Fesili Mai le ʻAufaitau

Po o le a Faasaoina le Lalolagi?

O le a lē faaumatiaina lo tatou Lalolagi paneta i se faalavelave mataʻutia. Aiseā tatou te mautinoa ai i lea manatu? Auā ua folafola mai e le Atua e faatatau i le lalolagi e “lē gaee e faavavau faavavau lava.” (Salamo 104:5) O loo faapea mai le Tusi Paia, e ui lava e “mavae atu le tasi tupulaga, a e sau le tasi tupulaga; a o le lalolagi e tumau lea e faavavau.”—Failauga 1:4.

I le Salamo 104:5, o loo faamatala ai le lalolagi i upu Eperu e lua o le—ʽoh·lamʹ mo le taimi e lē gata mai ma le ʽadh mo le “faavavau lava.” E mafai ona faaliliu le ʽOh·lamʹ i le “tele o tausaga” po o le “lē muta.” E tusa ai ma le tusi Harkavy’s Students’ Hebrew and Chaldee Dictionary, o le uiga o le ʽadh o le “umi, e lē mavae atu, tumau e faavavau, faavavau lava.” O loo faaalia mai i nei upu Eperu e lua, e mautinoa lava le tumau o le lalolagi. Seʻi tagaʻi i ni māfuaaga atili se tolu mai le Tusi Paia, e mafai ai ona tatou talitonu o le a tumau e faavavau le lalolagi.

Muamua lava, na foafoaina e le Atua le lalolagi ina ia ʻaināina e tagata, e lauolaola, ma avea ma parataiso le lalolagi aoao e olioli ai, ae lē o se nofoaga e tuufua. O loo faamatalaina e le Isaia 45:18 Ieova “o lē na faia le lagi; o ia lava o le Atua; o le tufuga o lē na faia le lalolagi; o ia na faatumauina; na ia lē faia fua, na ia faia ina ia ʻainā, o aʻu o Ieova, a e leai se tasi.”

Lona lua, ua folafola mai e le Atua i tagata, o i latou uma e filifili e usiusitaʻi iā te ia, o le a tumau e faavavau i le filemu i le lalolagi. O le folafolaga o loo i le Mika 4:4: “A e taʻitasi ma nofo i lalo o lona vine, ma lalo o lona mati; e leai foʻi se na te faamataʻu mai; auā ua faapea ona tulei mai ai le siʻufofoga o Ieova o ʻau.” E tusa ai ma le fuafuaga a le Atua, e tatau ona avea pea le lalolagi ma nofoaga tumau mo tagata, auā a lē faia faapea o lona uiga, ua iʻuvale ana folafolaga.—Salamo 119:90; Isaia 55:11; 1 Ioane 2:17.

Lona tolu, ua tuuina mai e le Atua le vaavaaiga o le lalolagi i tagata. O loo faapea mai le Afioga a le Atua, “O le lagi, o le lagi lava, e iā Ieova lea; a ua tuuina mai e ia le lalolagi mo le fanau a tagata.” (Salamo 115:16) Pe mafai e se tamā alofa na ave sana meaalofa i sona alo, ona ia toe liliu atu ma faaleagaina lenā meaalofa? E mautinoa lava e leai! E faapena foʻi Ieova, e lē mafai ona ia faia se mea faapena i le lalolagi ma tagata o loo nonofo ai, “auā o le Atua o le alofa lava ia.”—1 Ioane 4:8.

Na tuuina mai e Iesu lenei faamautinoaga e faatatau i fetalaiga a lona Tamā: “O lau afioga o le upu moni lea.” (Ioane 17:17) Ua folafola mai e le Atua o lē e lē mafai ona pepelo: “E fai lava le nuu mo tagata amiotonu, e nonofo ai pea i latou.”—Salamo 37:29; Tito 1:2.

[Ē Ana le Ata i le itulau 31]

Globe: E tusa ma le ata mai le NASA