mpase 18:​11, 12.

Takerada u i yer ér Jesus and His World la kaa ér: “Akondo a sha aive a iyôngo yange a lu ukala kposo kposo, hii sha a kungun segh segh zan zan a lun il gbimii.” Shi ashighe kpishi yange i wa akondo a sha aive ne icigh. Yange i zuan a icigh ki nyian dindee ki taver ishe tsung ken akôôr shin utamkôôr mbagen. Shi yange i zuan a icigh ki wan sha akondo, ki lun nyian bong man ki agbedang man ki kwer kua ki il ken imendenev atô kposo kposo, man ken amishe a ikyon man ikya kua ankaam ma purugh.