“Ieova e, o le ā le umi ou te alaga atu ai mo se fesoasoani ae e te lē faafofoga mai? O le ā le umi ou te alaga atu ai iā te oe ona o faiga sauā, ae e te lē faaola mai?” (Sapakuka 1:2, 3) O upu ia a Sapakuka, o sē na finagalo malie iai le Atua. Pe sa faaalia i lana talosaga sa vaivai lona faatuatua? E leai. Na faamautinoa atu e le Atua iā Sapakuka, e iai le taimi ua Ia atofaina e faamuta ai mafatiaga o tagata.​—Sapakuka 2:2, 3.

Pe a tatou mafatia faapea ē e vavalalata iā i tatou, e faigofie ona tatou manatu ua faatuai mai le Atua ma ua tatau ona ia gaoioi i le taimi nei. Peitaʻi, ua faamautinoa mai i le Tusi Paia: “E lē faatuai mai Ieova e tusa ma lana folafolaga, e faapei ona manatu ai isi tagata i le faatuai, ae o loo onosaʻi mai pea o ia iā te outou, auā e lē finagalo o ia e faaumatia se tasi, ae e finagalo ia oo uma lava i le salamō.”​—2 Peteru 3:9.

Ua toeitiiti lava ona gaoioi lea o le Atua. Na taʻua e Iesu o le a iai se tupulaga patino e molimauina ni tulaga uiga ese e faailogaina aso e gata ai o le “faiga o mea a le lalolagi.” (Mataio 24:3-42) O le faataunuuina o folafolaga a Iesu i o tatou aso, ua faailoa mai ai ua toeitiiti ona faalaa mai lea o le Atua i lenei faiga o mea. *

Peitaʻi, e faapefea ona aveesea e le Atua mafatiaga? A o iai Iesu i le lalolagi, sa ia faaalia le mana o le Atua lea e mafai ona faaitiitia ai mafatiaga o tagata. Ia mātau faaaʻoaʻoga nei.

Mala Faalenatura: A o folau Iesu ma ona aposetolo i le Sami o Kalilaia na iai se matagi malosi na mafai ona goto ai le vaa. Peitaʻi, ua faaalia e Iesu e na te mafaia faatasi ma lona Tamā ona pulea mea o le natura. (Kolose 1:15, 16) Na ia faapea mai: “Ia fifilemu, ma ia malū!” O le iʻuga, “ona toʻa ai lea o le matagi ma ua malū lava ai.”​—Mareko 4:35-39.

Faamaʻi: Na lauiloa Iesu i lona mana e na te faamālōlō ai ē e tauaso, pipili, o ē na mafatia i le maʻi māliu, lepela po o se isi lava ituaiga faamaʻi. “Ua ia faamālōlō foʻi i latou uma ua mamaʻi tigāina.”​—Mataio 4:23, 24; 8:16; 11:2-5.

Utiuti o Meataumafa: Na faaaogāina e Iesu le mana na tuuina mai e lona Tamā e foʻia ai lenei faafitauli. O loo taʻua i le Tusi Paia a o fai lana faiva, na faalua ona ia fafagaina faavavega le faitau afe o tagata i ni nai meaʻai.​—Mataio 14:14-21; 15:32-38.

Oti: O loo iā Ieova le mana e na te aveesea ai le oti e pei ona faamaonia mai i toetū e tolu o loo faamauina na faia e Iesu. O se tasi o ē na faatūina mai ua fa aso talu ona maliu.​—Mareko 5:35-42; Luka 7:11-16; Ioane 11:3-44.