Dancha Mancho Ikka Albillitte Teense Heeˈnanni Gede Assitanno?
Hundinni kayise batinyu manni, danchanna sirnyaataamo mancho ikka albillitte teense heeˈnanni gede assitanno yee ammananno. Lawishshaho, batinyu Iisiyu manni maccaha ikkinohu Konfiyushesi yinanni egennaami (551-479 K.A.) coyiˈrinore ayirrisanno; isi togo yiino: “Mannu assahera hasiˈrattokki coye, atino woleho assitooti.”
BATINYU MANNI ASSANNORE
Duuchu manni, danchu amanyooti heeˈrinkero albillitte teense dancha heeshsho heeˈneemmo yee ammananno. Hakko daafira insa manna ayirrisate, dancha amanyoote leellishate, dagooma kaaˈlannore assatenna danchu tiiˈˈinni heeˈrate sharramanno. Linii yinanniti Veetinaamete gobbara heedhanno mancho, “Ammanamoommatanna giddo keeraancho ikkummaro, maassameemma yee ammanoomma” yitino.
Mitootu danchare assate kaˈannohu ammaˈnonsanni kainohunniiti. Shuyuni yinannihu Tayiwaanete heeˈranno manchi togo yiino: “Mittu manchi lubbote noo woyite assannori, reyihu gedensaanni hegerera hagiidhanni heeˈranno gede woy qarramanni heeˈranno gede assannosi yine rosiinsoonnie.”
TINI ABBITINO GUMI MAATI?
Woleho danchare assinummoro, lowo horo afiˈneemmoti egennantinote. Ikkollana, mannaho woˈma giddonsanni danchare assannohu batinyu manni coyi insa hexxi gede ikkannokki woyiti noota wodanchino. Hongi Kongete heedhannoti Siyu Pingi yinanni mancho, “Wolootaho danchare assanno manni woˈma woyite maassamannokkita umiˈya heeshshonni laoomma” yitino. Ise ledde togo yitino: “Maateˈya towaaxxatenna danchare assate danduummare baala assoomma. Ikkirono minaanniˈya aneno qaaqqoˈyano hune haˈrinonke.”
Batinyu manni, ammaˈno noonsa manni baalunku danchaho yaa ikkinokkita huwatino. Jaappaanete heedhannoti Isiko yinanni mancho togo yitino: “Mitte ammaˈno widira hige, wedellootu pirogiraamensa qineessa hanafumma. Hatte ammaˈno giddo noohu mitu manni foorannoha, silxaanete gaaramannoha, hattono beetekiristaanete woxe doogimale horoonsiˈrannoha ikkinota afummati masoomma.”
“Maateˈya towaaxxatenna danchare assate danduummare baala assoomma. Ikkirono minaanniˈya aneno qaaqqoˈyano hune haˈrinonke.”—SIYU PINGI, HONGI KONGE
Ammanansara diinaggaawannohu mitu manni, danchare assanni heeˈreenna bushu coyi tuncu yeennansa dadillino. Veetinaamete ilantinotera Vaanira hattoo coyi tuncu yiinose. Ise togo yitino: “Albillitte atootu noo heeshsho heeˈreemma yee, albi annuwaˈyara kakkallanni darga laalo, awawanna sagale barru baala masse kakkaleemma.” Ise ledde togo yitino: “Lowo diro danchare assanninna ammaˈnote woga wonshanni keeshshoommaha ikkirono, minaannaˈya buutote dhibbi amadi. Hakkiinni, qaaqqoˈya wole gobbara roso rossara hadhinowa reyitino.”
Dancha mancho ikka callano teense heeˈneemmo gede assitannonkekkiha ikkina, tennera kaaˈlannonkehu qaru coyi maatiyya? Tenne xaˈmora dawaro afiˈrate, huluullitannonke xaˈmuwara dawaro qolannonkehunna teense heeˈnanni gara kulannonkehu addaxxinanni biddishshi hasiisannonke. Togoo biddishsha afiˈra dandiineemmohu hiikkiinniiti?
