Alamete aana lowo mannira sagalenna heeˈranno mini hasiisannonsa. Mitootu kayinni albillittete hexxo afiˈra hasidhanno. Togoo manna kaaˈlate assineemmori, Magano hagiirsiinseemmonna atootesi afiˈneemmo gede assannonkehu hiittoonniiti?

“Buxanete aannohu Kaaliiqira liqiissanno; Kaaliiqino assino danchummara aannosi.”—LAWISHSHA 19:17.

Yesuusi, mulqidhannori ganteenna foolu callu gatino manchire kulanno lawishsha coyiˈrino. (Luqaasi 10:29-37) Mittu doogaanchi konne baasa gawajjamino mancho kaaˈlinosi. Kuni doogaanchi gaˈresi wole ikkiturono hakkonne gawajjamino mancho kaaˈlinosi.

Kuni shaqqadu manchi gawajjamino mancho xagisinosihanna hasiisannosire uyinosiha calla ikkikkinni fooliishshiishinosi.

Konni lawishshinni maa ronseemmo? Yesuusi konne lawishsha horoonsiˈre, kaaˈlo hasiissannonsare dandiinummo doogo baalantenni kaaˈla hasiissannonketa rosiisino. (Lawishsha 14:31) Qullaawa Borro, Maganu muli yanna giddo buximanna qarra hunannota kultanno. Kayinni, ‘Maganu tenne assannohu hiittoonniiti? Qoleno konne assannohu mamooteeti?’ yine hendeemmoha ikkara dandaanno. Aananno birxichira, baxannonke Kalaqaanchinke albillittete qixxeessinonke atooti daafira ronseemmo.