E Mafai e le Faatuatua Ona Suia Lou Olaga

“E MAUTINOA e mafai ona ola i se olaga lelei e aunoa ma se Atua.” O le taofi lea na iai i se fafine e masalosalo pe e iai se Atua. Na faapea mai o ia na ia tausia aʻe lana fanau i ni tapulaa maualuluga tau amio, ma mulimuli ane, na latou tausia aʻe ai foʻi a latou fanau i ni tapulaa maualuluga faapena—e faia uma e aunoa ma se faatuatua i le Atua.

Po o le uiga ea o lenei mea o le faatuatua atu i le Atua o se mea e lē manaʻomia? E manino mai, o le taofi lea sa iai i lea tagata. Ma e moni o tagata uma e lē talitonu i le Atua e lē faapea ai o na tagata o ni tagata leaga. Na taʻua e le aposetolo o Paulo se manatu e faatatau i “tagata o nuu ese” o ē lē iloa le Atua ae ua latou “faia mea e tusa ma le tulafono ona o le uiga faalenatura.” (Roma 2:14, NW) O tagata uma na fananau mai ma se loto fuatiaifo—e aofia ai ma ē masalosalo pe e iai se Atua. E toʻatele ua latou taumafai e mulimuli atu i mea e faatonu ai i latou e o latou loto fuatiaifo e tusa lava pe latou te lē talitonu i le Atua o lē na tuuina atu ia i latou lena lagona na fanau mai ma le tagata e faavasega ai le saʻo ma le sesē.

Peitaʻi, o se faatuatua mausalī i le Atua—le faatuatua e faavae i le Tusi Paia—o se uunaʻiga lea e sili atu ona malosi mo le lelei na i lo taʻitaʻiga lē tapasā a le loto fuatiaifo. O se faatuatua e faavae i le Afioga a le Atua, le Tusi Paia, e faatonuina le loto fuatiaifo, e faia ina ia atili ai ona iloa faavasega le saʻo mai le sesē. (Eperu 5:14) E lē gata i lea, e faamalosia e le faatuatua tagata ina ia tausisia tapulaa maualuluga a o feagai ai ma omiga e sili atu ona mamafatū. Mo se faataʻitaʻiga, a o faagasolo le senituri lona 20, e tele atunuu na oo ina pulea e faigāmālō fai mea piʻopiʻo, na faamalosia ai tagata e foliga mai e amio lelei e faia ni faiga e sili atu ona mataʻutia le sauā. Peitaʻi, o i latou e iai le faatuatua moni i le Atua na latou mumusu e lafoaʻia a latou mataupu silisili, e tusa lava pe lamatia ai o latou soifua. E faaopoopo atu i ai, o se faatuatua e faavae mai le Tusi Paia e mafai ona suia ai tagata. E mafai ona toe laveaʻiina mai ai ola  na foliga a maʻimau ma fesoasoani i tagata e ʻalofia le faia o mea sesē matuiā. Seʻi manatu i ni nai faataʻitaʻiga nei.

E Mafai e le Faatuatua Ona Suia le Olaga Faaleaiga

“E ala i lo oulua faatuatua ua lua faataulauina ai mea e lē mafai ona faia.” O le tala lena a se faamasino Egelani ina ua ia faaooina atu lana faaiʻuga i ē e iai le aiā e tausia le fanau a Ioane ma Tania. Ina ua oo atu le mataupu a Ioane ma Tania i alii ofisa o le malo, sa leʻi faaipoipo i laʻua ma na matuā leaga faia lava lo la olaga faaleaiga. O Ioane na iai sona faafitauli o le faaaogāina o fuālaau faasāina ma masani i le pelētupe, na liliu atu i le faia o ni solitulafono ina ia faatupeina ai ana amioga leaga. Na ia tuulafoaʻi i lana fanau ma lo la tinā. O lea, o le ā le “vavega” na tupu?

I se tasi aso, na faalogo atu ai Ioane o talanoa le atalii o lona uso e faatatau i le Parataiso. I le faagaeetia i lena tala, na ia fesiligia ai mātua o le tama. O mātua o loo avea o ni Molimau a Ieova, ma na la fesoasoani atu ia Ioane ina ia aʻoaʻoina lena mea mai le Tusi Paia. Sa faasolosolo lēmū ona ati aʻe e Ioane ma Tania se faatuatua e faavae i le Tusi Paia na faapea ona suia ai o la olaga. Na faamauina faaletulafono le la faatasiga e ala i le faaipoipoga ma manumalo mai i a laʻua amioga leaga. O alii ofisa o le malo na asiasia lo la aiga na latou mātauina ai se mea e ese ai i lo taimi muamua atu na foliga mai e faigatā ona faataulauina —se aiga fiafia i se fale mamā, se nofoaga talafeagai e mafai ona tausi aʻe ai se fanau. Na saʻo le faamasino i le faapea atu o lenei “vavega” na māfua mai ona o le faatuatuaga fou ua ia Ioane ma Tania.

I le faitauafe o maila mai Egelani, na toeitiiti ai lava a avea se avā talavou mai i se atunuu i Sasaʻe Lata Mai o se tasi e faaopoopo atu i fuainumera faamaumauina faanoanoa. Sa fuafua o ia e faatasi atu i le faitau miliona i tausaga taʻitasi ua iʻu ina talai a latou faaipoipoga. Na iai sana tama, ae o lana tane ua fai si matua tele atu i lo ia. Ona o lenei māfuaaga, na faatauanau ai o ia e ona tauaiga ina ia tatala le faaipoipoga, ma sa amata ai ona ia faia moni ni fuafuaga ina ia faataunuuina ai lenei mea. Peitaʻi, na ia suʻesuʻeina le Tusi Paia ma Molimau a Ieova. Ina ua iloa e le Molimau lenei tulaga, sa ia faamatala atu i ai le mea o fai mai ai le Tusi Paia e faatatau i faaipoipoga—mo se faaaʻoaʻoga, o le faaipoipoga o se meaalofa mai le Atua ma e lē o se mea e manatu māmā i ai ma lafoaʻia. (Mataio 19:4-6, 9) Na mafaufau ifo le fafine ia te ia lava, ‘O se mea ese lenei, o lenei fafine, o se tagata ese, o loo taumafai e faasaoina lo matou aiga ae o i latou o ē e mafuta vāvālalata mai ia te aʻu o loo mananaʻo e faamalepe lo matou aiga.’ O lona faatuatuaga fou ua iai na fesoasoani ia te ia ina ia faatumauina ai lana faaipoipoga.

O se fuainumera faamaumauina faanoanoa o loo aafia ai le olaga faaleaiga e fesootaʻi atu lea i le faapaʻū tama. Ua taumateina e se lipoti mai Malo Aufaatasi faapea a itiiti mai e 45 miliona pepe e leʻi faananau mai ua faapaʻū ma le loto i ai i tausaga taʻitasi. O mea taʻitasi faapena e tutupu o se mala lea. O le poto mai le Tusi Paia na fesoasoani lea i se fafine mai i Filipaina ina ia ʻalofia le avea ai ma se tasi e faia se sao i lena fuainumera faamaumauina.

Na fesootaʻi atu Molimau a Ieova i se fafine, na ia talia le polosiua e faapea lona matua, O le ā e Manaomia e le Atua Mai ia i Tatou?, * ma amata ai loa ona suʻesuʻeina le Tusi Paia. I masina mulimuli ane, na ia faamatala mai ai le pogai na ia taliaina ai le suʻesuʻega faale-Tusi Paia. Sa maʻitō le fafine i le taimi na asiasi muamua atu ai lava Molimau ia te ia, ae ua uma ona la faia ma lana tane se faaiʻuga ina ia faapaʻū le pepe. Peitaʻi o le āta o le pepe e leʻi fanau mai o i le itulau e 24 o le polosiua na pāiʻa ai le loto o le fafine. O le faamatalaga o iai e faavae mai le Tusi Paia e faapea e paia le ola talu ai o le ‘Atua le puna o le ola’ na faatauanauina ai o ia ina ia lē faapaʻūina lana pepe. (Salamo 36:9) I le taimi nei o loo avea o ia ma tinā o se tamaitiiti aulelei ma mālōlōina.

Fesoasoani le Faatuatua ia i Latou ua Tuulafoaʻia

I Aitiope, na ō atu ai ni tamāloloa se toʻalua na matuā lē lelei lava o la lavalava i se sauniga mo le tapuaʻiga na faia e Molimau a Ieova. I le faaiʻuga o le sauniga, na faafeiloaʻi atu ai se Molimau ia i laʻua i se auala faaleuō. Na ʻaisi atu nei tamāloloa mo ni tupe. E leʻi avatua i ai e le Molimau ni tupe, ae na avatu i ai se mea e sili atu ona tāua. Na ia faalaeiʻauina i laʻua ina ia ati aʻe le faatuatua i le Atua, o se mea “e silisili ona aoga i le auro.” (1 Peteru 1:7) Na tali lelei atu le tasi o i laʻua ma amata ai ona suʻesuʻeina le Tusi Paia. Na suia e lenei mea lona olaga. A o ia tuputupu aʻe i le faatuatua, na ia tuua ai le ulaula, inu tele, amioga lē mamā, ma le faaaogāina o le khat (o se laulaau oona e faigofie tele ona faapologaina ai lē na te faaaogāina). Na ia aʻoaʻoina le auala e tausia ai o ia lava na i lo le ʻaisi solo ma ua ola nei i se olaga mamā, se olaga e uigā.

 I Italia, na faasalaina ai se tamāloa e 47 tausaga le matua i le sefulu tausaga i le falepuipui ma sa taofia o ia i se falemaʻi e togafitia ai maʻi o le mafaufau a le matāgaluega o faamasinoga. O se tasi o Molimau a Ieova o loo mauaina le faatagaga e ulufale atu ai i falepuipui ina ia tuuina atu le fesoasoani faaleagaga, na ia suʻesuʻeina le Tusi Paia ma lenei tamāloa. Na vave tele ni suiga lelei na faia e lenei tamāloa. Ua matuā telē se suiga na faia e le faatuatua i lona olaga ma i le taimi nei ua ō atu ai isi pagota ia te ia mo fautuaga i auala e feagai ai ma o latou faafitauli. O lona faatuatua e faavae i le Tusi Paia na ia mauaina ai le faaaloalo, le faaeaea, ma le maufaatuatuaina e alii ofisa o le falepuipui.

I ni tausaga talu ai nei, ua lipotia mai ai e nusipepa taua i le va o tagata o atunuu lava ia i Aferika. O tala patino e sili ona faamataʻuina ai e faatatau lea i tamaiti talavou ua toleniina e fai ma fitafita. O nei tamaiti ua faaonanāina i fuālaau faasāina, fasi faamoʻamoʻa, ma faamalosia ina ia faia ni amioga faamanu i o latou auaiga ina ia faamautinoa ai ua tuu atu lo latou faamaoni aʻiaʻi i le vaega lea o loo latou tau ai. Pe lava le malosi o se faatuatua faale-Tusi Paia e suia ai ola o ni talavou faapena? A itiiti mai, e lua ni mea na tutupu ua faaalia ai e mafai.

I Laiperia, na auauna ai Aleki o se tama tali misasā i le Lotu Katoliko. Ae ina ua 13 ona tausaga, na auai o ia i se vaega tau ma avea ai ma se fitafita tamaitiiti e sili ona taʻutaʻua le leaga. Ina ia ona mauaina le loto toa i le taua, na liliu atu ai o ia i faiga faataulaitu. Na vaai Aleki o fasiotia le toʻatele o ana uo, ae na faasaoina lava o ia. I le 1997, na feiloaʻi ai o ia i Molimau a Ieova ma iloa ai sa lē vaai maulalo i latou ia te ia. Na i lo lena, sa latou fesoasoani ia te ia ina ia aʻoaʻo le mea o fai mai ai le Tusi Paia e faatatau i faiga sauā. Na tuua e Aleki le vaegāʻau. A o amata ona tuputupu aʻe lona faatuatua, na ia mulimuli atu ai i le poloaʻiga a le Tusi Paia: “Ia ʻalo ese i le leaga, a ia fai mea lelei; ia saili i le filemu ma tausisi i ai.”—1 Peteru 3:11.

I lea foʻi vaitaimi, na alu atu ai se malaga a Samasoni o lē sa avea muamua ma fitafita tamaitiiti i le taulaga o nofo ai nei Aleki. Na avea Samasoni ma se tamaitiiti na auai i le aufaipese a le lotu ae i le 1993, na avea ai o ia ma fitafita ma aafia ai i le faaaogāina o fuālaau faasāina, faiga faataulaitu, ma amioga lē mamā. I le 1997 na lē toe avea ai o ia ma fitafita. O le malaga atu o Samasoni i Monrovia ina ia auai i se vaega faapitoa e tausisia le saogalemu na faatauanauina ai o ia e se uō e suʻesuʻe le Tusi Paia ma Molimau a Ieova, ma o le iʻuga, na ia ati aʻe ai se faatuatua e faavae i le Tusi Paia. Na avatu ai ia te ia e lenei mea se loto tele e lafoaʻia ai ona ala fai taua. Ua ola uma nei Aleki ma Samasoni i ni olaga filēmū ma le mamā tau amio. Pe e iai ea se mea e ese mai le faatuatua faale-Tusi Paia e mafai ona suia olaga ia na matuā faileagaina?

Le Ituaiga Saʻo o Faatuatua

O ni nai faaaʻoaʻoga nei mai le tele ma le anoanoaʻi o faaaʻoaʻoga ua mafai ona siiina mai e faataʻitaʻia ai le malosi o le faatuatua moni e faavae i le Tusi Paia. E moni, e lē o tagata uma o tau ina faapea mai e talitonu i le Atua o ola e talafeagai ai ma tapulaa maualuluga a le Tusi Paia. E saʻo lelei, o nisi tagata e talitonu e leai se Atua atonu o loo ola i ni olaga e sili atu ona lelei na i lo nisi o faapea mai o Kerisiano. O le māfuaaga ona o le faatuatua e faavae mai le Tusi Paia e aofia ai isi mea e sili atu na i lo le tau ina faapea mai e talitonu i le Atua.

Na taʻua e le aposetolo o Paulo le faatuatua “o le faalagolago lea i mea ua faamoemoe i ai, o le mautinoa lea o mea e le o vaaia.” (Eperu 11:1) O lea la, o le faatuatua e aofia ai le talitonuga malosi—e faavae i faamaoniga maumaututū—i mea e lē vaaia. E aofia faapitoa ai lava le leai ma sina masalosalo pe o iai se Atua, pe o naunau mai o ia ia i tatou, ma pe faamata o le a faamanuia mai o ia ia i latou o faia lona finagalo. Na faapea mai foʻi le aposetolo: “E tatau i lē alu atu i le Atua ona talitonu o loo soifua o ia, o ia foʻi na te tauia mai o e matuā saili ia te ia.”—Eperu 11:6.

O le ituaiga o faatuatua lenei na suia le olaga o Ioane, Tania ma isi sa taʻua i lenei mataupu. Na taʻitaʻia e lea faatuatua i latou ina ia vaai atu ma le mautinoa atoatoa i le Afioga a le Atua, le Tusi Paia, mo taʻiala i le faia o faaiʻuga. Na fesoasoani lea faatuatua ia i latou ina ia faia ni faataulagaina lē tumau ina ia aua ai neʻi uia se ala faigofie, ae o se ala e sesē. E ui ina eseese mea taʻitasi na tutupu, ae na tutusa le auala na amata uma mai ai. O se tasi o Molimau a Ieova na suʻesuʻeina le Tusi Paia ma nei tagata taʻitoʻatasi, ma oo ai ina latou mauaina le saʻo o le mea o fai mai ai le Tusi Paia: “O loo ola le afioga a le Atua, o loo matuā galue foi.” (Eperu 4:12) O le mana o le Afioga a le Atua na fesoasoani i tagata taʻitoʻatasi ina ia ati aʻe se faatuatua malosi lea na suia ai o latou olaga mo le lelei.

O loo galulue maelegā Molimau a Ieova i le silia ma le 230 atunuu ma atumotu. Latou te valaaulia oe ina ia faia sau suʻesuʻega faale-Tusi Paia. Aiseā? Talu ai ua latou talitonu maumaututū faapea o se faatuatua e faavae i le Tusi Paia e mafai ona avatua ni suiga e sili ona lelei i lou foʻi olaga.

[Faamatalaga pito i lalo]

[Ata i le itulau 3]

O se faatuatua e faavae i le Tusi Paia e suia ai olaga ina ia lelei

 [Faamatalaga i Ata i le itulau 2]

Title card of Biblia nieświeska by Szymon Budny, 1572