NA U bona seo Abrahama a se etsang moo? O nkile thipa, ’me ho bonahala eka o tlil’o bolaea mora oa hae. Ke hobane’ng ha a etsa seo? A re ke re bone hore na ho tlile joang hore Abrahama le Sara ba be le mora.

Hopola hore Molimo o ile a ba tšepisa hore ba tla ba le mora. Empa ho ne ho bonahala eka seo ha se na ho etsahala kaha Abrahama le Sara ba ne ba se ba tsofetse. Leha ho le joalo, Abrahama o ne a lumela hore Molimo a ka etsa ntho eo ho bonahalang eka e ke ke ea etsahala. Joale ha etsahala’ng?

Ka mor’a hore Molimo a etse tšepiso eo, ho ile ha feta selemo. Joale ha Abrahama a le lilemo li 100 ’me Sara a le lilemo li 90, ba ile ba e-ba le ngoana oa moshemane ea bitsoang Isaka. Molimo o ne a phethile tšepiso ea hae!

Empa ha Isaka a se a hōlile, Jehova a leka tumelo ea Abrahama. A mo bitsa a re: ‘Abrahama!’ Abrahama a araba a re: ‘Ke ’na enoa!’ Eaba Molimo o re: ‘Nka mora oa hao, mora oa hao ea mong, Isaka, ’me u ee thabeng eo ke tla u bontša eona. Ebe moo u bolaea mora oa hao, u mo etse sehlabelo.’

Mantsoe ao a ile a utloisa Abrahama bohloko, kaha o ne a rata mora oa hae haholo. U hopole hape hore Molimo o ne a tšepisitse hore bana ba Abrahama ba tla lula naheng ea Kanana. Empa seo se ne se tla etsahala joang haeba Isaka a shoele? Abrahama o ne a sa utloisise, empa leha ho le joalo a mamela Molimo.

Eitse ha a fihla thabeng, Abrahama a tlama Isaka ’me a mo beha aletareng eo a e hahileng. Eaba o ntša thipa ho bolaea mora oa hae. Empa hona hoo lengeloi la Molimo la hoeletsa la re: ‘Abrahama, Abrahama!’ Abrahama a araba a re: ‘Ke ’na enoa!’

Molimo a re: ‘U se ke ua ntša moshanyana kotsi kapa ua mo etsa letho. Joale kea tseba hore u na le tumelo ho ’na, hobane ha ua nkhanela ka mor’a hao ea mong feela.’

Abrahama o ne a e-na le tumelo e matla hakaakang ho Molimo! O ne a lumela hore ha ho letho leo Jehova a ka sitoang ho le etsa le hore Jehova o ne a ka tsosa Isaka bafung. Empa ha e le hantle Molimo o ne a sa batle hore Abrahama a bolaee Isaka. Kahoo Molimo o ile a etsa hore nku e tšoasoe lihlahleng tse haufi le moo, ’me a re Abrahama a etse sehlabelo ka eona eseng ka mora oa hae.