Skip to content

Skip to table of contents

“Na silasila mai lava ou fofoga ina o afuafua aʻu.”​—SALAMO 139:16

Pe e Malamalama le Atua iā te Oe?

Pe e Malamalama le Atua iā te Oe?

MEA E TATOU TE AʻOAʻOINA MAI I LE FOAFOAGA

Seʻi tomānatu i se tasi o faiā e faapitoa ma sili ona māfana e mafai ona maua e tagata, o le avea lea o ni masaga e tutusa lelei. Na faapea mai Nancy Segal, o lē e faauluulu i ai le Twin Studies Center, ma o ia foʻi o se masaga e faapea, o nisi masaga “e mafai ona la fesootaʻi ma malamalama lelei le tasi i le isi.” Na faamatala mai foʻi e se tasi fafine le la faiā ma lana masaga e faapea: “E iloa lelei e le tasi le isi.”

O le ā e māfua ai lenei fesootaʻiga faapitoa? Ua taʻua e nisi suʻesuʻega e faapea, e lē na o le siʻomaga ma le auala e tausia aʻe ai e mātua fanau e māfua ai lenei fesootaʻiga. Peitaʻi o le auala faapitoa e taitutusa ai kene (genes) o tino o masaga e iai sona aafiaga tele i le auala e la te fesootaʻi ai.

IA MĀTAU: O Lē na foafoaina i tatou e na te silafia lelei i tatou taʻitoʻatasi nai lo o se isi lava. Na faailoa mai e le faisalamo o Tavita e faapea: “Na e ufiufi iā te aʻu i le manava o loʻu tinā. Na silasila mai lava ou fofoga ina o afuafua aʻu. Na tusia foʻi i lau tusi ona vaega uma.” (Salamo 139:13, 15, 16) Ua na o le Atua e malamalama atoatoa ma silafia lelei le auala o loo faia aʻe ai o tatou tino ma mea ua tutupu i o tatou olaga ua māfua ai o tatou uiga. O le atamai tutasi o le Atua iā i tatou ma le auala na faia aʻe ai o tatou tino ua faamautinoa mai ai e na te malamalama lelei iā i tatou.

O LE Ā UA AʻOAʻOINA MAI I LE TUSI PAIA E FAATATAU I LE ATAMAI O LE ATUA?

Na tatalo Tavita e faapea: “Ieova e, ua e suʻesuʻe mai aʻu, ma ua e silafia lava aʻu. Ua e silafia lava loʻu nofo i lalo ma loʻu tulaʻi. Ua e silafia mamao mai foʻi oʻu manatunatuga. A o leʻi fai atu se upu i loʻu gutu, faauta! Ieova e, ua e silafia uma lava.” (Salamo 139:1, 2, 4) E lē gata i lea, e silafia lelei e Ieova o tatou faalogona moni faapea ma “mafaufauga ma faanaunauga uma.” (1 Nofoaiga a Tupu 28:9; 1 Samuelu 16:6, 7) O le ā ua faailoa mai e nei mau e faatatau iā Ieova?

E ui e tatou te lē faaleo atu o tatou mafaufau ma faalogona pe a tatalo atu i le Atua, ae e na te mātauina mea e tatou te faia ma e malamalama lelei i le māfuaaga e tatou te faia ai. E lē gata i lea, e na te malamalama lelei i mea e tatou te mananaʻo e fai e ui lava e avea o tatou vaivaiga ma mea e taofia ai i tatou mai i le faia faapea. E mautinoa, ona na muaʻi tuuina e Ieova i o tatou loto le alofa, e finagalo la o ia ma e naunau foʻi e silasila mai ma malamalama i o tatou manatunatuga ma uunaʻiga alofa.​—1 Ioane 4:7-10.

E leai se mea e lilo i le silafaga a le Atua. E na te silafia foʻi o tatou mafatiaga e tusa pe e lē iloa mai pe e lē malamalama atoatoa i ai isi

 Ua faamautinoa mai e le Tusi Paia

  • “O loo silasila mai fofoga o Ieova i ē e amiotonu, e faafofoga mai foʻi ona taliga i la latou talosaga.”​—1 PETERU 3:12.

  • Ua folafola mai e le Atua e faapea: “Ou te foaʻi atu iā te oe le tofā mamao, ma faatonu oe i le ala e ao ona e savali ai. Ou te fautua atu foʻi ma ou vaai iā te oe.”​—SALAMO 32:8.

E ALOFA MUTIMUTIVALE LE ATUA

Pe e mafai i le iloaina o loo malamalama lelei le Atua i o tatou tulaga ma faalogona ona fesoasoani iā i tatou e onosaia ai faigatā? Ia mātau le mea na tupu iā Anna, mai i Nigeria. Na ia faamatala mai, “Na ou tuufesili pe faamata e iai se aogā o le ola pea ona o tulaga faigatā na ou fesagaʻia. Ua maliu laʻu tane ma o le taimi e tasi na ou tausia foʻi laʻu tama teine sa taofia i le falemaʻi ona o le faamaʻi i le faiʻai (hydrocephalus), ae oʻu iloa mulimuli ane ua ou maua i le kanesa o le susu ma e tatau ona faia se taotoga ma togafitiga o le kanesa (chemotherapy ma le radiotherapy). Na faigatā mo aʻu le taofia faatasi i le falemaʻi ma si aʻu tama o loo tigāina.”

O le ā na fesoasoani iā Anna e feagai ai ma lenei tulaga? “Na ou mafaufau loloto i mau e pei o le Filipi 4:6, 7 lea e faapea mai ʻe leoleoina o o outou loto ma mafaufau i le filemu mai i le Atua, e silisili i mea uma lava e manatu i ai.’ O taimi uma lava e oso mai ai lenei mau i loʻu mafaufau, ou te lagona ai se faiā māfana ma Ieova, ma iloa ai e sili atu ona malamalama o ia iā te aʻu nai lo o aʻu lava. Na ou maua foʻi le tele o faalaeiauga mai i oʻu uso ma tuafafine pele i le faapotopotoga Kerisiano.

“E ui lava o loo oʻu tauivi pea ma tulaga tau soifua mālōlōina, ae ua faaleleia lo ma tulaga ma laʻu tama teine. Na ma iloa e lē tatau ona iai ni o ma manatu lē lelei pe a feagai ma luʻi, ona o loo faatasi mai Ieova. Ua faamautinoa mai e le Iakopo 5:11 iā i tatou e faapea: ʻUa tatou faapea atu, e fiafia i latou e tumau. Ua outou faalogo i le tumau o Iopu i lona faamaoni, ma ua outou iloa foʻi le iʻuga mai iā Ieova, auā e alofa faapelepele ma alofa mutimutivale Ieova.’”Na malamalama lelei Ieova i le tulaga o Iopu, ma e tatou te mautinoa foʻi e malamalama lelei o ia i faigatā o loo tatou fesagaʻia.