FUSHSHITINANNI WOXE HOROONSIˈNANNI GARA
2023 Kaaˈlote Looso—“Yihowa Baxille Illenkenni Laˈnoommo”
ARFAASA 26, 2024
Qullaawu Maxaafi giddo, “alamete gumulora” ‘daga dagate aana ola kayisannotanna’ kalaqamu dano ikkitannota balanxe masaalloonni. (Maatewoosi 24:3, 7) Saihu soqqanshote diro yaano 2023, tini masaalo woˈmitanna laˈnoommo. a Ikkollana, mite 100 ikkitanno gobbuwara olunna kalaqamu dano batidhinoha ikkirono, Yihowa Farciˈraasine Yihowa baxille leellishshino. Hiittoonni?
Saihu 2023 soqqanshote diro, roduuwinkera 200 saˈanno dano (kalaqamunnitino ikko mannu abbannoti) iillitinonsa. Yihowa Farciˈraasine danotenni gawajjantinore kaaˈlate, xaphoomunni tonne miliyoone doolaare b saˈˈanno woxe alamete doyicho loosira fushshinoonni woxi aaninni horoonsidhino. Kuni, roduuwu qooxeessinsara dano gawajjitino roduuwa kaaˈlate uminsanni fushshitino woxeno agurranna fulino woxeeti. Hanni fushshitinanni woxe horoonsiˈne dano iillitinonsa roduuwa kaaˈlinoommo gara leellishannoha lame lawishsha laˈno.
“Addu Baxilli Addinta No”
Nayijeeriyaho mitu qooxeessira duucha woyite lolahu qarrisanno. Ikkollana, Birra 2022 dayino lolahi hatte gobbara tonnu diri giddo horo ikke diegenninoho. Kuni lolahi 676,000 hekitaare ikkitannota loosiˈnanni baatto hunino; qoleno lame miliyoone saˈˈanno manni qaensanni daramino. Nayijeeriyunniti sinu biironke, dano gawajjitinore kaaˈlatenna ayyaanaamittensa jawaachishate bayichonko Irdaatu Komite xintitino.
Nayijeeriyaho roduuwinke irdaatu uduunne roduuwaho iillishate, lolahu batiˈrino doogganna woˈmite iima hadhanni noo lagga tayisse saˈino
Roduuwinke Gawajjantino Gara
7,505 halashshaano qaensanni darantino
860 mini gawajjamino woy horo diigamino
90 Gambooshshu Addaraashenna mitte Jajjabbu Gambooshshi Addaraashe lolahu eˈˈe woˈmino
Fushshote Woxe Horoonsiˈnoonni Gara
Dano gawajjitinore kaaˈlate, 250,000 doolaare ale ikkanno woxe fushshine, aane noore shiqinshoonni:
Sagale lawishshaho ruuze, baaqeelanna paasta
Mini uduunne lawishshaho dadonna agobere
Lolahu diigino woy hunino minna gatamarroonni woy wirro minnoonni
Roduuwinke dirijjitete woxe garunni horoonsiˈnanni gede assitinohu hiittoonniiti? Tenne assinoonniti mitte doogo, mitto mittonka mine gatamarriro woyyannoronna teˈee seekke buuxate. Mitto mine haaro ikkine mina hasiissinoha ikkiro, qooxeessaho rosamino garinni minnoonni.
Dano gawajjiteenna kaaˈlinoonni roduuwinke lowo geeshsha hagiidhitino. Mitte rodoo togo yitino: “Lolahu heeshshonke umo lekkicho soorrino; mayira yiniro, gatinke gudisame baino, qoleno miniweelo mullawa gantoommo. Roduuwinke hakko barranni dagge kaaˈlitunketanna fooliishshiˈneemmo bayicho uyitunketa kayinni wodanaaˈminoommo. Sinu biiro sokkinonke sagale iillituta isinni roore wodanaaˈminoommo. Yohaannisi 13:34, 35 woˈmitanna illenkenni laˈnummota, yineemmonti baˈinonke. . . . Addu baxilli addinta no. Roduuwinke kaaˈlo hasiisse noonke saatera dagge kaaˈlitinonke daafira, aninna maateˈya godowinta, lowo geya galaxxineemmonsa.”
Qarqaru mannino kaaˈlote loosonke wodanchino. Bayelsa Qoqqowira, Sabagiriya heeˈrannohu mittu olluu murrichi togo yiino: “Alamete aana batinye dirijjittanna beetekiristaanna no; kayi togoore assitinori Yihowa Farciˈraasine callaati. . . . Alamete aana noote kaajja dirijjitta giddo mitte [kiˈne] dirijjiteeti.”
“Yihowa Baxille Illenkenni Laˈnoommo”
Ammajje 2023, Chiili gobbara 400 ale ikkitanno giira kaˈe lowore huntino. Xaphoomunni 430,000 hekitaare saˈanno gobba giirantino; kuri giddo mite Chiili gobbara lowore kaaˈlanno miinji noo baattooti. Mite 8,000 meddi yaanno manni qaensanni fule daramino. Sinu biiro dano kalaqantuhunni shiima yanna gedensaanni, roduuwanke kaaˈlate qixxaawo assitino.
Chiili gobbara, roduuwinke mitte maatera mine haaro ikkite mintino
Roduuwinke Gawajjantino Gara
222 halashshaano qaensanni fulte darantino
20 mini giirame baino
Fushshote Woxe Horoonsiˈnoonni Gara
Dano gawajjitinore kaaˈlate, 200,000 doolaare saˈˈanno woxe fushshine, konni woroonni noore shiqinshoonni:
Sagalenna waa
Nadaaje, mine feyatenna hayishshate hasiisanno uduunnenna xagga
Gawajjantino minna gatamara
Mitte maate mininsanna loosinsano gatikkinni noonsari baalu giirame bainota affu woyite lowo geeshsha massino. Konni garinni tini maate loosiweelo gattino. Boodu barri geya, tini maate alba mininsa noo bayicho xa buluulu callu gatinota laˈanno woyite lowo geeshsha xissiisidhino. Mine haaro ikkine minnanni heeˈnoonninsata laˈuti kayinni sheshifattino. Kaaˈlitansara martino roduuwi lowo baxille leellishshinonsa daafira, isi cincitino. Tini maate insara assinoonniri lowo geya dhagge ikkinonsa daafira, insa uminsa wolootu mine mina kaaˈlitino.
Kaaˈlote loosinke lowo roduuwinkera dhagge ikkinonsa. Mittu rodii togo yiino: “Yihowa qixxeessinonketi Irdaatu Komite qixxaawo lowo geeshsha dhagge ikkitannote. Kuri roduuwi, dano iillituhunni layinki soodonni dagge hasiisannore shiqishshanni no. Irdaatu komite wole gobbara roduuwanke kaaˈlitino gara nabbawa jawaachishshanno. Ninke umonke kaaˈlitanna laˈneemmo woyite kayinni coyi baxxanno. Dirijjitenke roore naandeemmo; qoleno, roduuwu Yihowa faale hadhanno gari, maalaamittetenna ayyaanaamittete hasiisannonkere afiˈneemmo gede assate sharrantanno gari, hattono baxille leellishshannonke gari roore dhagge ikkannonke. Yihowa baxille illenkenni laˈnoommo.”
Tenne alame goofimarchi roore gamba yii kiiro, dano roore lexxitannota anfoommo. (Luqaasi 21:10, 11) Ikkirono, Kiristaanu songo widoonni, shaqqadu Mootenke Kiristoosi Yesuusi “alamete gumulo geeshsha barru baala” ninke ledo nootano anfoommo. (Maatewoosi 28:20) Alamete doyicho loosira donate.jw.org widoonninna wole doogganni fushshatto woxi, hattono wolqakkinna yannakki uyite kaaˈlakki Maganu Gashshootiranna shaqqadu Mootenkera halamattota leellishshanno. Woˈmanka woyite shaqqillunni aatto daafira galanteemmohe.