Se Lalolagi Parataiso ua Lata Mai!

“Lo matou Tamā e o i le lagi, ia faapaiaina lou suafa. Ia oo mai lou malo. Ia faia lou finagalo i le lalolagi, e pei ona faia i le lagi.”—Mataio 6:9, 10.

O LE tatalo faaaʻoaʻo lenei, lea ua tele ina iloa e tagata o le Tatalo a le Alii, o loo aumaia ai se faamoemoe mo tagata. E faapefea?

E pei ona taʻua i le Tatalo a le Alii, e mautinoa o le a faapogaia e le Malo o le Atua le faia o le finagalo o le Atua i le lalolagi, e pei lava ona faia i le lagi. Ma o le finagalo o le Atua ia toe avea le lalolagi ma Parataiso. (Faaaliga 21:1–5) O le ā tonu lava le Malo o le Atua, ma e faapefea ona toe faafoʻisia mai e lenā Malo le Parataiso i le lalolagi?

O se Faigāmalo Moni

O le Malo o le Atua, o se faigāmalo moni lava. Ina ia faagaoioia se faigāmalo, e ao ona iai ni ona pule, tulafono, ma tagatānuu. Pe e iai nei mea i le Malo o le Atua? Mātau le tali a le Tusi Paia i fesili nei e tolu:

O ai pule o le Malo o le Atua? (Isaia 33:22) Ua tofia e Ieova le Atua lona Atalii o Iesu Keriso, ina ia pulea le Malo. (Mataio 28:18) I lalo o le taʻitaʻiga a Ieova, ua filifilia ai e Iesu se aofaʻiga toʻaitiiti o tagata mai “i ituaiga uma, ma gagana uma, ma nuu uma, ma atunuu uma” o ē o le a pule faatasi ma ia o ni “tupu i le lalolagi.”—Faaaliga 5:9, 10.

O ā tulafono ua faatūina e le Malo o le Atua ina ia usitaia e ona tagatānuu? O nisi tulafono po o poloaʻiga, e tatau ona faia ai ni gaoioiga patino. Sa faamatilatila e Iesu le tulafono pito sili ona tāua o na tulafono: “‘Ia e alofa atu iā Ieova lou Atua ma lou loto atoa, ma lou ola atoa, ma lou mafaufau atoa.’ O le poloaʻiga silisili ma le muamua lenā. E faapena foʻi le poloaʻiga lona lua, ‘Ia e alofa atu i lou tuaoi e pei o oe lava iā te oe.’”—Mataio 22:37-39.

 O isi tulafono, e tatau mo tagatānuu o le Malo o le Atua ona ʻalofia nisi o gaoioiga. Mo se faaaʻoaʻoga, o loo aumaia i le Tusi Paia le faatonuga manino lenei: “Aua neʻi faasesēina outou. O ē e faitaaga, o ē e ifo i tupua, o ē e mulilulua, o tauatane, o tane e momoe ma isi tane, o ē e gāoi, o ē e matapeʻapeʻa, o ē e onanā, o ē e fai upu masoā, ma ē e taufaavalea, e lē fai mo latou tofi le malo o le Atua.”—1 Korinito 6:9, 10.

O ai tagatānuu o le Malo o le Atua? Na faatusaina e Iesu tagatānuu o le Malo o le Atua i mamoe. Na ia faapea mai: “Latou te faalogo i loʻu leo, ona avea ai lea o i latou ma lafu e tasi, ma le leoleo mamoe e toʻatasi.” (Ioane 10:16) Ina ia avea ma tagatānuu o le Malo o le Atua, e lē lava le fai mai o se tasi e mulimuli iā Iesu le Leoleo Mamoe Lelei, ae e ao foʻi ona ia faia mea o loo ia poloaʻi mai e fai. Na fetalai Iesu: “E lē ulu atu i le malo o le lagi i latou uma o ē fai mai iā te aʻu, ‘⁠Le Alii e, le Alii e,’ ae na o lē na te faia le finagalo o loʻu Tamā o i le lagi.”—Mataio 7:21.

O lea la, e ao i tagatānuu o le Malo o le Atua ona faaaogā ma faamamaluina le suafa o le Atua, o Ieova, e pei lava ona faia e Iesu. (Ioane 17:26) E latou te usitaʻia le faatonuga a Iesu ina ia aʻoaʻo isi e faatatau i “lenei tala lelei o le malo.” (Mataio 24:14; 28:19, 20) Ma e latou te faaalia le alofa māfana mo le tasi i le isi.—Ioane 13:35.

O le a ‘Faafanoina i Latou o Loo Faaleagaina le Laueleele’

O mea o loo tutupu i le lalolagi, ua faailoa mai ai ua toeitiiti ona gaoioi lea o le Malo o le Atua e aumai suiga mataʻina i le lalolagi. E faapefea ona tatou iloa lenā mea? I le luaafe tausaga ua tuanaʻi, na faamatala ai e Iesu se faailoga e tele ona vala, lea e faailoa ai “ua latalata mai le malo o le Atua.” (Luka 21:31) E pei ona taʻua i le mataupu na muamua atu, ua matuā manino le faamaonia mai o vala o lenā faailoga i aso nei.

Ona sosoo ai lea ma le ā? Na tali Iesu e faapea: “Ona e tupu le puapuaga tele lea e leai sona tusa talu le amataga o le lalolagi, e oo mai lava i aso nei, ma e lē toe tupu foʻi se mea faapea.” (Mataio 24:21) E lē o se puapuaga tele e faia e se tagata. Ae o le gaoioiga a le Atua e “faafanoina ai i latou o loo faaleagaina le laueleele.” (Faaaliga 11:18) O tagata amioleaga lea latou te faaleagaina le lalolagi paneta, o le a ‘vavaeeseina ai le laueleele.’ A o tagata amiotonu, o ē auauna i le Atua e tusa ma lona finagalo, o le a “faatotoeina ai i latou.”—Faataoto 2:21, 22.

Ua taʻutonuina Ieova le Atua i le faatinoina o lea gaoioiga mataʻutia. Aiseā? Seʻi manatu i le faataʻitaʻiga lenei: Seʻi faapea o oe o le pule o se tamaʻi fale mautotogi. O isi tagata mautotogi e lelei a latou amio ma manatu mamafa i isi; e latou te totogi le fale ma tausia faalelei. Ae o isi tagata mautotogi e faaleagamea ma manatu faapito; e latou te mumusu e totogi le fale ma taumafai e faaleaga le fale. E fiu lava e lapataʻi atu, ae o loo faaauau pea a latou amioga leaga. O le ā o le a e faia? Ona o oe o le pule, e mautinoa lou tutuliesea o na tagata mautotogi leaga.

E faapena foʻi Ieova le Atua, ona o ia o Lē na faia le lalolagi ma mea uma o loo iai, e iai lana aiā e filifili ai po o ai o le a ia faataga e nonofo i le lalolagi. (Faaaliga 4:11) Na fetalai Ieova, o lana fuafuaga le aveesea o tagata amioleaga mai lenei lalolagi, o ē lē amanaʻia lona finagalo ma fia pule i mea e aiā i ai isi tagata.—Salamo 37:9–11.

Toe Faafoʻisia le Parataiso

E lē o toe mamao ona pulea loa lea o le lalolagi e le Malo o le Atua e ala mai iā Iesu. Sa taʻua e Iesu lenei amataga fou o le ‘⁠toe faafouina o mea uma.’ (Mataio 19:28) O ā tulaga o le a iai i lenā taimi? Mātau folafolaga nei a le Tusi Paia:

Salamo 46:9. “Ua faaiʻua e ia o taua e oo lava i tuluʻiga o le lalolagi.”

 Isaia 35:1. “E olioli ona o i latou le vao lafulafuā, ma le nuu naumati; e fiafia le toafa, ma fua mai e pei o le aute.”

Isaia 65:21–23. “E uma lava i ē ua filifilia e aʻu o mea na faia e o latou lima. Latou te lē galulue fua, latou te fananau, a e lē tupu ai le atuatuvale.”

Ioane 5:28, 29. “Auā e oo mai le itula e faalogo ai i latou uma o loo i tuugamau i lona [Iesu] leo ma latou ō mai ai.”

Faaaliga 21:4. “E na te [le Atua] soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā.”

Māfuaaga e Talitonu Ai

Po ua e talitonu i folafolaga a le Tusi Paia? Sa folafola mai e le Tusi Paia o le a toʻatele e lē talitonu i ai. O loo taʻua ai faapea: “O aso e gata ai e ō mai ai tagata tauemu . . . ma ua latou faia faapea e tusa ai ma o latou lava tuʻinanauga ma faapea ane: ‘⁠Na folafola mai o ia e afio mai, ae o fea o iai? Auā e mai le aso na maliliu ai o tatou augātamā, e leai lava se mea o suia talu mai le foafoaga o le lalolagi.’” (2 Peteru 3:3, 4) Peitaʻi, sa matuā sesē lava na tagata tauemu. Seʻi mātau māfuaaga nei e fā e ao ai ona e talitonu i mea o loo fai mai ai le Tusi Paia:

(1) Sa gaoioi le Atua i taimi ua teʻa faasaga i tagata amioleaga i le lalolagi. Ua avea le Lolo i aso o Noa ma faaaʻoaʻoga mataʻina o lenā gaoioiga.—2 Peteru 3:5-7.

(2) Na matuā saʻo lelei le folafolaina mai e le Afioga a le Atua o mea o loo tutupu i le lalolagi.

(3) Ua suia mea “talu mai le foafoaga o le lalolagi.” O se mea e leʻi tupu muamua lava, le matuā aafia o lo tatou paneta ona o tulaga tau i le vafealoaʻi, tau amio, ma le faaleagaina o le siʻosiʻomaga.

(4) Ua talaʻia atu nei le “tala lelei o le malo” i le lalolagi aoao, o se faailoga o le lalata ona ‘⁠oo mai o le iʻuga.’—Mataio 24:14.

E valaaulia ma le māfana lau susuga e Molimau a Ieova e suʻesuʻe ma i latou le Afioga a le Atua, le Tusi Paia, ina ia e silafia atili ai e faatatau i le faamoemoe o le ola e faavavau i lalo o le pulega a le Malo o le Atua. (Ioane 17:3) Ioe, o se lumanaʻi matagofie o le a maua e tagata. Ua lata mai taimi sili ona lelei! Po o le a e iai i lenei lumanaʻi?

[Faamatalaga faaopoopo i le itulau 7]

O i latou e faapea mai o le a tumau pea e lē suia mea e pei ona sa iai, e matuā sesē lava i latou

[Ata i le itulau 8]

Po o le a e iai i lenei lumanaʻi?