Le Manatu o le Tusi Paia

Pe e Sesē pe a Sui Lau Lotu?

Ina ua amata ona suʻesuʻe e Avtar le Tusi Paia, sa lē fiafia lona aiga Sikh. Ua faapea mai o ia, “I le matou atunuu, a sui lau lotu, o le a faaesea oe e tagata lautele. E oo lava i o matou igoa e iai uiga faalotu. A sui lau lotu, e vaai i ai ua e teena lou talaaga ma lē faaaloalo i lou aiga.”

NA MULIMULI ane avea Avtar ma Molimau a Ieova. Po o se mea sesē le sui o lana lotu? Atonu e pei ou manatu o manatu o le aiga o Avtar. E te ono manatu o le lotu o se vaega tumau o le talaaga o le aiga ma le aganuu, ma e lē tatau ona suia.

O le faamamaluina o le aiga o se tasi e tāua tele. Ua faapea mai le Tusi Paia: “Ia e faalogo i lou tamā, o lē na fanaua oe.” (Faataoto 23:22) Ae e sili atu ona tāua le saʻili ia iloa le upu moni, e faatatau i Lē na faia i tatou ma ana fuafuaga. (Isaia 55:6) Pe mafai ona fai lenā saʻiliga? Pe afai e mafai, o le ā le tāua o lenei saʻiliga iā te oe?

Le Saʻilia o Upu Moni Faalelotu

O loo aʻoaʻo e lotu o le lalolagi manatu e feteenaʻi. O le mea moni, e lē mafai ona moni na aʻoaʻoga uma. O le iʻuga, e toʻatele tagata o ē e pei ona taʻua i le Tusi Paia, ua “maelega i le Atua; ae e lē tusa ai ma le iloa lelei o le Atua.” (Roma 10:2) Peitaʻi, e pei ona faamauina i le 1 Timoteo 2:4, ua taʻua e le aposetolo o Paulo e faapea, e finagalo le Atua ‘ia iloa lelei e ituaiga uma o tagata le upu moni.’ E faapefea ona iloa lelei lenā upu moni?

Seʻi manatu i māfuaaga e suʻesuʻe ai le Tusi Paia. Na taʻua e Paulo, o se tusitala o le Tusi Paia e faapea: “O Tusitusiga Paia uma e mai le agaga o le Atua, ma e aogā e aʻoaʻo ai.” (2 Timoteo 3:16) I le avea o se vaega o au saʻiliʻiliga mo le upu moni, ia iloilo faamaoniga e iloa ai e moni mea o loo taʻua i le Tusi Paia. Ia iloilo e oe lava le atamai e lē mafaatusalia o loo i le Tusi Paia, le saʻo aʻiaʻi o le talafaasolopito, ma valoaga ua faataunuuina.

Nai lo le aʻoaʻoina e faapea e talia e le Atua lotu uma, ua taʻu mai e le Tusi Paia i tagata o loo faitau i ai, e aua le talitonu i mea uma e faalogo i ai, ae ia “tofotofo i upu mai i agaga ina ia iloa ai pe e tupuga mai i le Atua.” (1 Ioane 4:1) O se faataʻitaʻiga, o so o se aʻoaʻoga e pogai moni lava mai le Atua, e tatau ona ōgatusa ma ona uiga, e aofia ai lona uiga autū o le alofa.—1 Ioane 4:8.

Ua faamautinoa mai e le Tusi Paia iā i tatou e faapea, e finagalo le Atua ia tatou “maua o ia.” (Galuega 17:26, 27) Talu ai e finagalo Lē na faia i tatou ia saʻili mo le upu moni, e lē se mea sesē la le gaoioi e tusa ai o faamaoniga ua tatou  maua—e tusa lava pe e suia ai la tatou lotu. Ae faapefea faafitauli e ono aumaia ai e lenei tulaga?

Ia Faapaleni le Faamaoni i le Aiga

Pe a suia e tagata o latou talitonuga, latou te ono filifili e lē toe auai i nisi o tū masani ma aso mālōlō faalelotu. E manino lava, o lenei tulaga e iʻu ai i lagona malolosi i totonu o le aiga. Na faamaonia e Iesu lenei mea. Na ia taʻu atu i ona soo e faapea: “Ua ou sau e faatupu fevaevaeaʻiga: o le atalii ma lona tamā, o le tama teine ma lona tinā, o le avā foʻi ma le tinā o lana tane.” (Mataio 10:35) Pe sa uiga Iesu e faapea na fuafuaina aʻoaʻoga a le Tusi Paia, e avea ma pogai o finauga e lē maʻalofia? E leai. Sa ia muaʻi silafia le mea o le a tupu pe a lē tali lelei mai tagata o le aiga, i se tasi e taofi mau i aʻoaʻoga e ese mai i a latou aʻoaʻoga.

Pe e tatau ona ʻalofia finauga i le aiga, e tusa lava po o le ā le tulaga e tulaʻi mai? Ua aʻoaʻo e le Tusi Paia e faapea, e tatau i le fanau ona usitai i mātua, ma e tatau i avā ona gauaʻi i a latou tane. (Efeso 5:22; 6:1) Peitaʻi, ua faatonuina e le Tusi Paia i latou e alolofa i le Atua, ia “usiusitai i le Atua o le pule, nai lo o tagata.” (Galuega 5:29) O lea la, i nisi taimi, o le faamaoni i le Atua e ono iʻu ai ina e faia se filifiliga e lē masani aʻi nisi tagata o le aiga.

E ui lava ua faia e le Tusi Paia se faaeseesega manino i le va o aʻoaʻoga moni ma aʻoaʻoga sesē, ae ua tuu mai e le Atua i tagata taʻitoʻatasi le saʻolotoga e filifili ai, i le auala e tali atu ai. (Teuteronome 30:19, 20) E lē tatau ona faamalosia se tasi e tapuaʻi atu i se auala e na te iloa e lē taliaina, pe filifili i le va o ona talitonuga ma lona aiga. Po o le suʻesuʻeina o le Tusi Paia e iʻu ai ina malepe le aiga? E leai. O le mea moni, o loo faalaeiau e le Tusi Paia se tane ma se avā e eseese a la tapuaʻiga, ina ia tumau pea o se aiga.—1 Korinito 7:12, 13.

Foʻia o le Fefe

Atonu e te fefe po o le a faapeʻī le tali mai a tagata lautele, pe a e suʻesuʻeina le Tusi Paia ma Molimau a Ieova. Ua faapea mai Mariamma: “Na popole loʻu aiga e faapea, o le a ou lē maua se tane e fetaui lelei ma aʻu, e na te mafai ona tausia aʻu. O lea na latou tetee ai i le faia o laʻu suʻesuʻega faale-Tusi Paia.” Sa faatuatua Mariamma iā Ieova le Atua ma faaauau lana suʻesuʻega. (Salamo 37:3, 4) E mafai foʻi ona e faia faapea. Nai lo o le popole i iʻuga e iʻu i ai, ia manatu i aogā e maua mai ai. E suia e le feʻau o loo i le Tusi Paia olaga ma uiga o tagata i se tulaga e sili ona lelei. E aʻoaʻoina tagata ia faaalia le alofa lē manatu faapito i o latou aiga. O le a mafai ona foʻia uiga leaga, e pei o le sauā i upu ma le faaoolima, le faaaogāina sesē o le ʻava ma fualaau ma vailaau faasāina. (2 Korinito 7:1) Ua faalaeiauina e le Tusi Paia uiga lelei e pei o le faamaoni ma le maelega. (Faataoto 31:10-31; Efeso 4:24, 28) Aiseā e te lē suʻesuʻe ai le Tusi Paia, ma iloa ai aogā o le faatatauina o ana aʻoaʻoga i lou olaga?

PE SA E TAUMĀNATU?

▪ Aiseā e iloilo ai ou talitonuga faalelotu?—Faataoto 23:23; 1 Timoteo 2:3, 4.

▪ E faapefea ona e iloa aʻoaʻoga moni?—2 Timoteo 3:16; 1 Ioane 4:1.

▪ Pe avea teteega mai le aiga ma itu e taofia ai lou suʻesuʻeina o le Tusi Paia?—Galuega 5:29.

[Faamatalaga faaopoopo i le itulau 23]

E suia e le feʻau o loo i le Tusi Paia olaga ma uiga o tagata i se tulaga e sili ona lelei

[Ata i le itulau 23]

Mariamma ma lana tane