AANIIDI QOOLIHA COYI UMO | YESUUSI QARRAMINOHUNNA REYINOHUMAYIRAATI?
Isi Kuni Addanka Ikkinoreeti?
Naaziretete Yesuusa 33 M.D. badheessu woggara shinoonni. Iso beebbate mannu finqilanno gede assootto yine yekkeerroonni; hattono mararrikkinni ganne haqqaho suntoonnisi. Isi lowo geeshsha shete reyino. Ikkollana Maganu reyotenni kayisinosi; Yesuusi 40 barri gedensaanni iimira haˈrino.
Tini xagge noohu Girikete Afiite Qullaawa Borro giddo yaano Haaru Gondoori wido ikkinohu shoolu Wongeeli giddooti. Isi kuni addanka ikkinoreeti? Tini lowo geeshsha hasiissanno xaˈmooti. Tini xagge nookkire ikkituro Kiristaanu ammana waagu nookkita ikkitanno; hattono albillitte Gannatete heeˈrate hexxo mulla haaqete halcho ikkite gattanno. (1 Qorontoosi 15:14) Tini xagge addanka noore ikkituro kayinni, albillitte mannu oosora dancha hexxo heedhannonsa; tini hexxo aterano heedhahera dandiitanno. Ikkina Wongeelu giddo noo xagge addanka ikkitinotenso qalote borrooti?
NOO TAJE MAA LEELLISHSHANNO?
Maattonna masalote gede ikkikkinni, Wongeelu giddo noo xagge borreessituri, gara ikkitino sokka borreessate lowo geeshsha sharrantino. Lawishshaho, insa tenne xagge giddo batinye bayichu suˈmuwa qummi assitino; kuri bayichi suˈmuwa giddo batinyu xaano no. Insa tenne xagge giddo alba heeˈrino manna qummi assitino; yannankera noori alamete xagge borreessaanono kuni manni addinta heeˈrinoha ikkinota ammantanno.—Luqaasi 3:1, 2, 23.
Uminna layinki xibbi diro heedhinori alamete xagge borreessaano Yesuusi daafira borreessitino. * Wongeellate giddo nooti Yesuusi reyino gara kultanno xagge, hakkawaro Roomu mangiste jaddo loosino manna qorichishshanno gari ledo sumuu yitannote. Qoleno, tini xagge addanka ikkitinotenna ammansiissanno taje afidhinote; Yesuusi rosaano giddo mitootu laanfe nafa borreessinoonni. (Maatewoosi 26:56; Luqaasi 22:24-26; Yohaannisi 18:10, 11) Tini baala taje, Wongeeluwa borreessituri ammanantinore ikkitinotanna insa Yesuusi daafira borreessitinori gara ikkinota leellishshanno.
YESUUSI REYOTENNI KAINO?
Batinyu manni Yesuusi uullate aana heeˈrinotanna reyinota ammananno; ikkollana mitu manni reyote kainota huluullamanno. Hawaariyaatesi nafa umo isi reyotenni kainota macciishshitu yannara diammantino. (Luqaasi 24:11) Ikkollana insanna wole rosaano reyotenni kainoha Yesuusa duucha higge laˈuti huluullama agurtino. Isinni mitte hige Yesuusi 500 saˈˈanno mannira leellino.—1 Qorontoosi 15:6.
Yesuusi rosaano usurransaranna shinansara dandiinannita affinoha ikkirono, manna baalaho wole agurina Yesuusa shitinorira nafa isi reyotenni kainota waajjitukkinni dudubbino. (Hawaariyaatete Looso 4:1-3, 10, 19, 20; 5:27-32) Batinye rosaano Yesuusi reyotenni kainota seekkite afa hooggoommero waajjitukki isi kainota dudubbannoni? Isinni hakkawarono ikko xaano alamete aana Kiristinnu ammaˈno halaˈlitanno gede assitinoti Yesuusi reyotenni kaˈˈasiiti.
Yesuusi reyinotanna reyotenni kainota kultannoti wongeelu xagge, gara ikkitino taje amaddino xaggeeti. Tenne xagge seekkite nabbawakki xaggete giddo kulloonniri noore ikkinota ammanatto gede kaaˈlitannohe. Yesuusi reyinohunna kainohu mayiraatiro afakki ammanakki jawaattanno gede kaaˈlitannohe. Aane noo birxichira tenne hajore laˈneemmo.
^ GUFO 7 Taasitesi yinannihu 55 M.D. balla ilamino borreessaanchi togo yee borreessino: “Kiristaana yaanno suˈmira xinta ikkinoha Kiristoosi (Kiristuusi), nugusu Xibariyoosi gashshino waro gashshaanonke giddo mittu yaano Phaanxiyosi Philaaxoosi lowo geeshsha qorichishinosi.” Qoleno Siwitoneesi (umi xibbi diro), Yihudu wido ikkinohu xaggete borreessaanchi Joosefesinna (umi xibbi diro) Biritaaniyu gashshaanchi Shiimiidi Piliini (layinki xibbi diri hanafora) Yesuusi suˈma qummi assitino.
