ANNUWAHONNA AMUUWA
6: Seejjo
HATTO YAA MAYYAATE?
Seejjate yaa raga leellishate woy rosiisate. Mito woyite, ooso busha akatansa biddi assidhanno gede assano ikkitara dandiitanno. Roore anga kayinni, seejjate yaa oosote gara ikkinore assitanno gede kaaˈlannonsa amanyooti heeˈrannonsa gede qajeelsate.
HASIISSANNOHU MAYIRAATI?
Muli dirra kawa, annuwunna amuuwu oosonsa seejja horo agurtino yaa dandiinanni; insa seejjo ooso hutisse huntannonsa yite waajjitanno. Hayyootu annuwinna amuuwi kayinni, quwa saˈukkinni oosonsara wodho fushshitanno; qoleno oosonsa hattee wodho garinni heedhanno gede qajeelsitannonsa.
“Ooso lophite miqichaamma ikkitanno gede, mito coye hoola hasiissanno. Seejjinannikki ooso laaqaasinchu nookki markaawe gedeeti; togoo markaawe sunu sununni doogotenni fultara wole agurina itante nafa baˈara dandiitanno.”—Pamiila.
MAA ASSA DANDIITINANNI?
Mitte hedore ikke. Qaaqqiˈne fushshitinoonni wodho ayirrisannokkiha ikkiro, qorichisha agurtinoonte. Wodhoˈne ayirrisanno woyite kayinni galattesi.
“Tenne hajajamanno manni bashile yiinokki alamera oosoˈya owaata ikkitino daafira duucha woyite galateemmansa. Galanteemmonsaha ikkiro, ooso seejjo hasiissannonsa woyite macciishsha digibbanno.”—Kiristiini.
QULLAAWU MAXAAFI BIDDISHSHA: “Mannu wixiˈrinoha mixxanno.”—Galatiyu Sokka 6:7.
Quwa saˈinoonte. Seejjitinanni woyite, qaaqqu diro, dandoosinna huninori hakkeya loworeetironna teˈee hedde. Seejjo roore kaaˈlitannohu loonsoonni soˈro ledo xaadooshshe afidhinota ikkiturooti; lawishshaho, mittu qaaqqi silkesi doogimale horoonsiˈriro, mite yanna geeshsha silke horoonsiˈrannota hoola dancha ikkitara dandiitanno. Wole widoonni kayinni, shiima soˈro batissine lowori bainohu gede ikkitinoonte.
“Qaaqqiˈya afanni heeˈrenni hajajama giwanni nooronna afikki loosino soˈrootiro badate woˈnaaleemmo. Buqqise hoola hasiissannohu darga assiˈrinohu bushu akatinna shiimurinni taashsha dandiinannite shiima soˈro mereero lowo badooshshi no.”—Wendeli.
QULLAAWU MAXAAFI BIDDISHSHA: “Dadillaamma ikkitannokki gede, oosoˈne caacceessitinoontensa.”—Qolasiyaasi Sokka 3:21.
Baxillaano ikke. Ooso anninsanna amansa seejjitannonsahu baxxannonsa daafira ikkinota huwatturo, seejjo macciishshe hajajama roore shota ikkitannonsa.
“Qaaqqinke soˈro loosanno woyite, alba assinohu danchu coyi hagiirsiisannonketa kulleemmosi. Soˈrosi taashshiˈrate assa hasiissannosire assi geeshsha xaa soˈrosi albi danchummasi huntannokkitanna ninkeno kaaˈlineemmosita kulleemmosi.”—Daanieeli.
QULLAAWU MAXAAFI BIDDISHSHA: “Baxillu cincanno; baxillu elanno.”—1 Qorontoosi 13:4.
