Tatou te Manaʻomia le Faalapotopotoga a Ieova

PO UA e faalogo ea i se tasi o faapea mai, “ou te talitonu i le Atua ae ou te lē talitonu i se lotu ua faamaopoopoina”? O manatu faapena ua masani ona faaalia e tagata o ē sa iai se vaitaimi na avea ai ma tagata maelegā e ō i lotu ae ua lē mautonu ona o le lē taulau o a latou lotu e faamalieina o latou manaʻoga faaleagaga. E ui ua lē fiafia i faalapotopotoga lotu i se tulaga lautele, ae o le toʻatele lava ua taofi o loo mananaʻo pea i latou e tapuaʻi i le Atua. E ui i lea, ua talitonu i latou faapea e sili ona tapuaʻi i le Atua i a latou lava auala na i lo le tapuaʻi atu a o auai i se lotu po o isi faalapotopotoga.

O le ā ua fai mai ai le Tusi Paia? Pe finagalo le Atua e faatasitasi atu Kerisiano i se faalapotopotoga?

Na Maua e Uluaʻi Kerisiano Aogā e Ala i le Faamaopoopoina

I le Penetekoso 33 T.A., na liligi ifo ai e Ieova lona agaga paia, e lē i luga o ni nai tagata talitonu sa taapeape solo, ae i luga o se vaega o tane ma fafine o ē na ō atu e potopoto “i le mea e tasi,” i se potu pito i luga i le aai o Ierusalema. (Galuega 2:1) I le taimi lena, na faavaeina ai le faapotopotoga Kerisiano, lea na avea ma se faalapotopotoga faaleva-o-atunuu. Na faamaonia le avea o lenei mea ma faamanuiaga moni mo na uluaʻi soo. Aiseā? O se tasi o mea, ua uma ona avatu ia i latou se tofiga tāua—o le talaʻia lea o le tala lelei o le Malo o le Atua ma i se taimi mulimuli ane ona oo atu lea “i le atu laulau uma lava.” (Mataio 24:14) I le faapotopotoga sa mafai e i latou o ē fou ua liulotu ona aʻoaʻoina mai i o latou uso talitonu ua lava le poto masani, auala e faia ai le galuega talaʻi.

E leʻi leva ae salalau atu le feʻau o le Malo i le matuā mamao e sili atu i pa o Ierusalema. I le va o le 62 ma 64 T.A., na tusia ai e le aposetolo o Peteru lana uluaʻi tusi i Kerisiano o ē na “faataapeapeina i Pono, ma Kalatia, ma Kapatokia, ma Asia, ma Pitunia,” o loo iai uma na nuu i Take i aso nei. (1 Peteru 1:1) Sa iai foʻi ē na talitonu i Palesitina, Lepanona, Suria, Kuperu, Eleni, Kereta, ma Italia. E pei ona tusi atu Paulo i ē sa i Kolose i le 60-61 T.A., “sa talaʻiina atu foi [le tala lelei] i tagata uma lava i le lalolagi.”—Kolose 1:23.

O le aogā lona lua o le faatasitasi ma se faalapotopotoga o le faalaeiʻauga lea sa mafai e Kerisiano ona avatu e le tasi i le isi. I le faatasitasi atu i le faapotopotoga, sa mafai ai e Kerisiano ona faalogo atu i lauga e faagaeetia ai, suʻesuʻe faatasi i Tusitusiga Paia, fetufaaʻi i mea na tutupu e faamalosia ai le faatuatua, ma auai faatasi ma isi uso talitonu i tatalo. (1 Korinito, mataupu 14) Ma o tane taʻumatuaina sa mafai ona “leoleo i le lafu mamoe a le Atua.”—1 Peteru 5:2.

I le avea ma tagata o le faapotopotoga, sa mafai  ai foʻi e Kerisiano ona masani atu le tasi i le isi ma oo ina alofa ai le tasi i le isi. Na i lo le iai o ni lagona o se avega mamafa lo latou auaufaatasi ma le faapotopotoga, ae na atiina aʻe ai uluaʻi Kerisiano ma faamalosia e ala mai i le faapotopotoga.—Galuega 2:42; 14:27; 1 Korinito 14:26; Kolose 4:15, 16.

O se isi māfuaaga na manaʻomia ai le faapotopotoga autasi i le lalolagi aoao, po o le faalapotopotoga, ina ia faaauilumaina ai le autasi. Na aʻoaʻoina Kerisiano ‘ina ia tasi i le upu uma lava.’ (1 Korinito 1:10) Sa matuā tāua tele lenei mea. O tagata o le faapotopotoga e eseese uma o latou tulaga tau aʻoaʻoga ma talaaga o olaga na ō mai ai. Na latou tautatala i gagana eseese, ma sa manino mai le eseese uma o o latou uiga totino. (Galuega 2:1-11) E iai taimi na iai ni taofi e eseese ae faamaoni. Peitaʻi, na maua e Kerisiano le fesoasoani e foʻia ai feeseeseaʻiga faapena i totonu o le faapotopotoga.—Galuega 15:1, 2; Filipi 4:2, 3.

O fesili faigatā sa lē mafai ona taulimaina e toeaina i vaipanoa taʻitasi na tuu atu i ovasia femalagaaʻi taʻumatuaina, e pei o Paulo. O mataupu tāua e uiga i talitonuga na tuu atu i se vaega pule autū na faamautū i Ierusalema. O le vaega pule na faia muamua i aposetolo o Iesu Keriso ae na mulimuli ane faasafua atu ina ia faaaofia ai ma toeaina o le faapotopotoga i Ierusalema. Na amanaʻiaina e faapotopotoga taʻitasi le pule na tuuina atu e le Atua i le vaega pule ma ona sui ina ia faamaopoopoina ai le faiva, tofia tane i tofiga tau le auaunaga, ma faia faaiʻuga i mataupu tau talitonuga. Pe a uma ona foʻia e le vaega pule se mataupu, sa talia loa e faapotopotoga le faaiʻuga ma ‘olioli ona o le faamāfanafanaga.’—Galuega 15:1, 2, 28, 30, 31.

Ioe, na faaaogā e Ieova se faalapotopotoga i le uluaʻi senituri. Ae faapefea aso nei?

Tatou te Manaʻomia se Faalapotopotoga i Aso Nei

I le tutusa pau ma a latou aumea o le uluaʻi senituri, ua manatu mamafa ai foʻi Molimau a Ieova i aso nei i le poloaʻiga e talaʻiina le tala lelei o le Malo. O se tasi o auala o latou faatino ai lenei galuega e ala lea i le tufatufaina atu o Tusi Paia ma lomiga e fesoasoani i le suʻesuʻeina o le Tusi Paia, ma e manaʻomia ai e lenei mea se faamaopoopoina.

O lomiga faa-Kerisiano e ao ona sauniunia ma le faaeteete, siaki ina ia saʻo lelei, lomia, ona aauina atu loa lea i faapotopotoga. O Kerisiano la taʻitoʻatasi, e tatau ona latou tauofo e faaoo atu lomiga ia i latou o ē mananaʻo e faitau i ai. E faitau miliona i latou ua latou mauaina le feʻau o le Malo i lenei auala. E taumafai le autalaʻi o le tala lelei ina ia faaooina atu la latou galuega talaʻi i se auala maopoopo, e faamautinoa ua leai se vaega o le oganuu ua soona galueaʻiina a o isi vaega o loo tuulafoaʻiina. E manaʻomia ai e nei mea uma se faamaopoopoina.

Talu ai “e lē faailogaina tagata e le Atua,” e ao ai ona faaliliuina Tusi Paia ma lomiga faale-Tusi Paia. (Galuega 10:34) I le taimi nei, ua mafai ona maua lenei mekasini i gagana e 132, ma lona soa o le Ala Mai!, ua lomia i gagana e 83. E manaʻomia ai e lena mea ni vaega ua lelei ona faamaopoopoina, o ē e faia le galuega faaliliu i le lalolagi aoao.

E maua e tagata o le faapotopotoga faalaeiʻauga pe a latou faatasi atu i sauniga faa-Kerisiano ma fonotaga. O iinā e mafai ona latou faalogo atu ai i lauga faale-Tusi Paia e faagaeetia ai, suʻesuʻe faatasi ai i le Tusi Paia, fetufaaʻi ai i tala o mea tutupu e ati aʻe, ma auai faatasi ma uso tapuaʻi i le tatalo. Ma e pei o o latou uso i le uluaʻi senituri, ua latou olioli i asiasiga e faamalosia ai le faatuatua mai i ovasia femalagaaʻi o ē e alolofa. Ua faapea ai ona faia aʻe i Kerisiano i aso nei ‘le lafu mamoe e tasi, ma le leoleo mamoe e toʻatasi.’—Ioane 10:16.

E moni, e lē lelei atoatoa Molimau a Ieova, e pei foʻi o Kerisiano o le uluaʻi senituri. Peitaʻi, latou te galulue faatasi i le autasi. O le iʻuga, ua faataulauina ai le galuega talaʻi o le Malo i le lalolagi atoa.—Galuega 15:36-40; Efeso 4:13.

[Ata i le itulau 31]

O Kerisiano i aso nei e faia aʻe ai ‘le lafu mamoe e tasi, ma le leoleo mamoe e toʻatasi’