Ia Mafuta Atu i le Atua

E ʻInoʻino Ieova i Faiga Lē Tonu

ʻUA PULE le tagata i le isi tagata ma ua matuā afāina ai o ia.’ (Failauga 8:9) O nei upu na tusia e tusa ma le 3,000 tausaga ua mavae, ua faamatalaina ai le tulaga moni o le lalolagi o loo tatou ola ai. Ua faaaogā sesē e tagata lo latou tulaga pule e tusa lava po o ai i latou, po o fea foʻi e ō mai ai, e ala i le faileagaina o tagata faatauvaa ma lima vaivai. O ā faalogona o Ieova e faatatau i na faiga lē tonu? E tatou te maua le tali i le Esekielu 22:6, 7, 31.—Faitau.

Na faaalia manino e Ieova i lana Tulafono na tuu atu iā Isaraelu le lē tatau i taʻitaʻi ona faaaogā sesē la latou pule. E faatoʻā ia faamanuia i le nuu, pe afai e feutagaʻi taʻitaʻi i se auala agalelei ma magafagafa ma ē e faatauvaa ma matitiva. (Teuteronome 27:19; 28:15, 45) Peitaʻi i aso o Esekielu, sa faaaogā sesē e taʻitaʻi i Ierusalema ma Iuta la latou pule i ni auala e matuā lē talafeagai. E faapefea?

Sa faaaogā e taʻitaʻi o latou “lima [mo] le faamasaaina o le toto.” (Fuaiupu e 6) O le upu “lima,” ua faaāta mai ai le malosi po o le pule. Ua faapea mai se isi faaliliuga: “Sa faaaogā e perenise o Isaraelu . . . la latou pule e faamasaa ai le toto.” E faapefea la ona iai le faamasinotonu, pe afai e solomua i taʻitaʻi, o ē e tatau ona tausia ma faatāuaina le tulafono, le faaaogā sesē o le pule ma fasiotia tagata e lē sala?

Mulimuli ane, sa taʻusalaina e Esekielu taʻitaʻi, faapea ma isi na lē usiusitaʻi i le Tulafono a Ieova. Ua faapea mai Esekielu: “Ua latou ʻinoʻino i tamā ma tinā.” (Fuaiupu e 7) Talu ai e leʻi amanaʻia e tagata le aiā e pule ai mātua, ua latou lepetia ai aiga, o le faavae malosi lenā o se nuu.—Esoto 20:12.

Sa faileagaina e tagata leaga nai tagata faatauvaa, ma o so o se taimi na lē usitaʻia ai le Tulafono, na faaalia ai le lē amanaʻia o le fuafuaga alofa na faia ai e le Atua le Tulafono mo Isaraelu. O se faaaʻoaʻoga, sa faatonuina tagata Isaraelu e manatu mamafa i tagata o loo aumau ma i latou. (Esoto 22:21; 23:9; Levitiko 19:33, 34) Peitaʻi, na latou “ave faagaoi” mea a tagata aumau.—Fuaiupu e 7.

Sa latou agaleaga foʻi i ē ua lē mafesoasoania, o le “tama ua leai sona tamā ma le fafine ua oti lana tane.” (Fuaiupu e 7) E manatu mamafa Ieova i manaʻoga o sē ua maliu lona matua po o se paaga faaipoipo. Na folafola mai e Ieova lava ia, o le a ia aumaia le faamasinoga i ē e faapuapuagatiaina le tama ua leai sona fesoasoani, po o le fafine ua oti lana tane.—Esoto 22:22-24.

O nisi nei o auala na solia ma faaalia ai le lē faaaloalo o tagata Isaraelu i aso o Esekielu, i le Tulafono a le Atua lea na faavae i le alofa. O le ā o le a faia e Ieova? Na ia folafola mai: ʻOu te sasaa ifo iā i latou aʻu faasalaga.’ (Fuaiupu e 31) Na faataunuu e Ieova lana folafolaga, e ala i le faataga o ʻautau a Papelonia e faaumatia Ierusalema, ma ave faapagota ona tagata i le 607 T.L.M.

Ua tatou aʻoaʻoina mai i upu a Esekielu ni lesona se lua e uiga iā Ieova e tusa ma faiga lē tonu. Muamua, e ʻinoʻino o ia i faiga lē tonu. Lona lua, e alofa mutimutivale o ia i ē e aafia fua i faiga lē tonu, ma e lē sui lava o ia. (Malaki 3:6) Ua folafola mai e Ieova ua toeitiiti ona ia aveesea lea o faiga lē tonu ma ē e faapogaia. (Faataoto 2:21, 22) O lea la, seʻi o tatou aʻoaʻo atili e faatatau iā Ieova o lē e fiafia i le faamasinogatonu, ma le auala e mafuta vavalalata atu ai iā te ia.—Salamo 37:28.

Faitauga Tusi Paia mo Aokuso:

▪ Esekielu 21-38

[Faamatalaga faaopoopo i le itulau 27]

Na faaalia manino mai e Ieova le lē tatau i taʻitaʻi ona faaaogā sesē la latou pule