Alu i mataupu o loo iai

Alu i le lisi o mataupu

E Mafai Ona E Faatupu le Filemu

E Mafai Ona E Faatupu le Filemu

 E Mafai Ona E Faatupu le Filemu

E UI atonu na tatou fananau mai ma ni faanaunauga sesē, ae o faiga sauā o se mea e masani ona aʻoaʻoina. E faapena foʻi le faatupuina o le filemu. O ai e mafai ona aʻoaʻoina i tatou i le filemu moni? E mautinoa e na o Lē na foafoaina i tatou, o lē e lē mafaatusalia lona atamai. Iloilo manatu autū e lima o loo mulimuli mai, ma upu tāua o le atamai o loo i le Tusi Paia.

1 “Aua e te matauʻa i se tagata e sauā.” (Faataoto 3:31) O le malosi e pulea ai le ita, e maua mai i uiga e pei o le agamalu ma le amio pulea. Ua taʻua i le Faataoto 16:32: “E sili o lē e faagesegese lona ita nai lo o le toa.” E pei o le malosi o le pā e siʻomia ai se faatanoa vai telē, e mafai foʻi e lenā tagata ona tatalia omiga ma tulaga vevesi. Pe a tali atu ma le agamalu i sē e faaita mai, o le a “liliueseina ai le ita.” (Faataoto 15:1) Ae o le tagata e vave ita, e masani ona pasae aʻe lona ita i ni mea lāiti.—Faataoto 25:28.

2 Filifili ma le atamai au aumea. Ua taʻua i le Faataoto 16:29: “O le tamāloa faasauā e na te faasesēina lona tuaoi.” I le isi itu, “o lē e savali ma tagata atamamai, e atamai ai o ia.” (Faataoto 13:20) Ioe, pe a aumea i tagata e faatupuina le filemu ma faaalia le agamalu ma le amio pulea, o le a uunaʻia ai i tatou e faaaʻoaʻo iā i latou.

3 Ia atiaʻe le alofa moni mo isi. O loo taʻua i le 1 Korinito 13:4-7 le faamatalaga aupito i sili o le alofa. E faapea sona vaega: “E faapalepale ma e agalelei le alofa. . . . E lē itaitagofie. E lē faitauina mea leaga e fai atu iā te ia. . . . E onosaʻi i mea uma, . . . e tumau i mea uma.” Na fetalai Iesu pe a tatou mananaʻo e faaaʻoaʻo i le alofa o le Atua, e tatau foʻi ona alolofa atu i o tatou fili.—Mataio 5:44, 45.

4 Ia maufaatuatuaina le Atua e feutagaʻi ma ē amioleaga. “Aua le taui atu le leaga i le leaga i se tasi. . . . Afai e mafai iā te outou, ia nonofo filemu ma tagata uma. Le ʻaupele e, aua tou te tauimasui, . . . auā ua tusia: ʻO aʻu e faia le tauimasui; ou te taui atu lava, ua fetalai mai ai Ieova.’” (Roma 12:17-19) Pe a faatuatua i le Atua ma ana folafolaga, o le a tatou maua le filemu i le loto lea e lē o malamalama i ai tagata e lē faatuatua.—Salamo 7:14-16; Filipi 4:6, 7.

5 Taulaʻi atu i le Malo o le Atua e aumaia le filemu moni i le lalolagi. Ua toeitiiti ona aveesea lea e le Malo o le Atua mea leaga uma, ae pulea atoatoa le lalolagi aoao. (Salamo 37:8-11; Tanielu 2:44) E ala i lenā Malo, o le a “tupu olaola ai lē e amiotonu,” ma o le a “tele foʻi le filemu seʻia leai se masina.”—Salamo 72:7.

O na aʻoaʻoga mai i le Tusi Paia na fesoasoani i le faitau miliona o tagata, e aofia ai ē na masani i faiga sauā, e avea ma ē e faatupuina le filemu. Seʻi manatu i le faaaʻoaʻoga a Salvador Garza.