Se resposta mak “sin”, entaun karik ema iha kbiit atu hamenus terus.

Ema tenke simu responsabilidade ba buat sira iha kraik neʼebé hamosu terus ka lae?

• Abuzu.

  Organização Mundial da Saúde (WHO) dehan katak, husi ema boot hotu, porsentu 25 sai vítima ba abuzu fíziku bainhira sira sei kiʼik, no husi feto sira hotu, maizumenus porsentu 33 sai vítima ba abuzu fíziku ka seksuál, ka rua-rua, iha sira-nia moris.

• Ema mate.

  Relatóriu ida husi Organização Mundial da Saúde (World Health Statistics 2018) hatete: “Iha tinan 2016, maizumenus ema naʼin-477.000 iha mundu tomak mate tanba ema mak oho.” Neʼe la sura ho ema naʼin-180.000 neʼebé mate iha funu no konflitu iha tinan neʼe.

• Problema ho saúde.

  Iha revista naran National Geographic, hakerek-naʼin Fran Smith dehan katak ema naʼin biliaun ida liu fuma sigarru, no tabaku mak hamosu moras barak neʼebé bele halo ema mate hanesan moras fuan, estrok, no kankru pulmaun.

• La iha igualdade.

  Psikólogu ida naran Jay Watts hatete: “Ema bele sente laran-taridu, taʼuk no depresaun tanba situasaun kiak, la hetan justisa tanba pozisaun iha komunidade, ema haterus malu tanba rasa la hanesan, diskriminasaun ba feto, halai husi uma, no kompete malu.”

  APRENDE LIUTÁN

  Haree vídeo Tanbasá mak Maromak kria mundu? iha jw.org/tdt.

Ema mak simu responsabilidade ba terus barak.

Terus barak mai husi governu sira neʼebé hanehan povu neʼebé loloos sira mak tenke tau matan.

“Ema mak domina ema seluk, no neʼe lori deʼit susar.”​—ECLESIASTES 8:9.

Ita rasik bele hamenus terus barak.

Bíblia nia prinsípiu sira bele ajuda ita atu iha saúde neʼebé diʼak liután no atu iha relasaun diʼak ho ema.

“Laran neʼebé kalma fó moris ba isin, maibé laran-moras mak hanesan moras neʼebé halo dodok ruin sira.”​—PROVÉRBIOS 14:30.

“Hasai tiha husi imi-nia an hahalok odi malu, hirus, laran-nakali, hakilar malu, koʼalia aat, no mós buat hotu neʼebé hakanek malu.”​—ÉFESO 4:31.