Ua Fesili Mai Talavou

E Faapefea Ona Faaleleia Aʻu Tatalo?

“E sili ona tāua le Atua, ae e galo i nisi taimi, ona o le tele o mea e fai i le aʻoga, i galuega, po o uō ma aiga.”—Faviola, 15 tausaga, mai Amerika.

“IA TATALO e lē aunoa.” (1 Tesalonia 5:17) “Ia finafinau i le tatalo.” (Roma 12:12) ‘Ia faailoa atu o outou manaʻoga i le Atua.’ (Filipi 4:6) Afai o oe o se Kerisiano, e lē taumatea ua e masani i nei mau. Ma atonu foʻi o loo e talisapaia le tāua ma le ofoofogia o le faaeaga o le tatalo. Ona ua mafai ai ona e talanoa i le Atua e Ou le Malosi Uma Lava i so o se taimi lava o le aso. Ma ua faapea mai le Tusi Paia: “E faafofoga mai lava o ia iā i tatou.” *—1 Ioane 5:14.

Ae atonu ua pei oe o le talavou o loo taʻua i le amataga, e faigatā ona e tatalo. O lea la, o le ā se auala e faaleleia ai lea tulaga? O le a aogā lenei mataupu ina ia (1) e iloa ai po o le ā tonu lou faafitauli, (2) ia fai sou sini e tusa o au tatalo, ma le (3) ia mafai ona tatala le faitotoʻa e ulu atu ai i le tatalo ma ausia lou sini.

Muamua lava, vaai po o le ā le faafitauli. O le ā le itu ua faigatā ai ona e tatalo? Tusi lau tali i lalo.

․․․․․

O le vala e sosoo ai, ia fai sou sini. Ia faailoga le sini o e fia ausia, pe tusi sou sini i le laina i autafa o le faaupuga, “Se isi.”

• Ou te manaʻo ia ou toʻaga e tatalo.

• Ou te manaʻo ia fesuiaʻi aʻu faaupuga.

• Ou te manaʻo ia ou tatalo mai le loto.

• Se isi ․․․․․

Tatalaina o le “Faitotoʻa”

Ua pei le tatalo o se faitotoʻa e mafai ona e tatalaina i so o se taimi. Ae ua fai mai nisi talavou, e seāseā ona latou tatalaina lea faitotoʻa. Peitaʻi ane, taumafai pea e tatala, aua le fiu! O lea ua e iloa le māfuaaga o lou faafitauli ma ua iai foʻi ma lou sini. Pau le mea e te manaʻomia, o se ki e tatala ai le faitotoʻa. O lea, ia mātau mai po o ā faafitauli e ono taofia ai oe mai le faia o au tatalo, ma auala e faaleleia ai.

 O le Loka: O LE FAAPALAPALA.

“O le tele lava o le pisi ua ala ai ona galo iā te aʻu ona tatalo i nisi taimi.”—Preeti, 20 tausaga, mai Peretania.

O le Ki: “Ia outou matuā faautauta ina neʻi outou savavali e pei o ē vālea, ae ia pei o ē popoto, ia outou faaaogā tatau le taimi, auā o aso nei ua leaga.”—Efeso 5:15, 16.

Fautuaga: Ia muaʻi filifili se taimi lelei e tatalo ai i aso uma. E lelei foʻi pe a tusi i lalo, e pei foʻi o isi mea tāua, e faailoga le taimi e fai ai. Ua fai mai Yoshiko, o se teine e 18 tausaga mai Iapani: “A lē faia se taimi patino ou te tatalo ai, e fao uma le taimi e isi mea.”

O le Loka: ALU SOLO LE MAFAUFAU.

“E galo iā te aʻu o lea e fai laʻu tatalo, ona ua alu loʻu mafaufau i isi mea ae lē mafaufau i upu o laʻu tatalo.”—Pamela, 17 tausaga, mai Mekisikō.

O le Ki: “O le tele o mea i le loto e tautala mai ai le gutu.”—Mataio 12:34.

Fautuaga: Faapupuu au tatalo pe afai e alu solo lou mafaufau i isi mea. O le isi foʻi mea e lelei ona fai, tatalo i mea e tāua iā te oe. Ua fai mai Marina, o se teine Rusia e 14 tausaga, “Ina ua avea aʻu ma talavou, na amata ona ou manatunatu loloto e faapea o le tatalo, e tusa o loo talanoa ma le Atua. Ma na uunaʻia ai aʻu e sasaa uma atu iā te ia mea o i loʻu loto e ala i le tatalo.”

O le Loka: FAI O UPU MASANI.

“O aʻu upu lava ia e masani ona fai i aʻu tatalo, e lē suia.”—Dupe, 17 tausaga, mai Benin.

O le Ki: “Ou te manatunatu foʻi i au galuega uma, ou te mafaufau i mea na e faia.”—Salamo 77:12.

Fautuaga: Afai o faia au upu masani i au tatalo ae lē o iai lou mafaufau, o aso uma lava, tusi i lalo se faamanuiaga ua e maua. Ona faafetai lea iā Ieova mo lea faamanuiaga. A e faia faapea i aso uma mo se vaiaso, o lona uiga e fitu mataupu eseese ua e tatalo atu ai, ae tuu au faaupuga masani. Ia faapena foʻi ona faia e tusa o isi mea e tutupu i aso taʻitasi. Ua fai mai Bruno, o se alii mai Pasili e 21 ona tausaga, “A ou tatalo, ou te taumafai ia manatua mea na tutupu i lea aso.” O le mea foʻi lenā e fai e Samantha, o se teine e 18 tausaga mai Amerika. Fai mai o ia, “Ou te taumafai e manatua mea e ese ai le asō mai isi aso, ona taʻu lea i laʻu tatalo. E aogā lea ia tuu ai le taʻu pea o aʻu upu masani i aʻu tatalo.” *

O le Loka: LĒ TALITONU.

“Na ou tatalo i se isi taimi e tusa o se faafitauli i le aʻoga, ae leʻi teʻa ese ai. Ae na o le faateteleina ai. Ona ou faapea lea, ‘Ua ou fiu e tatalo. E lē fia faalogo mai lava Ieova!’”—Minori, 15 tausaga, mai Iapani.

O le Ki: “Pe a oo mai le faaosoosoga, e saunia e ia [Ieova le Atua] se auala e sao ai outou, ina ia outou tumau ai.”—1 Korinito 10:13.

Fautuaga: O le mea ua mautinoa: O Ieova, o ia o “Le faafofoga tatalo.” (Salamo 65:2) Afai ua uma ona e tatalo i se mataupu, ona taumafai lea e malamalama atoa i ai. Aua e te faatali i se tali e tusa o lou manaʻo, ae ia e tagaʻi totoʻa i le tali ua iai. Atonu o lenā ua tali mai Ieova i lau tatalo, ona o le mana mai iā te ia lea ua mafai ai ona e tatalia faafitauli, ae e na te lē o aveesea.—Filipi 4:13.

O le Loka: O LE MĀ.

“E oso lava loʻu mā pe a ou mafaufau atu i tala a tamaiti i le aʻoga pe a ou tatalo a o leʻi ʻai.”—Hikaru, 17 tausaga, mai Iapani.

O le Ki: “E iai le taimi tatau mo mea uma.”—Failauga 3:1, Beck.

 Fautuaga: Atonu e fiafia nisi tagata pe a vāai mai o fai lau tatalo lē leoa, ae e lē manaʻomia ona faaalialia le faiga o lau tatalo. O se faaaʻoaʻoga, na puupuu le tatalo lē leoa a le tagata faatuatua o Neemia na faia i luma o le tupu o Aretaseta, ma e foliga mai e leʻi iloa e le tupu. (Neemia 2:1-5) O lea, afai e te tatalo lē leoa iā Ieova, o le a lē iloa mai e isi lau mea o fai.—Filipi 4:5.

O le Loka: LAGONA E TE LĒ AOGĀ.

“O loo silafia e Ieova oʻu faafitauli uma. Ma afai ua ou fiu i oʻu faafitauli, e mautinoa ua fiu foʻi ma Ieova! E lē o aʻu o se tagata aogā, ma e lē talafeagai loʻu tatalo atu iā te ia.”—Elisapeta, 20 tausaga, mai Aialani.

O le Ki: “Ia taʻu atu o outou popolega uma iā te ia, auā o loo manatu mamafa mai o ia iā te outou.”—1 Peteru 5:7.

Fautuaga: Fai sau faasologa e suʻesuʻe ai ma mafaufau loloto i mau nei: Luka 12:6, 7; Ioane 6:44; Eperu 4:16; 6:10; 2 Peteru 3:9. O mau nei e te iloa ai le naunau mai o Ieova e fia faafofoga mai iā te oe, ae lē seʻi iloga o oe o se Kerisiano faapitoa ona fia faafofoga mai lea o ia. O le faisalamo o Tavita, o se tagata e masani ma popolega ma puapuaga, ma na ia faapea mai ma le mautinoa, “ua latalata mai Ieova i ē ua loto momomo; ua ia faaola foʻi i ē ua loto nutimomoia.” *—Salamo 34:18.

Ua iloa le naunau mai o Ieova iā te oe ona o ia lava e iai le matafaioi o le faafofoga mai i au tatalo. Ua fai mai Nicole, o se teine Italia e 17 ona tausaga, “E lē o tuuina e Ieova i agelu le matafaioi o le faafofoga mai i a tatou tatalo. O lea, afai la o ia lea e feagai ma lea matafaioi, o lona uiga la, e tāua tele a tatou tatalo iā te ia.”

Ua iai isi mataupu i le faa-Peretania o le faasologa “Ua Fesili Mai Talavou” e maua i le Initaneti i le www.watchtower.org/ype

[Faaopoopoga i lalo]

MEA E MAFAUFAU I AI

▪ O ā mea e tāua iā Ieova e mafai ona taʻua i au tatalo?

▪ O ā mea e faatatau i isi tagata e mafai ona e talanoa ai iā Ieova?

[Pusa/Ata i le itulau 12]

TALA A LAU TUPULAGA

“Ua avea le tatalo, e pei o se tusi e tusi ai mea e na o oulua ma Ieova e mafai ona faitau i ai.”—Olayinka, mai Nigeria.

“Seʻi faapea e iai sau uō lelei ma e tele meaalofa ua e foaʻi i ai. Ae ua teʻi lava ua lē toe fia talanoa mai iā te oe. Atonu o lagona na o Ieova pe a tatou lē toe fia tatalo atu iā te ia.”—Chinta, mai Ausetalia.

“Ou te manatu lava, e lē tatau ona faaali atu oʻu lagona. Ae ua avea lenei faaeaga o le tatalo ma mea ou te iloa ai, e leai se afāina o le faaali atu iā Ieova o loʻu fiafia ma loʻu faanoanoa, po o loʻu lē mautonu. Ua mafai nei ona ou pulea lelei oʻu faalogona ia iʻu lelei ai.”—Amber, mai Amerika.

[Ata i le itulau 11]

Faaaogā ki mai le Afioga a le Atua, le Tusi Paia, e tatala ai le faitotoʻa, o le tatalo