Kaaˈlame loosanno minaanninna minaama, horophilla oofanno manchinna kaaˈlaanchisi gedeeti. Togoo minaanninna minaama qarru kalaqamanno woyite nafa, “ninke” yee hedanno ikkinnina “ani” yee dihedanno.

QULLAAWU MAXAAFI BIDDISHSHA: “Insa kunni kaˈa mitto bisooti ikkinnina lame diˈˈikkitino.”—Maatewoosi 19:6.

“Adhanna adhama mittu manchi calla sirbanno madirake gede diˈˈikkitino. Adhamansa seekkanno gede, minaanninna minaama kaaˈlame loosa hasiissannonsa.”—Kiristooferi.

Kaaˈlame loosate rosichi noonsakki minaanninna minaama, qarru kalaqamanno woyite qarra tira agure mimmito bushiishate higanno. Shiimu coyi lophe lowo qarra ikkara dandaanno.

“Adhanna adhama seekkanno gede kaaˈlame loosa lowo geya hasiissanno. Aninna minaanniˈya kaaˈlamme loonseemmokkiha ikkoommero, mulla ledo calla heeˈranno manni gedella ikkine ganteemmo; togoo manni mitteenni heeˈrannoha ikkirono, jajjabba coye doodhanno woyite anna anna doodhanno.”—Aliksaandira.

ATENEETO LAYIˈRI

• Loose afiˈreemmo woxe “ane calliho” yee hedeemmo?

• Roore hisateemmohu galteˈya ledo noommokki woyiteeti?

• Galteˈya ayiddisewa gamba yaa baxxannoha ikkirono, ani insawa gambo giweemmo?

AANTE NOO XAˈMUWA GALTEˈNE LEDO HASAABBE

• Dancha gede kaaˈlamme loonsanni heeˈnoommohu hiittee doogganniiti?

• Albinni roore kaaˈlamme loosa hasiissannonkeri maati?

• Kaaˈlamme loonseemmo gara woyyeessiˈrate maa maa assa dandiineemmo?

KAAˈLITANNO AMAALE

• Hanni lame gaamo angate kaase gaˈnitanni no yine hendo. Ati mitte gaamo wido ikkiteenna galtekki kayinni layinki gaamo wido ikkite no. Hatteentenni, galtekki ledo mitte gaamo wido ikkitine godoˈlitinanni gede maa assa dandiitinanni?

• ‘Qeela dandeemmohu hiittoonniiti?’ yee hedantenni, ‘Qeela dandiineemmohu hiittoonniiti?’ yitine hedde.

“‘Tini ane soˈrootinso ate soˈrooti?’ yaa agurre. Adhamaˈnera roore hasiisanno coyi mereeroˈne keerunna mittimma heeˈrate.”—Eetaani.

QULLAAWU MAXAAFI BIDDISHSHA: “Mittu mittunku woleho woyyannore hedo ikkinnina, umisira woyyannore calla laoonke.”—Filiphisiyusi Sokka 2:3, 4.