Ua Fesili Mai Talavou . . .

Pe e Iai se Fesoasoani Ina ia Tuu ai Lea Amio?

“Na amata ona ou taaloalo i oʻu totogasā i le valu o oʻu tausaga. Faatoʻā ou iloa mulimuli le silafaga a le Atua i lea tulaga. Ou te lagona lava loʻu leaga pe a ou lolo e fai. Na oo mai le manatu, ‘Ailoga e alofa le Atua i se tagata pei o aʻu.’ Na ou manatu, ailoga a ou iai i le lalolagi fou a le Atua.”—Lui. *

ATONU ua pei oe o Lui, ua pulea oe e lea amioga. Ae ua e iloaina, o le a matuā fiafia lava Ieova iā te oe pe afai e mafai ona e pulea oe lava, o se fua lea o le agaga o le Atua. (Kalatia 5:22, 23; 2 Peteru 1:5, 6) Ae o nisi taimi, ua e lolo e fai, ma o taimi uma lava e te lolo ai, e te lagona ai ua leai sou aogā, ua e lē mafaia tapulaa amiotonu a le Atua.

O le manatu tonu lenā na iā Peteru. Ua fai mai o ia: “O taimi uma lava ou te lolo ai e fai lea amioga, ou te lagona ai lava loʻu leaga. Na ou manatu, ailoga a mafai ona faaleleia lea amioga leaga. Na faigatā ona ou tatalo. E amata faapea aʻu tatalo: ‘Ieova e, ou te lē iloa pe e te faafofoga mai i laʻu tatalo, ae . . . ’” O ia lagona, na iai foʻi i se alii talavou e igoa iā Aneteleʻa. Fai mai o ia: “Na ou lagona o aʻu o se tagata pepelo. Ou te lē fia ala i luga i le taeao ma fai galuega o le aso. E ese foʻi le faigatā o le auai i sauniga ma talaʻiga.”

Afai e tutusa ou lagona ma lagona o Lui, Peteru, ma Aneteleʻa, aua e te faavaivai. Ua lē na o oe o iai ia lagona, ma e sau le taimi e te manumalo ai! Ua tele talavou, faapea ma ē matutua, ua tauivi ma lea faafitauli, ma ua latou mafaia. E te mafaia foʻi. *

Feagai ma Faalogona Leaga

E pei ona mātauina, o ē faia lea amio o le taaloalo i totogasā, e tumu i faalogona agasala. Ae ia mautinoa, o le salamō po o le ‘tigā e tusa i le Atua,’ o le a uunaʻia ai oe ia tuu lea  amio. (2 Korinito 7:11) Ae e lē aogā lou faatuutuu i lou lagona nofosala. O le a faavaivaia ai oe ma e faapea ai ua e lē mafaia.—Faataoto 24:10.

Ia tagaʻi totoʻa i lou faafitauli. O le taaloalo i totogasā, o se amioga lē mamā. O le a avea ai oe ma pologa “i tuʻinanau ma mea eseese e fiafia ai,” ma tupu ai manatu e faaleagaina ai. (Tito 3:3) Ae e lē faapea ua tutusa le taaloalo i totogasā ma feusuaʻiga lē mamā, e pei o le faitaaga. (Efeso 4:19) O lea, afai o lou faafitauli le taaloalo i totogasā, aua neʻi e manatu ua e faia se agasala e lē mafai ona faamagaloina. O le auala e manumalo ai, o lou teena lea o le manaʻo e fai, ma taumafai pea ia tuu!

O nisi taimi, afai ua e lolo e fai, e oso ai lava le faavaivai. Afai e tupu lea mea, ia manatua upu o le Faataoto 24:16: “E atu fitu ona paū lē amiotonu, a e toe tū o ia; a o ē amio leaga, e paʻuʻū i latou i le malaia.” Afai ua e lolo i nisi taimi, e lē faapea ai o oe o se tagata amioleaga. O lea, aua le fiu. Ia vaai po o le ā tonu le māfuaaga o lou lolo, ma ia ʻalofia le tulaga lea na māfua ai.

Ia manatunatu i le alofa o le Atua, ae lē o lou saga taʻuvaleaina o oe lava. O le faisalamo o Tavita, na iai taimi na vaivai ai foʻi o ia, ma fai mai: “E faapei ona alofa mutimuti vale o le tamā i lana fanau, e faapea lava ona alofa mutimuti vale o Ieova i ē matataʻu iā te ia. Auā ua silafia lava e ia le mea na fai aʻi i tatou; ua manatu ia o le efuefu lava i tatou.” (Salamo 103:13, 14) Ioe, o loo manatua e Ieova, tatou te lē lelei atoatoa ma ua ia “faamagalo sala” pe a tatou sesē. (Salamo 86:5) Ae ua finagalo o ia ina ia tatou taumafai ia faaleleia mea o loo tatou sesē ai.

O ā ni mea e mafai ona e fai ia manumalo ai i lea amioga ma aua le toe faia?

Aogā o le Talanoa i sē e te Talitonuina

E ui ua tele tala e tusa o faiga faaleituaiga po o feusuaʻiga, ae e lē o se mataupu e faigofie i le tele o tagata ona talanoa ai, i se auala migao ma mamalu. Atonu ua faigatā ona e talanoa i se isi ona o lou māsiasi. Ua fai mai se Kerisiano na tauivi ma lea faafitauli mo ni nai tausaga: “Maʻimau pe a na ou toa e talanoa i se isi i loʻu faafitauli a o oʻu  talavou! E tele tausaga na ou mafatia ai i lagona nofosala, ma na aafia tele ai laʻu faiā ma isi, aemaise o Ieova.”

O ai e mafai ona e talanoa i ai? E sili pe a talanoa i se isi e taʻumatuaina, po o se tasi o ou mātua. E amata i lou ono faapea atu: “E iai loʻu faafitauli lea ou te fia talanoa atu ai iā te oe.”

Na filifili Mário e talanoa i lona tamā, ma na alofa o ia ma malamalama iā Mário. Na ia fai foʻi iā Mário, sa umi se taimi o ia tauivi ma lea amio, a o talavou. Fai mai Mário: “Na matuā faalaeiauina aʻu ona o le faamaoni ma le tautala saʻo o loʻu tamā. Na oo mai le manatu, afai na mafai ona ia tuuina, ou te mafaia foʻi. Na ou tagi ona ua ootia loʻu loto i uiga na faaalia e loʻu tamā.”

Na faamalosi Aneteleʻa e talanoa i se toeaina Kerisiano, ma ua fiafia ona o lona faia faapea. * Fai mai o ia: “Na maligi loimata o le toeaina a o ia faalogologo mai iā te aʻu. Ina ua uma laʻu faamatalaga, sa ia faamanatu mai le alofa o Ieova iā te aʻu. Na fai mai o ia e lē na o aʻu e iai lea faafitauli. Na fai mai o le a fai ma siaki mai po o ā mai laʻu taumafaiga ma saʻili mo nisi faamatalaga mai lomiga faale-Tusi Paia. Na ou lagonaina ai e tauivi pea, e ui ina ou paʻū i nisi taimi.”

E mafai ona e maua le fesoasoani a o e tauivi ia manumalo i lea amio o le taaloalo i totogasā, e pei o Mário ma Aneteleʻa. Faaaogā le fautuaga o loo i le pusa, “Ia Fai se Taumafaiga!” Ia e mautinoa, e mafai ona e manumalo ai!

Ua iai nisi mataupu faa-Peretania o le faasologa, “Ua Fesili Mai Talavou . . .” e maua i le Initaneti, i le www.watchtower.org/ype

[Faaopoopoga i lalo]

MEA E MAFAUFAU I AI

▪ Aiseā e tāua ai ona manatua, o Ieova “e faamagalo sala”?—Salamo 86:5.

▪ O ā mea e te faia ia manumalo ai i le amioga o le taaloalo i totogasā?

▪ Aiseā e lē tatau ai ona e matamuli e talanoa i se isi mo se fesoasoani?

▪ O le ā se auala sili e aogā ia mafaufau ai i mea ua mamā?

[Pusa/Ata i le itulau 13]

E Lē Faapea ua E Lē Mafaia pe a Toe Tupu!

E faigofie lava ona oo ifo le manatu: ‘Ua toe tupu foʻi, ou te lē mafaia lava.’ Ia e tetee i lea manatu. Aua le avea lou lolo i nisi taimi ma tulaga e te manatu ai ua e lē mafaia.

Seʻi fai se faataʻitaʻiga: Afai o lea e te savali i se faasitepu agaʻi i luga ae teʻi ua e paʻū mai i tua i se sitepu se tasi pe lua, po o lona uiga e te faapea: ‘E tatau ona ou toe amata mai i lalo’? E leai! O lea, aua neʻi e manatu ua e lē mafaia pe afai ua iai se taimi ua e toe lolo ai e fai.

E oo iā te oe lagona leaga pe a e lolo e fai. Atonu o le a matuā aafia ai ou lagona ma e faapea o oe e leaga, e te lē mafaia se mea, ma ua e lē aogā. Aua e te tuu i lea lagona. E faavaivaia ai oe mai lau tauiviga. Ma ia manatua le mea lenei: Na afio mai Iesu Keriso, o lē e sili i ē uma ua soifua, e togiola ē agasala, ae lē o ē lelei atoatoa. O lea, e leai ma se isi o i tatou i le taimi lenei e lelei atoatoa i mea e fai.—Tagaʻi i le Awake! Aperila 8, 1991, itulau 15.

[Pusa/Ata i le itulau 14]

Ia Fai se Taumafaiga!

▪ Ia sui le mea e te mafaufau i ai.—Filipi 4:8.

▪ ʻAlofia le matamata i mea e oso ai lagona lē lelei.—Salamo 119:37.

▪ Ia tatalo ‘ia matuā tele le mana’ e foaʻi mai.—2 Korinito 4:7.

▪ Ia pisi i galuega faa-Kerisiano.—1 Korinito 15:58.

[Pusa/Ata i le itulau 14]

Nisi Fesoasoani Faaopoopo

Tagaʻi i le tusi ua lomia e Molimau a Ieova, Fesili ua Fesili Mai ai Talavou . . . Tali e Aogā, i le mataupu 25 ma le 26, mo faamatalaga faaopoopo i lea mataupu.