“Terone e ne e le boemong ba eona leholimong, ’me ho na le ea lutseng teroneng. Ea lutseng, ka ponahalo, o joaloka lejoe la jaspere le lejoe la bohlokoa le ’mala o mofubelu, ’me ho pota-pota terone ho na le mookoli o joaloka emeralde ka ponahalo.”—Tšenolo 4:2, 3.

“Ho ne ho e-na le ho hong ho bonahalang joaloka seqha se hlahang lerung letsatsing la pula e tšolohang. Ke kamoo ho benya ho neng ho bonahala kateng ka hohle. E ne e le ponahalo ea sebōpeho sa khanya ea Jehova.”—Ezekiele 1:27, 28.

Liponong tseo moapostola Johanne le moprofeta Ezekiele ba li boneng, ho sebelisoa lintho tseo re ka li bonang tse kang majoe a matle, mookoli le boholo ba terone ho tšoantšetsa Molimo Ea Phahameng ka ho Fetisisa e leng Jehova. Li re ruta hore Jehova o lula sebakeng se hlollang ka botle le se nang le khutso.

Litšoantšetso tsena tse buang ka Molimo li lumellana hantle le seo mopesaleme a ileng a se ngola ha a re: “Jehova o moholo ’me o lokela ho rorisoa haholo. O tšabeha ho feta melimo e meng kaofela. Etsoe melimo eohle ea lichaba ke melimo ea lefeela; empa ha e le Jehova, o entse maholimo. Ho hlompheha le bokhabane li ka pel’a hae; matla le botle li sehalalelong sa hae.”—Pesaleme ea 96:4-6.

Le hoja Jehova e le Ea Phahameng ka ho Fetisisa, o batla hore re mo rapele ’me o tšepisa hore o tla mamela lithapelo tsa rōna. (Pesaleme ea 65:2) Molimo o oa re rata ’me o re tsotella haholo. Ke kahoo moapostola Johanne a ileng a re: “Molimo ke lerato.”—1 Johanne 4:8.

“[Morutuoa oa Mokreste e leng Setefane], a tletse moea o halalelang, a talima leholimong ’me a re heli! eaba o bona khanya ea Molimo le ea Jesu a eme ka letsohong le letona la Molimo, eaba o re: ‘Bonang! Ke bona maholimo a bulehile le Mor’a motho a eme ka letsohong le letona la Molimo.’”—Liketso 7:55, 56.

Nakoana pele Setefane a bona pono eo, Jesu o ile a bolaoa ke batho bao Setefane a neng a bua le bona, e leng baeta-pele ba Bajuda. Pono eo e ne e bontša hore Jesu o oa phela le hore o tsositsoe bafung  ’me o fuoe tlhompho. Moapostola Pauluse o ile a ngola a re: “[Jehova] a mo tsosa [Jesu] bafung ’me a mo lulisa ka letsohong la hae le letona libakeng tsa leholimo, ka holimo haholo ho ’muso le bolaoli le matla le borena bo bong le bo bong le lebitso le leng le le leng le bitsoang, eseng feela tsamaisong ena ea lintho, empa hape le ho e tlang ho tla.”—Baefese 1:20, 21.

Mangolo a boetse a bontša hore feela joaloka Jehova, Jesu le eena o tsotella batho haholo. Ha Jesu a le lefatšeng, o ile a folisa batho ba kulang le ba holofetseng a ba a tsosa bafu. O ile a bontša hore o rata Molimo le batho ka hore a shoele batho bohle. (Baefese 2:4, 5) Kaha Jesu o lutse ka letsohong le letona la Molimo, haufinyane o tla sebelisa matla ao Molimo a mo fileng ’ona hore a hlohonolofatse batho ba mamelang.

Moprofeta Daniele o ile a re: “Ka ’na ka talima ho fihlela literone li behoa ’me Moholo-holo oa Matsatsi [Jehova] a lula fatše. . . . Ho ne ho e-na le ba likete tse sekete ba ntseng ba mo sebeletsa, le ba likete tse leshome tse iphetileng ka makhetlo a likete tse leshome ba ntseng ba eme ka pel’a hae.”—Daniele 7:9, 10.

Ponong ena ea leholimo, Daniele o ile a bona mangeloi a mangata. E tlameha ebe eo e ne e le pono e hlollang! Mangeloi ke libōpuoa tsa moea tse bohlale le tse matla. Lihlopha tsa ’ona li akarelletsa lirafime le likerubime. Ka Bibeleng ho buuoa ka mangeloi ka makhetlo a fetang 250.

Mangeloi hase batho ba hlokahetseng ba neng ba phela lefatšeng. Molimo o bōpile mangeloi nako e telele pele batho ba e-ba teng. Mangeloi a ne a le teng ha Molimo a bōpa lefatše ’me a hlaba litlatse.—Jobo 38:4-7.

Tsela e ’ngoe eo ka eona mangeloi a sebeletsang Molimo ke ka ho tšehetsa batho mosebetsing oa bohlokoa ka ho fetisisa e leng oa ho bolela litaba tse molemo tsa ’Muso oa Molimo. (Matheu 24:14) Moapostola Johanne o ile a bona pono e hlalosang hore na mosebetsi oa mangeloi ke ofe. O ile a ngola a re: “Ka bona lengeloi le leng le fofa sebakeng, ’me le ne le e-na le litaba tse molemo tse sa feleng hore le li bolele e le litaba tse nyakallisang ho ba lulang lefatšeng, le ho sechaba se seng le se seng le  moloko o mong le o mong le leleme le leng le le leng le batho ba bang le ba bang.” (Tšenolo 14:6) Le hoja kajeno mangeloi a sa bue le batho joaloka nakong e fetileng, a thusa ba bolelang litaba tse molemo hore ba fumane batho ba lipelo li ntle.

“Ntoa ea qhoma leholimong: Mikaele [Jesu Kreste] le mangeloi a hae ba loana le drakone, ’me drakone le mangeloi a eona ba loana empa ha ea ka ea hlōla, leha e le hore ho ile ha hlola ho fumanoa sebaka bakeng sa bona leholimong. Kahoo drakone e khōlō ea liheloa tlaase, noha ea pele, e bitsoang Diabolose le Satane, e khelosang lefatše lohle leo ho ahiloeng ho lona; ea liheloa tlaase lefatšeng, ’me mangeloi a eona a liheloa tlaase le eona.”—Tšenolo 12:7-9.

Ho na le nako eo khotso e neng e le sieo leholimong. Qalong ea histori ea batho, lengeloi le leng le ile la e-ba le takatso ea ho rapeloa eaba le furalla Jehova. Le ile la bitsoa Satane, e bolelang “Mohanyetsi.” Hamorao, mangeloi a mang le ’ona a ile a mo latela ’me a fetoha bademona. Kaha ba khopo, ba hanyetsa Jehova ’me ba susumelletsa batho hore ba phele ka tsela e sa mo khahliseng.

Satane le bademona ba hae ba khopo ebile ba sehlōhō. Ke lira tsa batho tse ba baketseng mathata a mangata. Ho etsa mohlala, Satane o ile a bolaea liphoofolo tsa Jobo ea tšepahalang hammoho le bahlanka ba hae. Hape, o ile a sebelisa “moea o moholo” ho heletsa ntlo eo bana ba Jobo ba leshome ba neng ba le ka har’a eona, ’me ea ba bolaea. Ka mor’a moo, Satane o ile a otla Jobo ka “mathopa a bolaeang ho tloha bohatong ba leoto ho ea har’a hlooho.”—Jobo 1:7-19; 2:7.

Haufinyane Satane o tla felisoa. O oa tseba hore “o na le nako e khutšoanyane.” (Tšenolo 12:12) Satane a ke ke a atleha ’me tseo ke litaba tse monate.

Ha Bibele e bua ka Jesu e re: “Ua rekela Molimo batho molokong o mong le o mong le lelemeng le leng le le leng le bathong ba bang le ba bang le sechabeng se seng le se seng, ’me ua ba etsa hore e be ’muso le baprista ho Molimo oa rōna, ’me ba tla busa e le marena holim’a lefatše.”—Tšenolo 5:9, 10.

Joaloka ka Jesu, batho ba bang ba tla tsosetsoa ho ea phela leholimong. Jesu o ile a re ho baapostola ba hae ba tšepahalang: “Ke il’o le lokisetsa sebaka. Hape, . . . ke tla boela ke tle ’me ke tla le amohela lapeng ho ’na, e le hore moo ke leng teng le lōna le ka ba teng.”—Johanne 14:2, 3.

Ho na le mosebetsi oo batho ba eang leholimong  ba il’o o etsa. Ba tla busa le Jesu ’Musong oa leholimo, oo haufinyane o tlang ho busa batho ’me o tlise litlhohonolofatso tse ngata. Ke oona ’Muso oo Jesu a boleletseng balateli ba hae hore ba o rapelle thapelong ea mohlala. O ile a re: “Ntat’a rōna ea maholimong, lebitso la hao le ke le halaletsoe. ’Muso oa hao o ke o tle. Thato ea hao e ke e etsahale lefatšeng, joalokaha e etsahala leholimong.”—Matheu 6:9, 10.

Moapostola Johanne o ile a re: “Eaba ke utloa lentsoe le phahameng le tsoang teroneng le re: ‘Bonang! Tente ea Molimo e ho moloko oa batho, . . . o tla hlakola meokho eohle mahlong a bona, lefu ha le sa tla hlola le e-ba teng, ’me ho siama kapa ho bokolla kapa bohloko ha li sa tla hlola li e-ba teng. Lintho tsa pele li fetile.’”—Tšenolo 21:3, 4.

Pono ena e bua ka nako eo ka eona ’Muso oa Molimo o entsoeng ka Jesu le batho ba khethiloeng ho ea busa le eena, o tlang ho felisa Satane ’me o etse lefatše paradeise. Lintho tse re bakelang bohloko le mahlomola li tla fela. Le lefu ha le sa tla hlola le e-ba teng.

Empa ho tla etsahala’ng ka batho ba libilione ba hlokahetseng ba sa kang ba tsosetsoa leholimong? Ba tla tsosetsoa ho phela ka ho sa feleng lefatšeng la Paradeise.—Luka 23:43.