Le Manatu o le Tusi Paia

Po ua Lē Aogā le Faa-Kerisiano?

E TUSA ma le tasi vaetolu o le aofaʻi o le lalolagi ua fai mai o Kerisiano. Ae ua sili ona fevaevaeaʻi ma sauā le lalolagi i nei aso. Po o lona uiga, ua lē aogā le Faa-Kerisiano, lea na aʻoaʻoina e Iesu? Po o le tagata e māfua mai ai le faalētonu, ma le auala o loo faatino ai aʻoaʻoga a Keriso?

O le a talanoaina i lenei mataupu aʻoaʻoga moni a Keriso ma le faaaʻoaʻo na ia fai mo ona soo. O le a talanoaina foʻi se manatu o loo taatele i ē fai mai o Kerisiano, ae o se manatu e lē ōgatasi ma le Faa-Kerisiano moni.

Mimilo le Faa-Kerisiano

Ina ua mavae le faitau selau o tausaga talu le maliu o Keriso, na avea le Faa-Kerisiano lea ua mimilo sesē ma lotu autū o le Emepaea o Roma. Ua lē toe inosia, ae ua autū i ai le olaga faapolotiki ma mataupufai a tagata Roma. O taʻitaʻi lotu e iai Aokusotino, na latou aʻoaʻoina e faapea, o lea ua faavae le Malo o le Atua i le lalolagi. Na latou aʻoaʻo foʻi e faapea o lo latou paoa faapolotiki ma faalelotu, o le auala lea ua faatino ai le finagalo o le Atua i le lalolagi. Sa matuā faatāuaina lava taumafaiga faaletagata, e faatautaia ai mataupufai o le lalolagi.

O lea, ua manatu ai le toʻatele, e ao ona fai se vaega a Kerisiano i faiga faapolotiki a le lalolagi. O lona uiga, e iai taimi e ao ai i se Kerisiano ona faamuamua manaʻoga o tagata, ae lē o ona talitonuga. O se faataʻitaʻiga, e toʻatele ua talitonu i aʻoaʻoga a Keriso, ina ia fealofani ma filemu, ae latou te lagolago foʻi taua mataʻutia. O le tulaga  foʻi lenā o iai lotu, e aʻoaʻo ona tagata ia tatalo mo le Malo o le Atua, ae ua latou lagolagoina foʻi taʻitaʻi lē alolofa.

E lē o lea le ituaiga o Faa-Kerisiano na faavaeina e Iesu. Ae o se Faa-Kerisiano ua faavae e tagata, ma o loo mulimuli ai le tele o ē fai mai o Kerisiano. O le Faa-Kerisiano lea ua lē taulau, e pei ona faamaonia i le lē amanaʻia e le toʻatele o taʻiala mai le Tusi Paia, i atunuu Kerisiano i aso nei.

O le ā Tonu na Aʻoaʻoina e Iesu?

Atonu o le a faateʻia le toʻatele pe a iloaina, na fetalai Iesu i ona soo ia ‘lē ni o le lalolagi i latou, faapei o ia, e lē so le lalolagi’ foʻi o ia. (Ioane 17:15, 16) Aiseā na fetalai ai Iesu i ona soo ia faia faapea? Ua tali mai le soo na pele iā Iesu, o Ioane, e faapea: “A o le lalolagi uma o loo nofo toʻilalo i loo leaga.”—1 Ioane 5:19.

O lea la, e lē o tataʻiina tagata e aʻoaʻoga a Iesu ia faalagolago i faalapotopotoga a tagata, ae ua faasino i le Malo faalelagi o le Atua, o lea le auala o le a maua ai se lalolagi e iai le faimea tonu ma le faimea saʻo. (Mataio 6:10) E leʻi iai ma sina fia auai o Iesu i meafai i ona aso. Na ia teena foʻi se tulaga e avea ai ma pule. (Ioane 6:15) Na ia teena foʻi le foʻia o finauga e ala i faiga sauā. (Mataio 26:50-53; Ioane 18:36) E leʻi tuu maia e Iesu ni tulafono e pulea ai atunuu ma tagata. E leʻi faaituʻau foʻi o ia i finauga na iai i na aso. E leʻi auai i teteega e tetee atu i le faia o tagata ma pologa, pe auai i taumafaiga a tagata Iutaia faasaga iā Roma.

Ae e lē faapea ai e leʻi amanaʻia e Iesu popolega ma faafitauli o tagata. E tele aʻoaʻoga a Iesu e tusa ai ma le matafaioi a tagata i o latou uso a tagata. Na ia faalaeiau i le faamaoni e totogi lafoga, ma faamamafa mai le usitai i ē pule. (Mataio 22:17-21) Na ia aʻoaʻo mai le auala e faaalia ai le naunau mo le lelei o i latou o loo manaʻomia. Na ia aʻoaʻo mai foʻi le auala e faaalia ai le āva ma le faaaloalo ma le alofa i isi, ma ia loto faamagalo ma agaalofa. (Mataio, mataupu 5-7) Ua lauiloa le aano o aʻoaʻoga a Keriso, o le alofa lea i le Atua faapea ma tuaoi.—Mareko 12:30, 31.

Le Faa-Kerisiano Moni i Ona Pō Nei

O le ā la le auala e gaoioi ai se Kerisiano moni? O le faia lea e pei o Iesu. E usitai i tulafono a lona atunuu, ae e lē auai i faiga faapolotiki. (Ioane 12:47, 48) E na te lē tuulafoaʻia taʻiala faa-Kerisiano, e tusa lava pe oo faigatā iā te ia. (1 Peteru 2:21-23) Peitaʻi ane, e lē faapea ai ua lē ano o ia i mea o loo tutupu. E naunau ma galue le Kerisiano moni auā le lelei o isi, e pei ona faia e Iesu. (Mareko 6:34) E galue malosi foʻi o ia e fesoasoani i isi ia latou maua se olaga fiafia, ina ia latou malamalama ma ola e tusa o aʻoaʻoga a Keriso.—Ioane 13:17.

Ua faapena ona taumafai Molimau a Ieova ia faataʻitaʻi iā Keriso i a latou faiā ma le lalolagi. Ua avea i latou ma tagatānuu e faatupu filemu ma usitaia tulafono, ae e lē ni o le lalolagi i latou. E pei ona fai e Iesu, latou te lē fia auai i faiga sauā ma faiga faapolotiki, lea ua matuā taatele. Ae ua latou tepa taulaʻi atu i le Malo o le Atua, o lea le auala e foʻia ai faafitauli o le lalolagi. O le a sili ona fiafia olaga tagata e mulimuli i le Faa-Kerisiano moni, ma ola filemu. (Ioane 13:34, 35) E mautinoa lava, ua matuā aogā lava le Faa-Kerisiano moni.

PO O E TAUMĀNATU EA I NISI TAIMI?

▪ Pe e tatau i Kerisiano ona fai se latou vaega i faiga faapolotiki?—Ioane 6:15.

▪ Pe na aʻoaʻo e Iesu le foʻia o finauga e ala i faiga sauā?—Mataio 26:50-53.

▪ O le ā le auala e iloa ai Kerisiano moni?—Ioane 13:34, 35.

[Ē Ana le Ata i le itulau 27]

EL COMERCIO, Quito, Ecuador