Auauna Faatasi ma le Tagata Vaai

“Ieova e, o loo oʻu tū i luga o le olomatamata e lē aunoa i le ao, ma i loʻu leoleoga ou te tū ai i po uma.”—ISAIA 21:8, NW.

1. O ā folafolaga matagofie o loo molimau i ai Ieova lava ia?

O IEOVA o Lē Fai Fuafuaga Sili. E leai se mea e mafai ona fai e le agelu fouvale lea ua avea nei ma Satani le Tiapolo ina ia faalēaogāina ai Lana fuafuaga sili ina ia faapaia Lona lava suafa ma ia faavae se Malo faamamaluina e pule i luga o se lalolagi ua faaparataisoina. (Mataio 6:9, 10) O le a faamanuiaina moni lava le fanau a tagata i lena pulega. “E faaumatia e [le Atua] le oti e faavavau, e soloiesea foʻi e le Alii o Ieova o loimata i mata uma lava.” O le a olioli le fanau a tagata autasi i le filēmū, ma fiafia i le tamaoaiga e faavavau. (Isaia 25:8; 65:17-25) E molimau Ieova lava ia i nei folafolaga matagofie!

2. O ai ni molimau faaletagata na faatulaʻi mai e Ieova?

² Peitaʻi, e iai foʻi molimau faaletagata a Lē Silisili Ese na Foafoaina Mea. A o lumanaʻi le vaitaimi o uluaʻi Kerisiano, sa iai ‘se faapotopotoga o molimau,’ e amata mai ia Apelu, na tūtūmau, i le tele o taimi i lalo o tulaga faigatā. O a latou faataʻitaʻiga lelei ua faalaeiʻauina ai Kerisiano faamaoni i aso nei. O Iesu Keriso le faataʻitaʻiga mataʻina o se molimau lototele. (Eperu 11:1–12:2) E manatua, mo se faaaʻoaʻoga, lana taʻutinoga mulimuli i luma o Ponotio Pilato. Sa faalauiloa atu e Iesu: “O le mea lenei na fanau mai ai aʻu, o le mea foi lenei na ou sau ai i le lalolagi, ina ia ou molimau i le upu moni.” (Ioane 18:37) Mai lava i le 33 T.A. seʻia oo mai i lenei tausaga e 2000 T.A., ua mulimuli Kerisiano maelegā i le faaaʻoaʻoga a Iesu ma faaauau pea ona molimau atu, i le faalauiloa ma le lototele “vavega o le Atua.”—Galuega 2:11.

Vaega Faalotu Faa-Papelonia

3. Ua faapefea ona tetee Satani i le molimau ua faia e faatatau ia Ieova ma lona finagalo?

³ Mo le faitau meleniuma sa taumafai ai ma le amioleaga le Fili sili, Satani le Tiapolo, e taʻuleagaina le mau a molimau a le Atua. I le avea ma “tamā o le pepelo,” o lenei “tarako tele, o le gata tuai lea,” ua ia “faasese i le lalolagi uma.” E lē o faavaivai lava i lana taua faasaga ia i latou o ē o loo “tausi i poloaiga a le Atua,” ae maise lava i nei aso e gata ai.—Ioane 8:44; Faaaliga 12:9, 17.

4. Na faapefea ona amata mai Papelonia le Aai Tele?

⁴ I le sili atu i le 4,000 tausaga talu ai, ina ua mavae le Lolo i aso o Noa, na faatulaʻi mai ai e Satani ia Nimarota, o “lē malosi foi o ia i tuli manu i luma o Ieova.” (Kenese 10:9, 10) Na iʻu ina avea le aai sili a Nimarota, o Papelonia (Papelu), ma se ogatotonu o tapuaʻiga faatemoni. Ina ua faafenuminumiaʻia e Ieova gagana a i latou sa fausia le ʻolo o Papelu, sa faataapeapeina tagata i le lalolagi, ma sa ō lava ma ave a latou tapuaʻiga sesē. O lea na avea ai Papelonia ma tupuga o se emepaea o lotu sesē a le lalolagi, o loo faaigoa o Papelonia le Aai Tele i le tusi o Faaaliga. O le tusi lena o loo ia valoia maia le faaumatiaga o lenei faiga faaletapuaʻiga mai anamuā.—Faaaliga 17:5; 18:21.

Se Nuu o Molimau

5. O ai le nuu na faamaopoopo e Ieova e avea ma ana molimau, ae aiseā na ia faataga ai e faatafeaina?

⁵ Pe tusa ma le 500 tausaga ina ua mavae le taimi o Nimarota, na faamaopoopo ai e Ieova ē na tupuga mai ia Aperaamo le tagata faatuatua e avea ma nuu o Isaraelu ina ia auauna e fai ma Ana molimau i le lalolagi. (Isaia 43:10, 12) E toʻatele tagata taʻitoʻatasi o lena nuu sa auauna faamaoni  ia Ieova. Peitaʻi a o faagasolo senituri, sa faaleagaina Isaraelu i talitonuga sesē a ona nuu tuaoi, o lea na liliu ese ai loa tagata sa osi feagaiga ma Ieova mai ia te ia ae liliu atu i tapuaʻiga i atua sesē. O le iʻuga, i le 607 T.L.M., na faaumatia ai Ierusalema ma lona malumalu e autau a Papelonia, sa taʻitaʻia e le tupu o Nepukanesa, ma faatafeaina le tele o tagata Iutaia i Papelonia.

6. O le ā le tala lelei sa faalauiloa mai e le tagata vaai faavaloaga a Ieova, ma o anafea na faataunuuina ai?

⁶ Maʻeu se manumalo sa iai mo lotu sesē! Peitaʻi, o le pulega a Papelonia sa na o se taimi puupuu. Pe tusa o le 200 tausaga a o leʻi tupu lenei mea, na poloaʻi Ieova e faapea: “Alu ia, ina e tofia se tagata e vaai, o le mea na te iloa, ia te faaali ane.” O le ā le tala sa tatau i lenei tagata vaai ona faaali ane? “Ua paū, ua paū Papelonia; o tupua uma foi a ona atua ua ia tuʻipalaina i le eleele.” (Isaia 21:6, 9) O le mea tonu lava lena na tupu, i le 539 T.L.M., na faataunuuina ai le faalauiloaga faavaloaga. Na paʻū Papelonia malosi, ma e leʻi pine ae mafai loa e tagata osi feagaiga ma le Atua ona toe foʻi i lo latou nuu.

7. (a) O le ā sa aʻoaʻoina e tagata Iutaia mai le aʻoaʻiga a Ieova? (e) O ā mailei na paʻūū atu i ai Iutaia o ē na toe faafoʻisia mai le tafeaga, ma o le ā na iʻu i ai?

⁷ O tagata Iutaia o ē na toe foʻi sa latou aʻoaʻoina ni lesona ia lafoaʻia le ifo i tupua atoa ma tapuaʻiga e faaaogā ai faiga faataulāitu. Peitaʻi a o faagasolo tausaga, sa latou paʻūū atu i isi mailei. O isi sa maileia i filosofia faa-Eleni. O isi sa latou faamamafaina uputuu a tagata na i lo le Afioga a le Atua. Ia ae o isi sa faasesēina i le lotonuu. (Mareko 7:13; Galuega 5:37) I le taimi na soifua mai ai Iesu, sa toe liliu ese foʻi le nuu mai le tapuaʻiga mamā. A o tali atu nisi tagata taʻitoʻatasi o Iutaia i le tala lelei sa faalauiloa mai e Iesu, sa teena o ia e le nuu atoa, ma na iʻu ina teena ai i latou e le Atua. (Ioane 1:9-12; Galuega 2:36) Sa lē toe avea ai loa Isaraelu ma molimau a le Atua, ma i le tausaga e 70 T.A., sa toe faatamaʻia ai foʻi Ierusalema ma lona malumalu, i le taimi lea e autau a Roma.—Mataio 21:43.

8. O ai na avea ma molimau ia Ieova, ma aiseā sa fetaui lelei ai le lapataʻiga a Paulo e faatatau i lenei molimau?

⁸ I le taimi lava lea, na fanau mai ai se “Isaraelu [Kerisiano] a le Atua,” ma ua auauna nei o se molimau a le Atua i atunuu. (Kalatia 6:16) Sa vave lava ona taupulepule Satani e faaleaga lenei nuu fou faaleagaga. E oo ane i le faaiʻuga o le uluaʻi senituri, ua iai aafiaga o vaega faalotu i faapotopotoga. (Faaaliga 2:6, 14, 20) Sa fetaui lelei lava le lapataʻiga a Paulo: “Ia outou, neʻi faapologaina outou e se tasi i le poto le aoga e faasese ai, e tusa ma le uputuu a tagata, e tusa ma aitu o le lagi ma le le lalolagi, a e le tusa ma Keriso.”—Kolose 2:8, LF.

9. E pei lava ona lapataʻi mai Paulo, o ā mea tutupu na taʻitaʻia atu ai i le iai o Kerisinetoma?

⁹ Na iʻu lava ina faaoonaina le tapuaʻiga a le toʻatele o ē sa faapea mai o Kerisiano ona o filosofia a Eleni, o faiga tau tapuaʻiga faa-Papelonia, atoa ma le “poto” faaletagata e pei o le aʻoaʻoga i le evolusione ma faitioga i le moni o le Tusi Paia. Ua pei lava ona valoia mai e Paulo: “Auā o aʻu nei, ua ou iloa lenei mea, pe a mavae ona ou alu, e oo mai ia te outou luko saua o e le faasaoina le lafu mamoe. E tupu mai foi ia te outou lava tagata e tautala mai i mea faapiopio, e fetoso ese ai le au soo ia mulimuli ia i latou.” (Galuega 20:29, 30) Na iʻu ina tulaʻi mai ai Kerisinetoma ona o lenei faaaposetasi.

10. O ā mea tutupu ua manino mai ai e lē o tagata uma o loo lolo atu i le tapuaʻiga piʻopiʻo lea o loo fai i Kerisinetoma?

¹⁰ Sa tatau ia i latou na tuutōina i le tapuaʻiga  mamā ona “faamalolosi ona finau mo le faatuatua na tuuina mai faatasi i le au paia.” (Iuta 3) Pe o le a iʻu ea ina mou atu mai le lalolagi le molimau atu e uiga i le tapuaʻiga mamā atoa ma Ieova? E leai. A o lata mai le taimi e faaumatia ai Satani tetee ma ana galuega uma, ua faasolo lava ina manino mai e lē o tagata uma o loo lolo atu i le tapuaʻiga aposetate lea o loo fai i Kerisinetoma. I le faaiʻuga o le senituri e 19, i Pittsburgh, Pennsylvania, i le Iunaite Setete o Amerika, na faamaopoopo ma avea ai se vaega o tagata aʻoga faamaoni o le Tusi Paia ma vaega autū o le vasega o molimau a le Atua i ona po nei. Sa faasino atu nei Kerisiano i faamaoniga faale-Tusi Paia e iloa ai ua i faitotoʻa le taufaaiʻuiʻuga o le faiga o mea o loo iai nei a le lalolagi. E tusa ai ma valoaga o le Tusi Paia, na amata le ‘taufaaiʻuiʻuga’ o lenei lalolagi i le 1914, ma sa faailogaina i le gāpā o le uluaʻi taua a le lalolagi. (Mataio 24:3, 7) O loo iai faamaoniga malolosi e iloa ai sa lafoina ese mai le lagi Satani ma ana ʻau temoni ina ua mavae lena tausaga. O le faatumuina o le senituri e 20 i faafitauli ua saunia ai faamaoniga manino o gaoioiga a Satani atoa ma le faataunuuga mataʻina o le faailoga o le faatasi mai tautupu o Iesu i le mana o le Malo i le lagi.—Mataio, mataupu e 24 ma le 25; Mareko, mataupu e 13; Luka, mataupu e 21; Faaaliga 12:10, 12.

11. O le ā sa taumafai Satani e fai, peitaʻi sa faapefea ona lē taulau lana taumafaiga?

¹¹ Ia Iuni 1918, na taumafai malosi ai Satani e tafi ese na tagata aʻoga o le Tusi Paia, o ē e oo ane i lena taimi o talaʻi atu i le tele o atunuu. Sa ia saili foʻi ina ia faaumatia le latou asosi faaletulafono, le Watch Tower Bible and Tract Society. Sa tuuina i le falepuipui ē sa faauluulu i ai le Sosaiete, sa tuuaʻia pepelo i le fouvale i le pule, e pei lava ona oo ia Iesu i le uluaʻi senituri. (Luka 23:2) Peitaʻi i le 1919, na toe tatala mai ai i tua nei faauluuluga o le Sosaiete, ma mafai ai loa ona toe faaauau le latou faiva. Mulimuli ane, sa faamamāina atoatoa i latou mai i tuuaʻiga pepelo uma.

Se “Tagata e Vaai” o Loo Uaʻi Totoʻa Atu

12. O ai i aso nei o loo fai aʻe ai le vasega o le tagata vaai a Ieova, ma o le ā le uiga ua latou faaalia?

¹² O lea la, ina ua amata “ona po o le iʻuga,” sa iai foʻi se tagata vaai a Ieova, e mataala e taʻu i tagata mea tutupu e fesootaʻi i le faataunuuina o Ana fuafuaga. (Tanielu 12:4; 2 Timoteo 3:1) O lena vasega o le tagata vaai—Kerisiano faauuina, le Isaraelu a le Atua—e oo mai i le asō, o loo gaoioi pea e talafeagai ma le faamatalaga a Isaia e uiga i le tagata vaai faavaloaga: “Ona ia uaʻi totoʻa atu lea, ma le matuā mataalia. Ona ia valaau atu lea e pei o se leona: ‘Ieova e, o loo oʻu tū i luga o le olomatamata e lē aunoa i le ao, ma i loʻu leoleoga ou te tū ai i po uma.’” (Isaia 21:7, 8, NW) O se tagata vaai lenei o loo tauaveina lana galuega ma le finafinau!

13. (a) O le ā le feʻau o loo faalauiloa e le tagata vaai a Ieova? (e) E faapefea ona fai atu ua paʻū Papelonia le Aai Tele?

¹³ O le ā sa iloa atu e lenei tagata vaai? Ua toe faalauiloa mai foʻi e le tagata vaai a Ieova, lana vasega molimau e faapea: “Ua paū, ua paū Papelonia; o tupua uma foi a ona atua ua ia [Ieova] tuʻipalaina i le eleele.” (Isaia 21:9) O le taimi nei, ina ua mavae le Taua Muamua a le Lalolagi, ua paʻū Papelonia le Aai Tele, o le emepaea o lotu sesē i le lalolagi, mai lona tulaga faamamaluina ma le pule. (Ieremia 50:1-3; Faaaliga 14:8) E lē o se mea la e ofo ai! O le Taua Tele, e pei ona sa taʻua ai, na amata mai i Kerisinetoma, lea sa faatuputeleina ai e taʻitaʻi lotu i itu uma e lua le feteenaʻiga e ala i lo latou faalaeiʻauina o o latou tagata talavou sili ona lelei e ō i le taua. Pagā se faalumaina ai! I le 1919, sa leʻi toe mafai ai loa e Papelonia le Aai Tele ona taofia mai Tagata Aʻoga o le Tusi Paia, e pei ona sa iloa ai Molimau a Ieova i lena taimi, mai le sosola ese mai lo latou tulaga o le leai o ni mea e fai ae auai atu i le tauiviga o le molimau atu i le lalolagi atoa lea o loo faaauau pea e oo mai i le taimi nei. (Mataio 24:14) O le faailoga lena o le paʻū o Papelonia le Aai Tele, e pei lava o le saʻoloto mai o Isaraelu i le senituri lona ono T.L.M. sa faailoga ai se paʻū mo Papelonia anamua.

14. O le ā le mekasini ua lauiloa ona faaaogā e le vasega o le tagata vaai a Ieova, ma ua faapefea ona faamanuia e Ieova lona faaaogāina?

¹⁴ E faatino e lē aunoa e le vasega o le tagata vaai lana galuega ma le maelegā atoa ma se faanaunauga malosi e faia mea saʻo. Ia Iulai 1879, na amata ai ona lomia e Tagata Aʻoga o le Tusi Paia  lenei mekasini, sa faaigoaina o le Zion’s Watch Tower and Herald of Christ’s Presence. I lomiga taʻitasi mai le 1879 seʻi oo mai i le lomiga o Tesema 15, 1938, sa tusia i le faavaa pito i luma ia upu “ʻLe Leoleo e, Po Ua ā Ea le Po?’—Isaia 21:11.” * Ua 120 tausaga o faamaoni pea Le Olomatamata i le vaaia o mea tutupu i le lalolagi ma o latou uiga faavaloaga. (2 Timoteo 3:1-5, 13) O loo faaaogāina e le vasega o le tagata vaai a le Atua ma lana aumea o “isi mamoe” lenei mekasini i le faalauiloaina ma le naunautaʻi i le fanau a tagata e faapea, ua toe o se āga ona faaeaina lea o le pule silisili ese a Ieova e ala i le Malo o Keriso. (Ioane 10:16) Pe o faamanuia ea e Ieova lenei molimau atu? Mai lava i lona uluaʻi lomiga e 6,000 kopi i le 1879, ua oo atu Le Olomatamata i se aofaʻiga i le lalolagi atoa e sili atu i le 22,000,000 kopi i le 132 gagana—o le 121 o nei gagana e lomia tutusa i le taimi e tasi ma le faa-Peretania. Maʻeu le talafeagai ona faapea atu, o le mekasini faalelotu ua pito i tele lona faasalalauina i le lalolagi atoa e ao ona avea ma mekasini e viiaina ai le suafa o le Atua moni, o Ieova!

Se Faamamāina Faasolosolo

15. O le ā le faamamāina faasolosolo sa amata mai a o leʻi oo i le 1914?

¹⁵ Mo se vaitaimi pe tusa o le 40 tausaga seʻi oo mai i le amataga o le pulega faalelagi a Keriso i le 1914, sa tuusaʻoloto ai Tagata Aʻoga o le Tusi Paia mai i le tele o aʻoaʻoga e lē faale-Tusi Paia a Kerisinetoma, e pei o le papatisoina o pepe, le lē mafai ona oti o le solu o le tagata, o pulekatolio, le faapuapuagatia i le afi i seoli, atoa ma se Atua Tasitolu. Peitaʻi sa manaʻomia se taimi e faateʻa ese ai manatu sesē uma. Mo se faaaʻoaʻoga, i vaitausaga e amata mai i le 1920 seʻia oo i le 1929 sa tauaveina ai e le toʻatele o Tagata Aʻoga o le Tusi Paia se pine sa tusia ai se faailoga o se koluse ma se palealii, ma sa latou faamanatuina foʻi le Kirisimasi ma isi aso mālōlō faapaupau. Peitaʻi, ina ia mamā se tapuaʻiga, e ao lava ona aveesea vala uma o ifoga i tupua. E ao ona avea le Afioga a le Atua, le Tusi Paia, ma faavae e tasi o le faatuatuaga faa-Kerisiano ma le ala i le ola. (Isaia 8:19, 20; Roma 15:4) E sesē le faaopoopo o se mea i le Afioga a le Atua ia po o le toesea mai ai foʻi o se mea.—Teuteronome 4:2; Faaaliga 22:18, 19.

16, 17. (a) O ā manatu sesē sa i le vasega o le tagata vaai mo le faitau sefulu o tausaga? (e) O le ā le faamalamalamaga saʻo o le “fata faitaulaga” ma le “faailoga” i “Aikupito”?

¹⁶ O se tasi lenei o faaaʻoaʻoga e faamaonia ai le tāua o lenei mataupu silisili. Ina ua lomia e C. T. Russell i le 1886 se tusi lea sa taʻua The Divine Plan of the Ages, sa aofia ai i lenei tusi se siata lea na faafesootaʻi atu ai le faasologa o tupulaga o tagata i le Peremita Tele o Aikupito. O le peremita faamanatu lenei o Farao Khufu sa manatu i ai e faapea o le faailoga lenei o loo faatatau i ai le Isaia 19:19, 20: “O lea aso e i ai le fata faitaulaga ia Ieova i totonu o le nuu o Aikupito, ma le faailoga ia Ieova i tafatafa o lona tuaoi. E fai ai foi ma faailoga ma molimau ia Ieova o ʻau i le nuu o Aikupito.” O le ā se faiā sa ono iai a le peremita ma le Tusi Paia? Ia, mo se faaaʻoaʻoga, o le uumi o nisi ala i totonu o le Peremita Tele sa manatu i ai o loo faasino i le taimi o le amataga o le “puapuaga tele” o loo taʻua i le Mataio 24:21, e pei ona sa malamalama ai i lena taimi. O nisi Tagata Aʻoga o le Tusi Paia na iʻu ina matuā naunau atu i le fuaina o le uumi o vaega eseese o le peremita ina ia fuafua ai mea e pei o le aso latou te ō ai i le lagi!

¹⁷ O lenei talitonuga i le Peremita Tele sa faatāuaina mo se faitau sefulu o tausaga, seʻia oo ina faamalamalama mai i mataupu o Le Olomatamata faa-Peretania o Novema 15 ma  Tesema 1, 1928 e faapea, e lē manaʻomia e Ieova se maa faamanatu na fausia e farao faapaupau ma aofia ai faailoga faatemoni o valovaloga i fetu, ina ia faamautinoa ai le molimau o loo aumai i le Tusi Paia. Na i lo lena, sa aliali mai o le valoaga a Isaia sa iai sona faatatauga faaleagaga. E pei ona iai i le Faaaliga 11:8, o “Aikupito” o le faatusa o le lalolagi a Satani. O le “fata faitaulaga ia Ieova” ua faamanatu mai ai ia i tatou taulaga talileleia sa faia e Kerisiano faauuina a o avea i latou ma tagata aumau i lenei lalolagi. (Roma 12:1; Eperu 13:15, 16) O le faailoga i ‘tafatafa o le tuaoi o Aukupito’ o loo faasino atu i le faapotopotoga o Kerisiano faauuina, lea e avea o “le poutu foi lea ma le lagolago o le upu moni” ma o loo iai e avea o se molimau i “Aikupito,” le lalolagi lea o le a toeitiiti latou tuua.—1 Timoteo 3:15.

18. (a) O faapefea ona faaauau ona faamanino mai e Ieova mataupu i tagata aʻoga faamaoni o le Tusi Paia? (e) O le ā le uiga e atamai ona iai i se Kerisiano, pe afai ua lē faigofie mo ia ona malamalama i le faamalamalamaina o se mau o le Tusi Paia?

¹⁸ A o mavae atu tausaga, o loo faaauau pea ona aumai e Ieova ia i tatou isi faamalamalamaga o le upu moni, e aofia ai ma se malamalamaga manino o lana afioga faavaloaga. (Faataoto 4:18) I tausaga e leʻi leva tele atu, sa faalaeiʻauina ai i tatou ina ia toe tagaʻi totoʻa atu faatasi ai ma se malamalamaga loloto—lea e aofia ai—le tupulaga lea o le a lē mavae atu a o leʻi oo mai le iʻuga, le faataoto i mamoe ma ʻoti, le mea inosia ma o afea e tū ai i se mea paia, le feagaiga fou, le liliuina, ma le faaaliga o le malumalu i le tusi o Esekielu. E ono faigatā i nisi taimi ona malamalama i nei faamalamalamaga ua toe faasaʻoina mai, ae a o faagasolo taimi o le a manino mai māfuaaga ua faia ai. Afai e lē matuā malamalama lelei se Kerisiano i se faamalamalamaga fou o se mau o le Tusi Paia, e matuā talafeagai mo ia le faaleo atu ma le loto maulalo upu a le perofeta o Mika e faapea: “Ou te faamoemoe i le Atua o loʻu olataga.”—Mika 7:7.

19. Ua faapefea e le vaega totoe faauuina ma a latou aumea o isi mamoe ona faaalia le lototele pei se leona i nei aso e gata ai?

 ¹⁹ Manatua foʻi o le tagata vaai sa ‘valaau atu e pei o se leona: “Ieova e, o loo oʻu tū i luga o le olomatamata e lē aunoa i le ao, ma i loʻu leoleoga ou te tū ai i po uma.”’ (Isaia 21:8, NW) Ua faaalia e le vaega totoe faauuina le lototele pei se leona i le faaalialia o lotu sesē ma faailoa i tagata le ala i le saʻolotoga. (Faaaliga 18:2-5) I le avea ai o “le auauna faamaoni ma le mafaufau,” ua latou saunia Tusi Paia, o mekasini, ma isi lomiga i le tele o gagana—o “mea e ʻai i ona itu aso.” (Mataio 24:45) O loo latou taulamua i le aoaoina o le “motu o tagata e toatele mai atu nuu uma, ma aiga, ma nuu, ma gagana eseese.” Ua uma foʻi ona faamamāina i latou nei i le toto togiola a Iesu ma ua latou faaalia foʻi le lototele e pei o le leona i le avatuina i le Atua o le ‘auaunaga i le ao ma le po.’ (Faaaliga 7:9, 14, 15) O le ā sa fuaina mai i le tausaga na seʻi mavae atu nei e le vaega itiiti o loo soifua mai pea o Molimau faauuina a Ieova ma a latou aumea, le motu o tagata e toʻatele? O le a taʻu mai e le tatou mataupu o loo sosoo ai.

[Faamatalaga pito i lalo]

Pe e te Manatua?

• O ai ni molimau sa faatulaʻi mai e Ieova i le faagasologa o tausaga?

• O le ā le amataga mai o Papelonia le Aai Tele?

• Aiseā na faataga ai e Ieova Ierusalema, le aai laumua o lona nuu o molimau, ina ia faaumatia i le 607 T.L.M.? i le 70 T.A.?

• O le ā le agaga o loo faaalia e le vasega o le tagata vaai ma a latou aumea?

[Fesili mo le Suʻesuʻega]

[Ata i le itulau 7]

“Ieova e, o loo oʻu tū i luga o le olomatamata e lē aunoa”

[Ata i le itulau 10]

O loo tauaveina e le vasega o le tagata vaai a Ieova le latou galuega ma le finafinau