Skip to content

Skip to table of contents

“E sili atu ona tāua outou.”​—MATAIO 10:31

Po o Silasila Mai le Atua iā te Oe?

Po o Silasila Mai le Atua iā te Oe?

MEA E TATOU TE AʻOAʻOINA MAI I LE FOAFOAGA

I le itula muamua talu ona fanau mai se pepe, e tāua i se tinā ona iai se faiā vavalalata ma lana pepe. O lenei faiā vavalalata o le a faaleleia ai le tuputupu aʻe o le tamaitiiti. *

O le ā e uunaʻia ai se tinā e tausi faapelepele i lana pepe ua faatoʻā fanau mai? Na faamatala e le Polofesa o Jeannette Crenshaw i le The Journal of Perinatal Education e faapea, o le siitia o le aofaʻi o homone o le tinā e taʻu o le oxytocin “e faatupu ai faalogona faatinā ina ua faatoʻā uma ona fanau a o tago, vaai atu, ma fafaga lana pepe faatoʻā fanau mai.” O se isi homone e maua i tinā i lenā taimi “e fesoasoani iā te ia e tali atu ai i manaʻoga o lana pepe” ma faamalosia ai le la faiā. Aiseā e tāua ai lenei vala?

Na faia e Ieova le Atua o Lē na foafoaina mea, * le faiā vavalalata a se tinā ma lana pepe. Na viiviia e le tupu o Tavita le Atua ina ua ia aumaia o ia “mai i le manava” ma lagona le malupuipuia i le fusi atu a lona tinā. Na ia tatalo: “Na tuuina atu aʻu iā te oe mai i le manava; o oe lava o loʻu Atua talu ina ou iai i le manava o loʻu tinā.”​—Salamo 22:9, 10.

IA MĀTAU: Pe afai na foafoaina e le Atua lenei faiga lavelave e faamautinoa ai o le a vaaia ma le alofa e se tinā lana pepe ma tali atu i ona manaʻoga, pe e na te lē naunau moni mai foʻi la iā i tatou taʻitoʻatasi, “o fanau a le Atua”?​—Galuega 17:29.

O LE Ā UA AʻOAʻOINA MAI I LE TUSI PAIA E FAATATAU I LE SILASILA ALOFA MAI O LE ATUA?

Na aʻoaʻo mai e Iesu Keriso, o lē e sili atu lona iloa o Lē na foafoaina mea nai lo o se isi e faapea: “Po ua lē faatauina atu ea ni tamaʻi manulele se lua i se tupe itiiti? Ae pe a paʻū se tasi o na tamaʻi manulele i le eleele, e silafia lava e lo outou Tamā. E oo foʻi i o outou lauulu, ua faitaulia uma. O lea la, aua neʻi outou fefefe: E sili atu ona tāua outou nai lo o tamaʻi manulele e tele.”​—Mataio 10:29-31.

E toʻaitiiti i tatou e ano i manulele lāiti uma e tatou te vaai i ai, pe mātauina foʻi ʻpe a paʻū se tasi o na manulele.’ Peitaʻi, e silafia lelei e lo tatou Tamā i le lagi nei manulele taʻitasi. Po o le ā lava le tele o manulele, e lē sili atu lo latou tāua nai lo o le tāua o le tagata i lana silafaga. O lea, o loo manino le lesona: E lē tatau ona e “fefe” pe popole foʻi e faapea e lē o silasila mai le Atua iā te oe. Nai lo o lea, e matuā naunau mai o ia iā te oe.

E naunau mai le Atua mo lo tatou lelei ma e silasila mai iā i tatou ma le alofa

 Ua faamautinoa mai e le Tusi Paia

  • “O loo i mea uma lava fofoga o Ieova, o loo silasila pea i ē e amioleaga ma ē e amiolelei.”​—FAATAOTO 15:3.

  • “O loo silasila mai fofoga o Ieova i ē e amiotonu, ma e faafofoga mai foʻi ona taliga i la latou alaga atu mo se fesoasoani.”​—SALAMO 34:15.

  • “Ou te fiafia ma olioli i lou alofa faamaoni, ona ua e silasila mai i loʻu puapuaga; ua e silafia foʻi oʻu mafatiaga.”​—SALAMO 31:7.

ʻNA OU LAGONA E LĒ O ALOFA MAI IEOVA IĀ TE AʻU’

Pe e mafai ona aafia o tatou olaga i le iloaina o loo naunau moni ma silasila alofa mai le Atua mo lo tatou lelei? E mautinoa e mafai. Ua faamatalaina e Hannah * mai i Egelani:

“E tele taimi na ou lagona ai e lē o alofa mai Ieova iā te aʻu ma e lē o tali mai i aʻu tatalo. Na ou mafaufau o le māfuaaga ona o le lē lava o loʻu faatuatua. Na ou lagona ua faasalaina pe lē amanaʻia aʻu ona e leai soʻu tāua. Na ou faapea e lē o manatu mamafa mai le Atua iā te aʻu.”

Peitaʻi, e lē o toe masalosalo Hannah po o silasila mai Ieova pe e alofa mai foʻi. O le ā na suia ai ona lagona? Na ia faamatala mai, “Na faasolosolo mālie suiga. Ou te manatua se tasi o lauga faale-Tusi Paia i le tele o tausaga ua mavae e faatatau i le taulaga togiola a Iesu lea na matuā telē se aafiaga iā te aʻu, ma fesoasoani iā te aʻu e maua ai lagona mautinoa i le alofa o Ieova. Ina ua tali mai Ieova i aʻu tatalo, o le tele o taimi e maligi ai oʻu loimata, ona ou te iloa e alofa mai o ia iā te aʻu. O le suʻesuʻeina foʻi o le Tusi Paia ma le auai i sauniga faa-Kerisiano, ua aʻoaʻoina ai aʻu i le tele o mea e faatatau iā Ieova, o ona uiga, ma lona finagalo e faatatau iā i tatou. Ua ou iloa nei le fesoasoani a Ieova ma lona alofa mo i tatou uma ma e nofosauni o ia e tausia i tatou taʻitoʻatasi.”

E faalaeiauina i tatou i faamatalaga a Hannah. Ae e faapefea ona e mautinoa e malamalama ma e manatua e le Atua ou faalogona? O le a talanoaina i le mataupu o sosoo mai lenā fesili.

^ pala. 3 O nisi tinā e maua i faalogona mafatia (postpartum depression) i le taimi e faatoʻā fanau ai ma atonu e faigatā ona iai so latou faiā vavalalata ma a latou pepe. Peitaʻi, e lē tatau ona latou tuuaʻia i latou lava. E tusa ai o le U.S. National Institute of Mental Health, o le faalogona mafatia “e māfua mai i se tuufaatasiga o vala tau i le tino ma tau faalogona . . . ae e lē māfua ona o se mea na fai e le tinā pe e na te leʻi faia foʻi.” Mo nisi faamatalaga i lenei mataupu, tagaʻi i le mataupu “Understanding Postpartum Depression” i le Iuni 8, 2003 lomiga o le Awake!

^ pala. 5 O Ieova o le suafa o le Atua e pei ona faailoa mai i le Tusi Paia.​—Salamo 83:18.

^ pala. 15 Ua suia isi igoa i nei mataupu.