Esoto 22:1-31
22 “Pe afai e gaoi e se tamāloa se povi poʻa, po o se mamoe ma ia fasia pe e faatau atu foʻi, e na te totogi atu i povi poʻa e lima mo le povi poʻa e tasi, ma mamoe e fā mo le mamoe e tasi.+
2 (“Pe afai e maua se gaoi+ o osofaʻia se fale, ae ua tā o ia ma oti ai, e lē nofosala i le toto lē na tāina o ia.
3 Ae afai e na te osofaʻia le fale ae ua alu aʻe le lā, e nofosala i le toto lē na tāina o ia.)
“Ia avatu e le tagata gaoi se totogi. Afai e leai sana mea, ona ia faatau atu lea o ia mo mea ua ia gaoia.
4 Afai e maua iā te ia mea ua gaoia, e tusa po o se povi poʻa, o se asini, po o se mamoe ae o loo ola pea, e tatau ona faalua ona totogi atu.
5 “Pe afai e tuu e se tamāloa ana manu e taaloa i se fanua po o se togāvine, ma ua taaloa i le fanua o se isi tagata, e ao ona ia totogi atu i faaeleeleaga e sili ona lelei mai i lona lava fanua, po o fua e sili ona lelei o lona lava togāvine.
6 “Afai e tutu e se tasi se afi ma oo atu i laau tuitui ma sosolo atu i fusi saito, ma togāsaito, pe mū atoa le fanua, e toe totogi atu e lē na tutuina le afi mea ua mū.
7 “Afai e avatu e se tamāloa i lona tuaoi ni tupe po o ni mea e na te vaavaaia, ae ua gaoia mai i le fale o le tuaoi, afai e maua le gaoi, e ao ona ia faaluaina mea e totogi atu.+
8 Afai e lē maua le gaoi, ona aumaia lea o lē e ona le fale i luma o le Atua moni,+ ina ia iloa ai pe na tago o ia i oloa a lona tuaoi.
9 Pe a tuua‘ia se tasi i le gaoia o ni oloa, o se povi poʻa, o se asini, o se mamoe, o se ofu, po o so o se mea ua leiloa, lea e mafai ona faapea mai se tasi, ‘O aʻu mea nei!’ e ao ona aumaia la laʻua mataupu i luma o le Atua moni.+ O lē e faailoa mai e le Atua o le tagata solitulafono, e ao ona ia faaluaina mea e totogi atu i lona tuaoi.+
10 “Pe afai e avatu e se tamāloa i lona tuaoi se asini, po o se povi poʻa, po o se mamoe, po o se manu e lata e na te vaavaaia, ae ua mate po ua pipili pe puʻea e aunoa ma le iloa e se tasi,
11 e ao ona la faia se tautoga i luma o Ieova e na te le‘i tago i oloa a lona tuaoi; ma e ao ona talia e lē e ana mea. E lē avatua e lē na vaavaaia mea se totogi.+
12 Ae afai e moni ua gaoia mai iā te ia a o ia vaavaaia, e ao ona ia totogi atu i lē e ana ia manu.
13 Afai e saeia lea manu e se manu o le vao, e ao ona ia aumaia e fai ma faamaoniga. E lē tatau ona ia avatua se totogi mo se mea e saeia e se manu o le vao.
14 “Ae afai e faanoi e se tasi se manu mai i lona tuaoi, ae ua pipili pe e mate ae e lē o iai lē e ona lea manu, e ao i le tagata na faanoi ona totogi atu le manu.
15 Afai o iai lē e ona lea manu, e lē totogiina atu se mea. Ae afai na totogi le faaaogāina o le manu, e pau lenā o le tau e ao ona totogi.
16 “Afai e faaōleōle e se tamāloa se taupou e leʻi faamau ma ua la momoe ai, e ao ona ia totogiina le tau o le teine faaipoipo ina ia fai ai o ia ma ana avā.+
17 Afai e matuā musu lona tamā e avatu lona afafine iā te ia, e ao ona ia totogi atu pea le tau o le teine faaipoipo.
18 “Aua e te tuu se fafine faataulāitu ia ola pea.+
19 “O so o se tasi e feusuaʻi ma se manu, ia fasiotia lava o ia.+
20 “O so o se tasi e fai taulaga i se isi atua, e tatau ona faaumatia o ia,+ auā e na o Ieova e ao ona fai taulaga i ai.
21 “Aua e te agaleaga i se tagata ese ua aumau pe faasauā iā te ia,+ auā na avea outou ma tagata ese na aumau i Aikupito.+
22 “Aua e te faapuapuagatia se fafine ua oti lana tane po o se tama ua leai sona tamā.*+
23 Afai e te faapuapuagatia lava iā te ia, ma e alaga mai o ia iā te aʻu, ou te faalogo lava i lana alaga;+
24 ona ou matuā ita ai lea, ma ou te fasiotia outou i le pelu, e avea a outou avā ma fafine ua feoti a latou tane, ma a outou fanau ua leai ni tamā.
25 “Afai e te nonō atu tupe i sē e mativa* o oʻu tagata, o loo nonofo faatasi ma oe, e lē tatau ona e pei o sē e fai pisinisi i le nonōina o tupe iā te ia. Aua e te tāpā mai iā te ia se totogi faasili.+
26 “Afai e te ave le ofu o lou tuaoi e fai ma mea e faamau ai se aitalafu,+ e tatau ona e toe faafoʻi atu iā te ia i le taimi e goto ai le lā.
27 Auā e na o le pau lea o le mea e ufiufi ai lona tino.* O le ā le mea e moe ai o ia+ pe afai e lē avatua i ai lona ofu? Pe a ia tagi mai iā te aʻu, ou te faalogo lava iā te ia, auā ou te alofa mutimutivale.*+
28 “Aua e te fetuu* i le Atua+ pe fetuu i se taʻitaʻi ua iā te outou.+
29 “Aua e te faatalatū e faia taulaga mai i le tele o au faaeleeleaga, ma le tele o au suāvine ma au suāolive.+ O le ulumatua a ou atalii e te aumaia iā te aʻu.+
30 Ia faapenei ona e faia i lau tamaʻi povi poʻa ma lau tamaʻi mamoe:+ Ia tuu pea i lona tinā i aso e fitu. Ae i le aso lona valu, ia e aumaia ai iā te aʻu.+
31 “Ia fai outou ma oʻu tagata paia;+ ia aua neʻi outou aai i le aano o se manu ua saeia i le fanua e se manu o le vao.+ Ia lafo i taʻifau e aai ai.
Faamatalaga Pito i Lalo
^ Po o le “ua mātuaoti.”
^ Po o “sē ua faapuapuagatia.”
^ Epe., “paʻu.”
^ Po o le “alofa fua.”
^ Po o le “fai upuleaga.”
