O le Tusi Muamua a Ioane 4:1-21
4 Le ʻaupele e, aua tou te talitonu i upu uma mai i agaga,+ ae ia tofotofo i upu mai i agaga ina ia iloa ai pe e mai i le Atua,+ auā e toʻatele perofeta pepelo ua ō atu i le lalolagi.+
2 O le mea lenei e tou te iloa ai upu mai i le agaga o le Atua: O upu uma mai i agaga o loo taʻutino mai e faapea na afio mai Iesu Keriso o se tagata, e mai i le Atua.+
3 A o upu uma mai i agaga e lē taʻutino na afio mai Keriso o se tagata, e lē mai i le Atua.+ O upu foʻi nei mai i le agaga o le anetikeriso,* ia na outou faalogo o le a oo mai,+ ma ua iai nei i le lalolagi.+
4 Le fanau e, e mai i le Atua lava outou, ma ua outou manumalo i tagata na,+ auā o lē e autasi ma outou+ e sili o ia i lē e autasi ma le lalolagi.+
5 E mai i le lalolagi i latou;+ o le mea lea latou te tautatala ai i mea mai i le lalolagi, ma e faalogo le lalolagi iā i latou.+
6 O i tatou e mai i le Atua. O lē e iloa le Atua e faalogo mai o ia iā i tatou;+ a o lē e lē mai i le Atua, e lē faalogo mai o ia iā i tatou.+ O le auala lenei e tatou te iloa ai le eseesega o upu moni mai i le agaga, ma upu sesē mai i le agaga.+
7 Le ʻaupele e, seʻi faaauau ona alofa le tasi i le isi,+ auā o le alofa e mai i le Atua, ma o i latou uma e alolofa ua fananau mai i latou mai le Atua, ma ua latou iloa le Atua.+
8 O lē e lē alofa, e na te lē iloa le Atua, auā o le Atua o le alofa lava ia.+
9 O le mea lenei ua faaalia mai ai le alofa o le Atua iā i tatou, auā na auina mai e le Atua lona Atalii e toʻatasi+ i le lalolagi, ina ia tatou maua ai le ola e ala iā te ia.+
10 O le alofa lava lenei, e lē ona ua tatou alolofa i le Atua, ae ona ua alofa mai o ia iā i tatou ma auina mai lona Alo e fai ma taulaga o le leleiga ma le Atua*+ mo a tatou agasala.+
11 Le ʻaupele e, afai ua faapea ona alofa mai o le Atua iā i tatou, ua tatau ai la ona tatou alolofa o le tasi i le isi.+
12 E leai lava se tasi ua vaai i le Atua.+ Afai e faaauau ona tatou alolofa o le tasi i le isi, e tumau pea le Atua iā i tatou, ma e atoatoa foʻi ona tatou faaalia lona alofa.+
13 O le mea lenei ua tatou iloa ai o loo tumau ona tatou autasi ma ia, o ia foʻi ua autasi ma i tatou, auā ua ia foaʻi mai lona agaga iā i tatou.
14 E lē gata i lea, ua matou vāai ma molimau atu e faapea, na auina mai e le Tamā lona Alo e fai ma faaola o le lalolagi.+
15 O sē e taʻutino atu o Iesu o le Alo o le Atua,+ e tumau ona autasi le Atua ma lenā tagata, ma e autasi foʻi o ia ma le Atua.+
16 O i tatou foʻi, ua tatou iloa ma talitonu i le alofa o le Atua iā i tatou.+
O le Atua o le alofa lava ia,+ ma o lē e tumau i le alofa e tumau ona autasi o ia ma le Atua, ma e tumau foʻi ona autasi o le Atua ma ia.+
17 O le mea lenei ua atoatoa ai ona tatou faaalia le alofa, ina ia tatou saʻoloto ai e tautatala atu*+ i le aso o le faamasinoga, auā e pei o Iesu Keriso, e faapea foʻi i tatou i lenei lalolagi.
18 E lē fefe le alofa,+ a o le alofa atoatoa e aveesea* ai le fefe, auā o le fefe e taofiofia ai i tatou. O le mea moni, o lē e fefe e lē atoatoa ona ia faaalia le alofa.+
19 Ua tatou alolofa auā na muaʻi alofa mai le Atua iā i tatou.+
20 Afai e faapea mai se tasi, “Ou te alofa i le Atua,” ae e ʻinoʻino i lona uso, o ia o le pepelo.+ Auā o lē e lē alofa i lona uso,+ o lē ua ia vaai atu i ai, e lē mafai ona ia alofa i le Atua, o lē ua ia lē vaai atu i ai.+
21 O le poloaʻiga foʻi lenei ua tatou maua mai iā te ia, o lē e alofa i le Atua e tatau foʻi ona alofa i lona uso.+
Faamatalaga Pito i Lalo
^ E faasino atu i lē e tetee iā Keriso.
^ Po o le “taulaga o le togisala.”
^ Po o le “maua ai le mautinoa.”
^ Po o le “faateʻa.”
