Ua Fesili Mai Talavou

Po o Maʻua ua na o se uō pe e Iai Nisi Faalogona e Sili Atu? Vaega 2

I LE MATAUPU TALU AI, na talanoaina ai ni mea moni se lua o le olaga.

● Pe afai e te ova māfana atu a o leʻi sauni mo se faiā mautū, o le a e mafatia.—Faataoto 6:27.

● Pe afai e te ova māfana atu a o leʻi sauni mo se faiā mautū, o le a motusia la se faigāuō. *—Faataoto 18:24.

I LENEI MATAUPU, o le a tatou talanoaina ai

● Le mea moni lona tolu e faatatau i le soona māfana atu

● Le auala e iloa ai ua suia le lua faiā mai i se faauōga masani, i se faigāuō fetosinaaʻi ma le isi itupā

LE MEA MONI: Pe afai e te ova māfana atu a o leʻi sauni mo se faiā mautū, o le a faaleagaina lou talaaga. Ua faapea mai Mia *: “E tele tama ou te vaai e eseese teine e faauō i ai, ae o le mea moni o loo taaalo i faalogona o teine. E manatu teine e naunau moni tama iā i latou, ae o tama e na o le fia maua o ni teine e eva ai.

 Mafaufau i mea nei:

● E tusa po o oe o se tama po o se teine, ae o le ā le aafiaga o lou talaaga pe a e ova māfana atu i se tasi o le isi itupā?

“E telē se lamatiaga o le text atu i se tasi o le isi itupā. E amata ona e text i se tagata se toʻatasi, ae uma ane ua e text faalausosoo i ni tagata se toʻatele. E te toe iloa ane ua toʻatolu tama ua e faauō i ai, ma e manatu i latou taʻitoʻatasi o ia o ʻlau uō faapitoa.’ Pe a latou iloa mulimuli ane le mea moni, o le a mafatia o latou faalogona—ma o le a lauiloa oe o sē e faatafai.”—Lara.

Ua faapea mai le Tusi Paia: “E mafai ona iloa le tama [po o le teine] i lana amio; pe e lelei ma tonu ana mea e fai.”—Faataoto 20:11.

Manatu autū: E lē sesē le faifaimea faatasi ma tagata o le isi itupā. Ae afai e leai ni au tapulaa, o le a e mafatia, faaleagaina se faauōga lelei, ma faaleagaina ai lou talaaga.

E faapefea ona e iloa ua e ova māfana atu? Muamua, ia fesili ifo iā te oe lava, ʻPe ou te faailoa uma atu aʻu mataupu i se tagata se toʻatasi o le isi itupā?’ Ua taʻua e se teine e igoa iā Erin: “Afai e moni o lenā tama ua na o se uō, e lē tatau la ona avea o ia ma se tasi  e te talanoa muamua lava i ai i aso uma e uiga i mataupu tāua. E lē tatau foʻi ona e liliu atu iā te ia mo ni faamāfanafanaga taufaalogona.”

Mafaufau i mea nei:

● Aiseā e foliga mai ai e te fiafia e faamatala uma atu i se tasi o le isi itupā mataupu e uiga iā te oe lava? Ae o ā ni lamatiaga?

“O tama ou te iloaina, e lē o ni aʻu uō māfana. Ou te lē talanoa iā i latou i le telefoni mo ni itula e pei ona ou talanoa i saʻu uō teine. Ma e iai nisi mataupu ou te lē faailoaina atu iā i latou.”—Rianne.

Ua faapea mai le Tusi Paia: “Ia faaeteete i tala e te fai atu . . . o lē e tautala ma le lē faautauta e na te faatigā iā te ia lava.”—Faataoto 13:3, Good News Translation.

Iloilo: Pe e iai se lamatiaga o le faailoa uma atu o mataupu e uiga iā te oe, i se tasi o le isi itupā? Ae faapefea pe a teʻi ua faauma faafuaseʻi le lua faigāuō? Po o le a e toe salamō i le faailoa uma atu o au mataupu i lenā tagata?

Ua faapea mai se talavou e igoa iā Alexis: “Aua e te taumafai e ʻalofia se tasi ona e faapea o ia o le isi itupā. I le isi itu, aua e te ʻolegia oe lava ma faapea o oulua ua na o se uō, ae e leai. Ia pulea pea ou faalogona, ona e ʻalofia ai lea o le tele o tigā.”

E maua nisi mataupu faa-Peretania o le faasologa, “Ua Fesili Mai Talavou” i le Initaneti i le www.jw.org

[Faaopoopoga i lalo]

[Pusa i le itulau 21]

TALA MONI: “Sa iai se tama na vavalalata le ma masaniga, ae na ou mātauina ua faasolo ina uumi a ma talanoaga ma talanoa i mataupu e uiga iā i maʻua lava. E na te faailoa uma mai iā te aʻu ona popolega. Ae i se tasi aso, na imeli mai ai ma fai mai ua iai ona faalogona mo aʻu. Ou te leʻi iloa se tala a fai atu, ae sa ou fiafia ona e manaia le iloa o loo iai se isi e na te faatāua aʻu. Peitaʻi, sa ou popole auā na ou iloa o le a lē avea pea i maʻua e na o se uō. Ou te iloa o le a mafatia o ia pe a ou fai atu e ma te leʻi taitai mo se faigāuō fetosinaaʻi. Sa ou talanoa i oʻu mātua ma na la fautuaina aʻu, e lelei ona faaitiitia a ma fesootaʻiga. O lenā mea na tupu, na ou iloa ai le vave ona suia mai i le na o se uō, ae avea o se faigāuō fetosinaaʻi. Talu mai lenā taimi, na ou faaeteete ai i le faifaimea faatasi ma se tasi o le isi itupā, aemaise lava le faaaogāina o text. E fesoasoani foʻi le faifaimea faatasi o se vaega toʻatele nai lo o le ō na o oulua ma se tasi o le isi itupā. O lenā auala, o le a ʻalofia ai le ova māfana o a oulua talanoaga, ma soona tosina atu ai i le isi tagata.”—Elena.

[Pusa i le itulau 22]

FESILI I OU MĀTUA

Ia fesili atu i ou mātua po o le ā so la manatu i fesili e lua o loo i lalo o le vaega, “Mafaufau i mea nei.” Pe e ese o la manatu mai i ou manatu? Afai o lea, e faapefea? O ā ni aogā e te maua mai i o la manatu?—Faataoto 1:8.

[Pusa/Ata i le itulau 22]

TALA A ISI TALAVOU

Andre​—O le tele e te lua faatasitasi ai ma se teine, o le faigofie foʻi lenā ona mapuna aʻe o faalogona, ma manatu ai lenā tagata e te naunau i se faigāuō fetosinaaʻi. Ae afai e iai ni ou sini e fia ausia muamua a o leʻi faia se faigāuō, aua la e te taumafai e amata se faigāuō.

Cassidy​—O aʻu o se tagata e fiafia i so o se isi, ma ona sa ou ola aʻe i se aiga e tele tama, sa faigofie la ona faifaimea faatasi ma i latou, peitaʻi e lē o taimi uma e talafeagai ai. E lē lelei ona feutagaʻi ma se tama e pei ona lua feutagaʻi ma sau uō teine —e mafai ona faauiga sesē e le tama lenā gaoioiga. E sili ona lelei le feutagaʻi ma se tama e pei lava o sou tuagane!

[Siata i le itulau 21]

(Tagaʻi i le lomiga mo le ata atoa)

TAPULAA

IA

✔ faatasutasi o se

✔ faamasani atu i isi

✔ talanoa fiafia

AUA

X le iai na o vaega toʻatele oulua ma leisiitupā

X le talanoa i mataupu e uiga iā te oe lava

X le faatafai

[Siata i le itulau 22]

(Tagaʻi i le lomiga mo le ata atoa)

FAIFAIMEA FAATASI

FAATAFAI

FEPAʻIAʻI

UU LIMA

FEĀKISI