Iha rai barak, ai-han, roupa no uma aluga sai karun liu no neʼe halo susar ba ema barak, inklui Testemuña ba Jeová sira. Maibé duké hanoin barak, Testemuña sira sente kmaan tanba hatene katak Jeová “sei nunka fila kotuk” ba ninia atan sira. (Ebreu 13:5) Jeová sempre kumpre ninia promesa neʼe. Nia halo ida-neʼe ba irmaun-irmán sira iha rai-Filipinas, rai neʼebé ema barak moris kiak. Maizumenus durante tinan 1970 toʼo 1980 ba oin, nasaun neʼe hasoru situasaun susar tebes.

 Irmán ida naran Vicky a hatete: “Dala ruma haʼu tanis tanba haʼu la iha hahán natoon atu han. Dala barak ami iha deʼit foos, masin no bee.” Irmaun ida naran Florencio labele hetan serbisu. Nia hatete: “Haʼu iha deʼit faru tolu no kalsa tolu, neʼebé haʼu uza beibeik atu tuir reuniaun no asembleia sira.” Oinsá mak Jeová nia povu tahan hasoru situasaun hanesan neʼe? Saida mak ajuda sira atu nafatin laran-metin ba Jeová? No oinsá mak sira-nia ezemplu bele ajuda ita ohin loron se situasaun troka derrepente?

Sira tau fiar ba Jeová

 Testemuña sira iha rai-Filipinas fiar metin katak Jeová sei tau matan ba sira durante tempu susar neʼe. (Ebreu 13:6) No Jeová halo nuneʼe duni, dala barak iha dalan neʼebé sira nunka imajina. Porezemplu, irmán ida naran Cecille hatete: “Depois ami teʼin tiha foos lata ikus ba ami-nia matabixu, ami naʼin-haat la iha tan buat ida atu han. Entaun ami halo orasaun ba Jeová kona-ba buat neʼebé ami presiza iha loron neʼe. Nuʼudar ami han hela matabixu, irmaun ida mai no nia lori foos kilograma lima. Ami tanis tanba agradese no kontente ba bensaun neʼebé Jeová fó. Ami iha esperiénsia barak hanesan neʼe.”

 No Maromak nia povu mós aplika matenek neʼebé sira hetan husi Bíblia. (Provérbios 2:6, 7) Porezemplu, irmán klosan ida neʼebé foin hetan batizmu naran Arcelita, nia hasoru susar ekonomia iha tempu neʼebá tan neʼe nia fakar sai ninia sentimentu ba Jeová. Depois nia hanoin kleʼan kona-ba Provérbios 10:4 neʼebé hatete: “Ema neʼebé baruk-teen sei sai kiak, maibé ema neʼebé badinas sei sai riku.” Tanba nia hakarak halo tuir eskritura neʼe, entaun nia deside atu kuda modo. Nia hatete: “Jeová haraik duni bensaun ba haʼu-nia hakaʼas an. Loloos, haʼu bele koʼa modo natoon ba haʼu-nia presiza no bele faʼan atu hetan osan ba haʼu-nia transporte.”

Sira la para atu tuir reuniaun

 Irmaun sira mós la iha osan atu sosa no harii Reuniaun-Fatin. Maibé neʼe la hapara sira atu halo tuir mandamentu atu halibur hamutuk hodi anima malu. (Ebreu 10:24, 25) Sira halo mudansa tuir situasaun. Porezemplu, irmán ida naran Deborah hatete: “Maizumenus ema naʼin-neen mak asiste reuniaun iha uma piku ida neʼebé haʼu no haʼu-nia kolega pioneiru mak harii. Ami uza tahan husi ai-palmeira kiʼik hodi halo kakuluk, nuu tahan atu halo didin, no ai nia hun husi ai-palmeira atu uza nuʼudar tuur-fatin.”

 Irmaun-irmán barak uza sira-nia uma rasik atu halaʼo reuniaun. Irmán ida naran Virginia hatete: “Ami-nia uma kiʼik deʼit halo husi duʼut no au. Ami tenke muda ami-nia sasán uma laran kada loron-sábadu, atu nuneʼe iha fatin atu halaʼo reuniaun iha loron domingu.” Irmaun ida naran Noel hanoin-hetan uma seluk fali neʼebé sira uza iha kuak iha uma kakuluk. Nia hatete: “Bainhira udan, ami uza basia atu tau bee sira. Maibé ami la atrapalla ho ida-neʼe tanba ami kontente bele halibur hamutuk ho irmaun-irmán sira.”

Sira nafatin laran-manas halo serbisu haklaken

 Maski osan uitoan deʼit maibé Testemuña sira sente laran-manas nafatin kona-ba serbisu haklaken. Lindina neʼebé hela iha illa Negros hatete: “Tanba ami família boot, no apá deʼit mak serbisu, dala barak ami la iha osan ba transporte. Entaun dala barak ami laʼo deʼit ba haklaken-fatin. Maibé ami kontente tanba ami grupu boot mak laʼo hamutuk. Ami mós hatene katak ami-nia hakaʼas an halo Jeová kontente.”

 Susar boot ida mak bainhira bá haklaken iha área dook iha foho, tanba ami ladún iha transporte públiku. Esther neʼebé hela iha illa Luzon hatete: “Ami-nia grupu neʼebé iha ema naʼin-neen toʼo 12 sei sai sedu tanba ami tenke laʼo b kilómetru barak. Ami uza loron tomak atu haklaken. Kona-ba hahán, ami lori hahán neʼebé ami teʼin ona, no ami han iha ai-hun okos. Irmaun-irmán balu la iha buat ida atu han, maibé sira nafatin tuir. Ami dehan: ‘Lalika hanoin barak. Ita iha hahán natoon ba ema hotu.’”

 Jeová haraik duni bensaun barak ba ema neʼebé prontu atu halo sakrifísiu neʼe. Porezemplu, iha tinan 1970, iha rai-Filipinas iha haklaken-naʼin 54.789. No iha tinan 1989, númeru neʼe aumenta tan dala rua hodi sai 102.487. No iha tinan 2023, númeru ba haklaken-naʼin aumenta toʼo 253.876.

“Moris kiak la hamenus ami-nia domin ba Jeová”

 Maski hasoru susar boot kona-ba ekonomia, maibé Testemuña sira nafatin laran-metin ba Maromak. Irmaun ida naran Antonio hatete: “Moris kiak la hamenus ami-nia domin ba Jeová.” Irmán Fe Abad hatete: “Bainhira haʼu no haʼu-nia laʼen hasoru susar ekonomia, ami nafatin hakbesik ba Jeová no kontente halaʼo moris neʼebé simples. Rezultadu mak ami-nia oan sira mós aprende atu tau fiar ba Jeová.”

 Lucila neʼebé hela iha illa Samar hatete: “Moris kiak laʼós problema bainhira ita serbí Jeová.” Nia hatutan tan dehan “bainhira ita tau uluk Maromak, ita bele kontente no mantein atitude neʼebé pozitivu. Loloos, haʼu kontente haree haʼu-nia estudante Bíblia bele koñese Jeová no tuirmai sai pioneiru hamutuk ho haʼu.”

 Maski iha futuru ita sei hasoru situasaun susar liután, ita bele hetan laran manas husi katuas ida naran Rodolfo neʼebé hakerek: “Haʼu konsege moris liu durante tempu susar iha tinan 1970 toʼo 1980 ba oin, no haʼu haree Jeová nia liman iha haʼu-nia moris. Maski haʼu iha osan uitoan deʼit maibé haʼu la sente kiak. Jeová tau matan didiʼak mai haʼu. Haʼu iha moris neʼebé diʼak liu agora, no haʼu hein namanas ba ‘moris neʼebé loloos’ iha mundu foun neʼebé besik atu mai.”—1 Timóteo 6:19.